ស៊ូដង់៖ កិច្ចព្រមព្រៀងសន្តិភាព រវាងរដ្ឋាភិបាលនិងក្រុមឧទ្ទាម បិទបញ្ចប់ទំព័រសង្រ្គាមរយៈពេល១៧ឆ្នាំ
កាលពីថ្ងៃសៅរ៍ ទី៣តុលា រដ្ឋាភិបាលបណ្តោះអាសន្នស៊ូដង់ បានចុះហត្ថលេខា លើកិច្ចព្រមព្រៀងសន្តិភាពជាផ្លូវការ ជាមួយនិងក្រុមឧទ្ទាម នៅឯទីក្រុងជូបា រដ្ឋធានីប្រទេសស៊ូដង់ខាងត្បូង។ នេះគឺជាការបើកទំព័រសករាជថ្មី ដើម្បីបិទបញ្ចប់សង្រ្គាមស៊ីវីល ដែលបានអូសបន្លាយប្រមាណ១៧ឆ្នាំមកហើយ ហើយដែលបានរារាំងប្រទេសអាហ្វ្រិកដ៏ធំនេះ មិនឲ្យរីកចម្រើនអភិវឌ្ឍន៍បាន។
ចុះផ្សាយនៅថ្ងៃ៖
ស្តាប់ - ០២:៤៤
ថ្ងៃទី៣តុលា សម្លេងស្គរ តន្ត្រី ចម្រៀងកងរំពង បានលាន់ឮនៅក្រុងជូបា រដ្ឋធានីស៊ូដង់ខាងត្បូង ដើម្បីអបអរការចុះហត្ថលេខាជាផ្លូវការ លើកិច្ចព្រមព្រៀងសន្តិភាព រវាងរដ្ឋាភិបាលក្រុងខាទូម ជាមួយនិងក្រុមឧទ្ទាមនៅស៊ូដង់។ កម្មវិធីចុះហត្ថលេខានេះ ត្រូវបានចូលរួមជាសាក្សី ដោយតំណាងរដ្ឋាភិបាលស៊ូដង់ខាងត្បូង ដែលជាអ្នកជួយសម្របសម្រួល តំណាងអង្គទូតបរទេសមួយចំនួន ដូចជាប្រទេសឆាដ កាតា អេហ្ស៊ីប សហពន្ធអាហ្វ្រិក សហភាពអឺរ៉ុប និងអង្គការសហប្រជាជាតិផងដែរ។
សូមរំលឹកថា ប្រមាណ១៧ឆ្នាំមកហើយ ដែលសង្រ្គាមស៊ីវីលនៅស៊ូដង់ បានអូសបន្លាយ ដោយក្រុមឧទ្ទាមជាច្រើនក្រុម បានប្រមូលផ្តុំគ្នា ប្រយុទ្ធដណ្តើមអំណាច និងអធិបេយ្យភាពរៀងៗខ្លួន។ រដ្ឋបាលស៊ូដង់ ដឹកនាំដោយលោក អូម៉ា អ៊ែលបាឆៀរ បានដួលរលំនៅខែមេសាឆ្នាំ២០១៩ បន្ទាប់ពីប្រជាជនស៊ូដង់ និងក្រុមយោធាមួយក្រុមបានធ្វើរដ្ឋប្រហារ ហើយបានបង្កើតរដ្ឋាភិបាលបណ្តោះអាសន្ន។
គឺរដ្ឋាភិបាលនេះហើយ ដែលបានផ្តល់អាទិភាពដល់ការចរចា ជាមួយក្រុមឧទ្ទាមទាំងអស់។ កិច្ចព្រមព្រៀងសន្តិភាព នៅថ្ងៃទី៣តុលា គឺត្រូវបានចុះហត្ថលេខា ដោយលោក Mohamed Hamdan Daglo មេបញ្ជាការកងទ័ព និងជាអនុប្រធានាធិបតីស៊ូដង់ តំណាងឲ្យរដ្ឋាភិបាលបណ្តោះអាសន្នក្រុងខាទូម និងក្រុមសម្ព័ន្ធឧទ្ទាម ដែលមាន៥ក្រុមរួមគ្នា។
កិច្ចព្រមព្រៀងសន្តិភាពដ៏សំខាន់នេះ មានកំណត់នូវ៨ចំណុចធំៗ ដែលមានជាអាទិ៖ ការរៀបចំបែងចែកកម្មសិទ្ធិដីធ្លី របស់សហគមជនជាតិផ្សេងៗគ្នា ការរៀបចំប្រពន្ធយុត្តិធម៌ក្នុងសម័យអន្តរកាល ការសងសំណងខូចខាត ការអភិវឌ្ឍន៍ដល់វិស័យពាក់ព័ន្ធនឹងទំនៀមទំលាប់ បំលាស់ទីរបស់សហគមជនជាតិ ព្រមទាំងចាត់ចែងការបែងចែកអំណាច និងភោគផលឲ្យមានសមភាព និងចុងក្រោយ គឺរៀបចំឲ្យមានការត្រលប់មកវិញរបស់ប្រជាជន ដែលបានរត់ភៀសខ្លួន ឬជន្លៀសចេញដោយសារសង្រ្គាម។ កិច្ចព្រមព្រៀងនេះ ក៏បានកំណត់ផងដែរ ឲ្យចាត់បញ្ចូលក្រុមឧទ្ទាមប្រដាប់អាវុធទាំងអស់ ទៅក្នុងជួរកងទ័ពជាតិស៊ូដង់តែមួយ ដោយធ្វើយ៉ាងណា ធានាឲ្យបាននូវសមមាត្រ រវាងសហគមជនជាតិទាំងអស់។
គួរកត់សំគាល់ថា នេះគឺជាការបើកទំព័រសករាជថ្មី សម្រាប់ប្រទេសអាហ្វ្រិកដ៏ធំមួយនេះ បន្ទាប់ពីឆ្លងកាត់សង្រ្គាម ស៊ីវីលរ៉ាំរ៉ៃ ប្រមាណជាង៣០ឆ្នាំមកហើយ។ សង្រ្គាមដែលបានធ្វើឲ្យដែនដីស៊ូដង់ខាងត្បូង ប្រកាសឯករាជ្យនៅឆ្នាំ២០១១។ ទោះជាយ៉ាងណាក៏ដោយ គ្រប់ភាគីទាំងអស់ ទទួលស្គាល់ថា នេះគឺជាដំណាក់កាលចាប់ផ្តើម ក្នុងការកសាងសន្តិភាព ខណៈដែលការលំបាកកំពុងរងចាំនោះ គឺការរៀបចំស្តារសេដ្ឋកិច្ច ហេដ្ឋារចនាសម្ពន្ធ័សាធារណៈ និងអំណាចរដ្ឋបាល ឲ្យមានប្រសិទ្ធិភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ