អ.ស.ប ស៊ើបអង្កេតឃើញពីឧក្រិដ្ឋកម្មសង្គ្រាមនិងឧក្រិដ្ឋកម្មប្រឆាំងមនុស្សជាតិនៅម៉ាលី
ក្រុមអ្នកស៊ើបអង្កេតអ.ស.ប ពាក់ព័ន្ធអំពើហិង្សានៅប្រទេសម៉ាលី បានប្រាប់ក្រុមប្រឹក្សាសន្តិសុខនូវភស្ដុតាងដែលបញ្ជាក់ថាកងទ័ពម៉ាលី បានប្រព្រឹត្តបទឧក្រិដ្ឋកម្មសង្គ្រាមពិតមែន។ ក្រៅពីនេះ ក៏មានការរកឃើញមួយផ្សេងទៀតដែរអំពីឧក្រិដ្ឋកម្មប្រឆាំងមនុស្សជាតិនៅម៉ាលីបង្កដោយពួកជីហាតភេរវនិយមនិងក្រុមប្រដាប់អាវុធមួយចំនួនទៀត។
ចុះផ្សាយនៅថ្ងៃ៖
ស្តាប់ - ០២:៣៥
ការចោទប្រកាន់ខាងលើត្រូវបានធ្វើឡើងនៅក្នុងរបាយការណ៍មួយដែលមានកម្រាស់ ៣៣៨ ទំព័ររបស់គណៈកម្មាធិការស៊ើបអង្កេតអន្តរជាតិស្តីអពីម៉ាលី។ គណៈកម្មាធិការស៊ើបអង្កេតនេះមានសមាជិក៣ នាក់និងបានស៊ើបអង្កេតពីអំពើហិង្សាដែលបានកើតឡើងរយៈពេល ៦ ឆ្នាំ ចាប់ពីឆ្នាំ ២០១២ ដល់ ២០១៨។
សេចក្តីសន្និដ្ឋាននៃការស៊ើបអង្កេតត្រូវបានបញ្ជូនទៅក្រុមប្រឹក្សាសន្តិសុខអង្គការសហប្រជាជាតិហើយ ក៏ប៉ុន្តែវានៅមិនទាន់ត្រូវបានផ្សព្វផ្សាយជាសាធារណៈនៅឡើយទេ។ យ៉ាងណាក៏ដោយ របាយការណ៍នៃការអង្កេតបានផ្តល់អនុសាសន៍ឲ្យបង្កើតតុលាការមួយដែលមានជំនាញដើម្បីកាត់ទោសសកម្មភាពពាក់ព័ន្ធនឹងឧក្រិដ្ឋកម្មអន្តរជាតិ។
"គណៈកម្មាធិការស៊ើបអង្កេតអន្តរជាតិមានហេតុផលសមរម្យក្នុងការជឿជាក់ថាកងកម្លាំងការពារជាតិ និងកងសន្តិសុខម៉ាលីបានប្រព្រឹត្តឧក្រិដ្ឋកម្មសង្គ្រាម រួមទាំងអំពើហិង្សាដល់អាយុជីវិតជនស៊ីវិល ព្រមទាំងពួកយោធាដែលគេសង្ស័យថាមានជាប់ពាក់ព័ន្ធឬក៏សហការជាមួយពួកក្រុមប្រដាប់អាវុធជ្រុលនិយម”។ នេះគឺជាសំណេរនៅក្នុងបាយការណ៍និងដែលត្រូវបានចុះផ្សាយដោយទីភ្នាក់ងារសារព័ត៌មានបារាំង AFP នៅថ្ងៃអង្គារ ទី២២ ធ្នូ។
គួរកត់សម្គាល់ថា ម៉ាលីដែលជាប្រទេសស្ថិតនៅតំបន់សាហ៊ែលអាហ្វ្រិកបានធ្លាក់ចូលក្នុងជង្ហុកនៃវិបត្តិកាលពីឆ្នាំ ២០១២ នៅពេលដែលក្រុមបំបែកខ្លួនជនជាតិភាគតិចតួរ៉ែក (Tuareg) បានចាប់ផ្តើមកុបកម្មនៅភាគខាងជើងនៃប្រទេស។ ពួកឧទ្ទាមតួរ៉ែក ក្រោយមកទៀតត្រូវបានផ្តួលរំលំដោយក្រុមប្រដាប់អាវុធរបស់ពួកជីហាត។
បារាំង ដែលជាអតីតម្ចាស់អាណានិគមលើប្រទេសម៉ាលី បានបើកប្រតិបត្តិការយោធានៅឆ្នាំ ២០១៣ និងបានធ្វើឲ្យពួកជីហាតភេរវនិយមបែកក្រុមខ្ចាត់ខ្ចាយអស់។ ក៏ប៉ុន្តែ នៅមួយរយៈក្រោយមកទៀត ពួកជីហាតបានព្យាយាមប្រមូលផ្គុំគ្នីគ្នានិងបានពង្រីកយុទ្ធនាការយោធារបស់ពួកគេនៅចំកណ្តាលប្រទេសម៉ាលី និងក្រោយមកឆ្ពោះគោលដៅរបស់ពួកគេទៅប្រទេសជិតខាងនីហ្សេរីយ៉ា និងបួគីណាហ្វាសូ។
មនុស្សរាប់ពាន់នាក់បានស្លាប់ និងរាប់សែននាក់បានរត់ភៀសខ្លួនចេញពីផ្ទះសម្បែង។ គណៈកម្មាធិការស៊ើបអង្កេតអន្តរជាតិស្តីអពីប្រទេសម៉ាលី ចាត់ទុកថាក្រុមប្រដាប់អាវុធជ្រុលនិយម បានប្រព្រឹត្តឧក្រិដ្ឋកម្មប្រឆាំងនឹងមនុស្សជាតិនិងឧក្រិដ្ឋកម្មសង្គ្រាម។
បទឧក្រិដ្ឋទាំងនោះរួមមានជាអាទិ៍ ឃាតកម្ម ការធ្វើទារុណកម្ម ការរំលោភសេពសន្ថវៈ ការចាប់ចំណាប់ខ្មាំង និងការវាយប្រហារនានាប្រឆាំងនឹងបុគ្គលិកអង្គការមនុស្សធម៌ និងកងកម្លាំងថែរក្សាសន្តិភាពរបស់អង្គការសហប្រជាជាតិប្រចាំការនៅម៉ាលី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ