អាហ្វ្រិកកណ្តាលមានះ រៀបចំការបោះឆ្នោត ទោះបីប្រឈមការគំរាមកំហែង ផ្នែកសន្តិសុខ
ថ្ងៃទី២៧ធ្នូនេះ សាធារណៈរដ្ឋអាហ្វ្រិកកណ្តាល បានរៀបចំការបោះឆ្នោតជ្រើសរើសសមាជិកសភា និងជ្រើសរើសប្រធានាធិបតី។ ជាការបោះឆ្នោត ដែលស្ថិតនៅក្នុងគ្រោះថ្នាក់បំផុត ដោយសារតែក្រុមឧទ្ទាមប្រដាប់អាវុធ បានគំរាមថានឹងវាយប្រហារ និងរារាំងដំណើការបោះឆ្នោតនេះ។ ការបោះឆ្នោតនេះ ក៏បានទទួលការការពារ ពីសំណាក់ក្រុមកងកម្លាំងមួកខៀវរបស់អង្គការសហប្រជាជាតិ កងទ័ពរបស់រ៉ូវ៉ាន់ដា ព្រមទាំងកម្លាំងពិសេសរបស់រុស្ស៊ីផងដែរ។
ចុះផ្សាយនៅថ្ងៃ៖
ស្តាប់ - ០២:៤១
ក្រុមឧទ្ទាមប្រដាប់អាវុធ ធ្លាប់បានប្រកាសថា នឹងបំផ្លាញការបោះឆ្នោតនេះ ដើម្បីរារាំង កុំឲ្យលោក Touadéra អាចបន្តកាន់អំណាចបានតទៅទៀត។ យោងតាមប្រភពជាច្រើន នៅតាមតំបន់មួយចំនួនធំ នៃសាធារណរដ្ឋអាហ្វ្រិកកណ្តាល គឺក្រុមឧទ្ទាម បានគំរាមសំឡុត សម្លាប់អ្នកដែលហ៊ានទៅបោះឆ្នោត។ មិនត្រឹមតែប៉ុណ្ណោះ នៅតាមតំបន់ខ្លះ ក្រុមឧទ្ទាម បានរឹបអូសយកសម្ភារៈបោះឆ្នោតទៀតផង។ ក្រៅតែពីនៅរដ្ឋធានី បានហ្គី ដែលការបោះឆ្នោតហាក់បានដំណើរការទៅតាមសម្រួល ចំណែកនៅតំបន់ផ្សេងទៀត ប្រជាជនរាប់ម៉ឺននាក់ បានអះអាងថា គេមិនបានទទួលបណ្ណបោះឆ្នោតឡើយ រហូតដល់ព្រឹកថ្ងៃបោះឆ្នោត។
គួរកត់សំគាល់ថា នៅក្នុងបរិបទបែបនេះ ភាពត្រឹមត្រូវស្របច្បាប់ អាចយកជាការបាន នៃការបោះឆ្នោតនេះ កំពុងតែត្រូវបានគេចោទសួរ។ លោកប្រធានាធិបតី Touadéra ដែលមានះ ចង់រៀបចំការបោះឆ្នោតនេះ ត្រូវបានគេបរិហាផងដែរ ថាបានរៀបចំការបន្លំសន្លឹកឆ្នោត ដើម្បីអាចជាប់នៅជុំទីមួយតែម្តង ខណៈដែល បក្សនយោបាយប្រឆាំង បានបែកបាក់គ្នា រាយប៉ាយជាបក្សតូចៗ គ្មាននរណាអាចប្រជែងបាន។
គួរបញ្ជាក់ថា ការបោះឆ្នោតនេះ ត្រូវបានទទួលការតាមដានការពារ ពីសំណាក់ កងទ័ពមួកខៀវនៃបេសកកម្មរក្សាសន្តិភាពប្រចាំអាហ្វ្រិក របស់អង្គការសហប្រជាជាតិ ចំនួន១១៥០០នាក់។ បន្ថែមពីនេះ រ៉ូវ៉ាន់ដា បានបញ្ជូនកងកុម្មង់ដូពិសេស ចំនួន៣០០នាក់។ រុស្ស៊ីដែលបានប្រកាសគាំទ្រយ៉ាងពេញទំហឹង ចំពោះលោកប្រធានាធិបតី Touadéra ក៏បានបញ្ជូនកងកម្លាំងឯកជនចំនួន៣០០នាក់ដែរ ដើម្បីការពារការបោះឆ្នោតនេះ។
យ៉ាងណាក៏ដោយ លោក Thierry Vircoulon អ្នកស្រាវជ្រាវនៅវិទ្យាស្ថានបារាំងសិក្សាទំនាក់ទំនងអន្តរជាតិ បានលើកឡើងថា ក្រុមឧទ្ទាម មានលទ្ធភាព រ៉ៅឆានការបោះឆ្នោតនេះ ដោយមិនចាំបាច់ លើកកម្លាំងចូលទៅវាយដល់រដ្ឋធានីទេ។ ចំណែក លោក Roland Marchal អ្នកជំនាញនៅមជ្ឈមណ្ឌលស្រាវជ្រាវអន្តរជាតិ នៃសាលាវិទ្យាសាស្ត្រនយោបាយប៉ារីស បានលើកឡើងថា ប្រជាជនអាហ្វ្រិកកណ្តាល កំពុងតែក្លាយជាចំណាប់ខ្មាំង ដោយសារតែការបោះឆ្នោត ដែលមិនអាចយកជាការបាន។
សូមរំលឹកថា សាធារណរដ្ឋអាហ្វ្រិកកណ្តាល គឺជាប្រទេសមួយក្នុងចំណោមប្រទេសក្រីក្របំផុតលើលោក។ សង្រ្គាមស៊ីវីលដណ្តើមអំណាច ដែលបានផ្ទុះឡើងតាំងតែពីឆ្នាំ២០១៣មក បានធ្វើឲ្យប្រជាជនអាហ្វ្រិកកណ្តាល ប្រមាណជិត២លាននាក់ ត្រូវបង្ខំចិត្ត រត់ភៀសខ្លួនចោលផ្ទះសំបែង។ ក្រុមនយោបាយអ៊ីស្លាម Séléka និងក្រុមលោកអតីតប្រធានាធិបតី François Bozizé ដែលបានប្រយុទ្ធគ្នា និងកាប់សម្លាប់ប្រជាជនស្លូតត្រង់រាប់ពាន់នាក់ ត្រូវបានអង្គការសហប្រជាជាតិ ចោទប្រកាន់ពី បទឧក្រិដ្ឋកម្មសង្រ្គាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ