របាយការណ៍ថ្មីមួយថាការប្រែប្រួលអាកាសធាតុជំរុញឲ្យកាន់តែមានបញ្ហាកង្វះអាហារូបត្ថម្ភសម្រាប់កុមារ
ការប្រែប្រួលអាកាសធាតុ អាចធ្វើឲ្យកុមារជួបបញ្ហាកង្វះអាហារូបត្ថម្ភ និងរបបអាហារមិនល្អ ធ្ងន់ធ្ងរខ្លាំងជាងភាពក្រីក្រ និងការគ្មានអនាម័យល្អត្រឹមត្រូវទៅទៀត។ នេះបើយោងទៅតាមការសិក្សាថ្មីមួយដែលទើបបានចេញផ្សាយនៅថ្ងៃព្រហស្បតិ៍ ទី១៤ មករា ឆ្នាំ២០២១។
ចុះផ្សាយនៅថ្ងៃ៖
ស្តាប់ - ០២:០៨
ទោះបីជាកង្វះអាហារូបត្ថម្ភចំពោះកុមារ មានការថយចុះជាសកលក្នុងរយៈពេលជាច្រើនទសវត្សរ៍កន្លងមកនេះក៏ដោយ ក៏បញ្ហាកង្វះអាហារូបត្ថម្ភបានកើនឡើងមកវិញចាប់តាំងពីឆ្នាំ ២០១៥ ដោយមួយចំណែកគឺបណ្តាលមកពីការកើនឡើងកម្តៅផែនដី និងគ្រោះមហន្តរាយធម្មជាតិផេ្សងទៀតដូចជាខ្យល់ព្យុះ និងគ្រោះទឹកជំនន់ជាដើម។ល។
អង្គការសហប្រជាជាតិបាននិយាយថា កុមារចំនួន ១៤៤ លាននាក់ដែលមានអាយុក្រោម ៥ ឆ្នាំ បានរងផលប៉ះពាល់ដោយភាពក្រិននៅក្នុងឆ្នាំ ២០១៩ ពីព្រោះតែកង្វះខាតអាហារូបត្ថម្ភរ៉ាំរ៉ៃ។ ហើយមានកុមារប្រមាណជា ៤៧ លាននាក់ផ្សេងទៀតទទួលរងគ្រោះ ពីការទទួលទានរបបអាហារ ដែលមានសារធាតុចិញ្ចឹមមិនគ្រប់គ្រាន់ ខ្វះជីវជាតិទ្រទ្រង់សរីរាង្គ។
ក្រុមអ្នកជំនាញបារម្ភថា ការមិនអាចទទួលបានរបបអាហារដែលមានជីវជាតិនិងវីតាមីនគ្រប់គ្រាន់ដែលចេះតែកើនឡើងនៅក្នុងតំបន់ជាច្រើននៅទូទាំងពិភពលោក នឹងធ្វើឲ្យមានបញ្ហាប្រឈមក្នុងការចិញ្ចឹមជីវិតដោយរបបអាហារត្រឹមត្រូវដល់មនុស្សរហូតដល់ ១០ ពាន់លាននាក់ នៅពាក់កណ្តាលសតវត្សរ៍នេះ។
ក្រុមអ្នកស្រាវជ្រាវមួយក្រុម ដឹកនាំដោយសាកលវិទ្យាល័យ Vermont នៃសហរដ្ឋអាមេរិកបានពិនិត្យភាពចម្រុះនៃរបបអាហារក្នុងចំណោមកុមារជាង១ សែននាក់ដែលមានអាយុក្រោម ៥ឆ្នាំ នៅក្នុងប្រទេសដែលមានប្រាក់ចំណូលទាបនៅទូទាំងទ្វីបអាស៊ី អាហ្វ្រិក និងអាមេរិកខាងត្បូង។
បន្ទាប់មកទៀត ពួកគេបានបញ្ចូលលទ្ធផលនោះជាមួយទិន្នន័យសីតុណ្ហភាពនិងចំនួនទឹកភ្លៀងដែលធ្លាក់ចុះមកដីរយៈពេល ៣០ ឆ្នាំ។ ក្រុមអ្នកស្រាវជ្រាវនៅទីបំផុតទៅ បានរកឃើញថា សីតុណ្ហភាពដែលកើនកម្តៅគឺជាកត្តារួមចំណែកឲ្យមានការថយចុះគួរឲ្យកត់សម្គាល់នូវគុណភាពនៃរបបចំណីអាហារនៅក្នុងតំបន់ចំនួន ៥ ក្នុងចំណោមតំបន់ដែលត្រូវបានលើកយកទៅសិក្សាទាំងអស់ចំនួន ៦។
នៅក្នុងទស្សនាវដ្តីសិក្សាស្រាវជ្រាវផ្នែកបរិស្ថាន ក្រុមអ្នកជំនាញរបស់សាកលវិទ្យាល័យ Vermont បានព្រមានថាការប្រែប្រួលអាកាសធាតុអាចនឹងធ្វើឲ្យកិច្ចខិតខំប្រឹងប្រែងដ៏ខ្លាំងនិងជាយូរណាស់មកហើយរបស់ពិភពលោកក្នុងការថែរក្សានិងអភិវឌ្ឍកុមារត្រូវទទួលបរាជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ