លីប៊ីបើកទំព័រថ្មី ដើម្បីកសាងសន្តិភាព ជាមួយរដ្ឋាភិបាលអន្តរកាលបណ្តោះអាសន្ន
លីប៊ីទើបតែបានឈានចូលទៅបើកទំព័រថ្មី ដើម្បីបិទបញ្ចប់វិបត្តិនយោបាយ សង្រ្គាមរ៉ាំរ៉ៃប្រមាណ១០ឆ្នាំមកនេះ។ កាលពីថ្ងៃសៅរ៍ទី៦កុម្ភៈ វេទិកាសម្រុះសម្រួលនយោបាយលីប៊ី ដែលផ្តួចផ្តើមឡើង ដោយអង្គការសហប្រជាជាតិ បានបោះឆ្នោត តែងតាំង លោក អាប់ឌែល ហាមីដ បីបា (Abdel Hamid Dbeibah) ឲ្យធ្វើជានាយករដ្ឋមន្ត្រី បណ្តោះអាសន្ន មានតួនាទីបង្កើតរដ្ឋាភិបាលអន្តរកាលមួយ និងរៀបចំការបោះឆ្នោតនៅចុងឆ្នាំ២០២១នេះ។
ចុះផ្សាយនៅថ្ងៃ៖
ស្តាប់ - ០២:១៩
សមាជិកទាំង៧៥នាក់ នៃវេទិកាសម្រុះសម្រួលនយោបាយលីបី បានជួបប្រជុំគ្នានៅក្បែរទីក្រុងហ្សឺណែវ ហើយបានបោះឆ្នោត ជ្រើសតាំងលោក Abdel Hamid Dbeibah ឲ្យធ្វើជានាយករដ្ឋមន្ត្រីលីប៊ីបណ្តោះអាសន្ន។ លោកនាយករដ្ឋមន្ត្រីថ្មីរូបនេះ មានពេល២១ថ្ងៃ ដើម្បីរៀបចំរដ្ឋាភិបាលអន្តរកាល ហើយបន្ទាប់មកទៀតមានពេល២១ថ្ងៃទៀត ដើម្បីទទួលបានការផ្តល់ទំនុកចិត្ត ពីសំណាក់សភាលីប៊ី។ កម្មវត្ថុនៃរដ្ឋាភិបាលអន្តរកាលនេះ គឺប្រមែរប្រមូលគ្រប់ភាគីនយោបាយទាំងអស់ ឲ្យត្រូវរ៉ូវគ្នា ទាំងក្រុមខាងកើត និងក្រុមខាងលិច ដើម្បីឈានទៅរៀបចំការបោះឆ្នោតប្រធានាធិបតី នៅខែធ្នូ ចុងឆ្នាំ២០២១។
លោកអគ្គលេខាធិការអង្គការសហប្រជាជាតិ បានសម្តែងសុទិដ្ឋិនិយម ចំពោះការបោះជំហានថ្មីនេះ ដោយលោកជឿជាក់ថា វានឹងនាំលីប៊ីអោយស្គាល់សន្តិភាព។ តែទន្ទឹមនឹងនេះ បារាំង អ៊ីតាលី អង់គ្លេស អាល្លឺម៉ង់ បានលើកលើងថា ដំណើរការកសាងសន្តិភាពនៅវែងឆ្ងាយណាស់ សម្រាប់លីប៊ី។
សូមរំលឹកថា លីប៊ីត្រូវយាយីដោយសង្រ្គាមស៊ីវីល ដណ្តើមអំណាច ប្រមាណ១០ឆ្នាំ បន្ទាប់ពីបានធ្វើបដិវត្តន៍ទំលាក់មេដឹកនាំផ្តាច់ការ កាដាហ្វ៊ី ដែលបានកាន់អំណាចរយៈពេល៤២ឆ្នាំ។ បច្ចុប្បន្នលីប៊ី ត្រូវពុះចែកជា២ ម្ខាងនៅខាងកើត គ្រប់គ្រងដោយឧត្តមសេនីយ៍ ហាហ្វតា និងម្ខាងនៅខាងលិច គឺរដ្ឋាភិបាលក្រុងទ្រីប៉ូលី ទទួលស្គាល់ដោយសហគមន៍អន្តរជាតិ។ បន្ទាប់ពីប្រយុទ្ធដណ្តើមដែនដីគ្នា ដោយមានការចូលអន្តរាគមន៍ពីកងទ័ពតួកគី និងរុស្ស៊ីផងនោះ ក្រុមបដិបក្សទាំង២បានយល់ព្រមចុះបទឈប់បាញ់ នៅត្រីមាសទី៣ចុងឆ្នាំ២០២០។ ប្រការនេះ បានញ៉ាំងឲ្យវិស័យផលិតប្រេងឆៅ ដែលជាប្រភពចំណូលដ៏សំខាន់របស់លីប៊ីនោះ អាចចាប់ផ្តើមងើបដំណើរការបន្តិចឡើងវិញ។
គួរកត់សំគាល់ថា លោក Abdel Hamid Dbeibah ដែលទើបតែត្រូវបានគេតែងតាំងជានាយករដ្ឋមន្ត្រីបណ្តោះអាសន្ននេះ មិនត្រូវបានគ្រប់ភាគីលីប៊ីពេញចិត្តទាំងស្រុងទេ។ មានអាយុ ៦១ឆ្នាំ លោកគឺជាអ្នកជំនួញ មានទ្រព្យស្តុកស្តម្ភម្នាក់ ហើយធ្លាប់ជាមនុស្សស្និទនឹងក្រុមអតីតមេដឹកនាំផ្តាច់ការ កាដាហ្វ៊ី។ លោកម្នាក់នេះ ត្រូវបានគេស្គាល់ថា ស្និទនឹងតួកគី ព្រមទាំងក្រុមភាតរៈអ៊ីស្លាម។
លោក Wolfram Lacher អ្នកស្រាវជ្រាវនៅវិទ្យាស្ថានសិក្សាកិច្ចការអន្តរជាតិ និងសន្តិសុខ នៅប្រទេសអាល្លឺម៉ង់ បានលើកឡើងថា គេសង្ឃឹមតិចណាស់ ថារដ្ឋាភិបាលបណ្តោះអាសន្នថ្មីរបស់លីប៊ីនេះ នឹងអាចប្រមូលផ្តុំការគាំទ្រ ពីគ្រប់ក្រុមនយោបាយនិងក្រុមប្រដាប់អាវុធ។ យ៉ាងណាមិញ មានមនុស្សមួយចំនួន បានលើកឡើងផងដែរ ថាគម្រោងចង់រៀបចំការបោះឆ្នោតនៅខែធ្នូ គឺមិនអាចធ្វើទៅបានទេ។ តែយ៉ាងណាគេសង្ឃឹមថា ដំណឹងល្អនៃការរៀបចំរដ្ឋាភិបាលអន្តរកាលថ្មីនេះ នឹងមិនធ្វើឲ្យប្រជាជនលីប៊ី ខកបំណងម្តងទៀតទៅចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ