ឆ្នាំ២០២១ កុមារអាយុក្រោម៥ឆ្នាំ ចំនួនពាក់កណ្តាលនៅយេម៉ែន នឹងខ្វះអាហារូបត្ថម្ភ
នៅក្នុងឆ្នាំ២០២១នេះ កុមារអាយុក្រោម៥ឆ្នាំ ចំនួនយ៉ាងហោចពាក់កណ្តាល នៅប្រទេសយេម៉ែន នឹងប្រឈមនូវកង្វះអាហារូបត្ថម្ភធ្ងន់ធ្ងរ។ នេះគឺជាសារអំពាវនាវ របស់អង្គការសហប្រជាជាតិ ខណៈដែលសង្រ្គាមរ៉ាំរ៉ៃ នៅតែបន្តយាយីប្រទេសយេម៉ែន ហើយដែលវាធ្វើឲ្យ ការផ្តល់ជំនួយមនុស្សធម៌ ត្រូវជួបឧបសគ្គច្រើនបំផុត។
ចុះផ្សាយនៅថ្ងៃ៖
ស្តាប់ - ០២:៣៤
សង្រ្គាមនៅយេម៉ែន មិនមែនត្រឹមតែបានផ្តាច់ជីវិតប្រជាជនស្លូតត្រង់ រាប់ម៉ឺននាក់ប៉ុណ្ណោះទេ តែវាកំពុងតែនាំកុមារយេម៉ែន ឲ្យធ្វើដំណើរទៅកាន់មាន់ជ្រោះនៃសេចក្តីស្លាប់។ កុមារអាយុក្រោម៥ឆ្នាំ ចំនួនពាក់កណ្តាលនៅទូទាំងយេម៉ែន កំពុងប្រឈមនឹងបញ្ហាកង្វះអាហារូបត្ថម្ភ ដែលចាំបាច់ដល់ការរីកធំធាត់។ នេះគឺជាការសន្និដ្ឋានរួមគ្នា របស់អង្គការចំណីស្បៀងអាហារនិងកសិកម្ម FAO អង្គការ Unicef និងកម្មវិធីស្បៀងអាហារពិភពលោក PAM។
យោងតាមភ្នាក់ងារមនុស្សធម៌ នៃអង្គការសហប្រជាជាតិទាំងនេះ មានកុមារអាយុក្រោម៥ឆ្នាំ ប្រមាណ២លាន៣សែននាក់ នៅយេម៉ែន ដែលគ្មានចំណីអាហារគ្រប់គ្រាន់។ ហើយក្នុងចំណោមនេះ មានកុមារប្រមាណ៤សែននាក់ ដែលស្ថិតក្នុងស្ថានភាពគ្រោះថ្នាក់បំផុត ហើយអាចប្រឈមនឹងការស្លាប់បាត់បង់ជីវិត ប្រសិនបើគ្មានការសង្គ្រោះបន្ទាន់ទេនោះ។ តួលេខទាំងនេះ បង្ហាញថា ក្នុងឆ្នាំ២០២១ កុមារដែលជួបបញ្ហាកង្វះអាហារូបត្ថម្ភ គឺបានកើនឡើងចំនួន២២% បើប្រៀបធៀបទៅឆ្នាំមុន។ បន្ថែមពីនេះទៀត ស្ត្រីពរពោះ និងកំពុងបំបៅកូន ប្រមាណ១លាន២សែននាក់ នៅយេម៉ែន ក៏កំពុងប្រឈមនឹងកង្វះអាហារូបត្ថម្ភគ្រប់គ្រាន់ដែរ។
លោកស្រី Henrietta Fore អគ្គនាយកអង្គការ Unicef បានលើកឡើងថា អង្គការមនុស្សធម៌ទាំងអស់ ត្រូវការសុវត្ថិភាព និងច្រកផ្លូវ ដើម្បីដឹកជញ្ជូនស្បៀង ព្រមទាំងរៀបចំផែនការបែងចែងស្បៀង ឲ្យបានទៀងទាត់បំផុតនៅយេម៉ែន ព្រោះថាការយឺតយ៉ាវពីមួយថ្ងៃទៅមួយថ្ងៃ គឺកុមារយេម៉ែន ដែលត្រូវប្រឈមនឹងមរណៈភាព។
លោក David Beasley នាយកប្រតិបត្តិកម្មវិធីស្បៀងអាហារពិភពលោក បានលើកឡើងថា ដើម្បីបិទបញ្ចប់គ្រោះទុរភិក្ខនៅយេម៉ែន គឺគ្មានដំណោះស្រាយណាផ្សេង ក្រៅពីទំលាក់អាវុធឈប់បាញ់ ហើយបើកផ្លូវឲ្យមានការដឹកជំនួយស្បៀងអាហារ។ ដូចគ្នាដែរ លោក Luca Russo មន្ត្រីអង្គការ FAO បានលើកឡើងថា សង្រ្គាមរ៉ាំរ៉ៃនៅយេម៉ែន ប្រមាណ៥ឆ្នាំមកនេះ បានរុញច្រានប្រទេសនេះ ឲ្យធ្លាក់ទៅក្នុងវិបត្តិមនុស្សធម៌ ដ៏ធ្ងន់ធ្ងរបំផុត។
រហូតមកទល់ពេលនេះ គឺគ្មានយន្តការដំណោះស្រាយណាមួយ ដែលអាចជំរុញឲ្យភាគីជម្លោះ នៅយេម៉ែនព្រមចរចាគ្នាទេ។ ជាងនេះទៀត ក្រុមឧទ្ទាមហ៊ូទី បានបន្ថែមការវាយប្រហារបាញ់ផ្លោងកាន់តែខ្លាំងទៅលើអារ៉ាប៊ីសាអូឌីត ដែលនេះមានន័យថា កងទ័ពអារ៉ាប៊ីសាអូឌីត អាចនឹងបន្ថែមការវាយសកសិកវិញ ក្នុងពេលដ៏ឆាប់ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ