ជនអន្តោប្រវេសន៍ជាង២០០នាក់ត្រូវគេសង្គ្រោះបាន ក្នុងសមុទ្រលីប៊ី រវាងថ្ងៃទី២៧និង២៨កុម្ភៈ
យ៉ាងហោចណាស់ មានជនភៀសខ្លួនអាហ្វ្រិក ចំនួនជិត១០០នាក់ ដែលត្រូវបានឆ្មាំសមុទ្រលីប៊ី សង្គ្រោះបាន កាលពីថ្ងៃអាទិត្យទី២៨កុម្ភៈម្សិលមិញ ខណៈដែលពួកគេកំពុងព្យាយាមជិះទូកឆ្លងទៅអឺរ៉ុប។ ជនភៀសខ្លួនប្រមាណជាង២០នាក់កំពុងស្ថិតក្នុងការបាត់ខ្លួន។ ចំណែក កាលពីថ្ងសៅរ៍ទី ២៧កុម្ភៈ នាវាអង្គការមនុស្សធម៌អាល្លឺម៉ង់មួយ បានសង្គ្រោះបានជនភៀសខ្លួន ចំនួន១៤៧នាក់។
ចុះផ្សាយនៅថ្ងៃ៖
ស្តាប់ - ០២:១៩
ផ្អែកតាមប្រភពពី អង្គការអន្តរជាតិដើម្បីជនអន្តោប្រវេសន៍ (OIM) បានឲ្យដឹងថា ក្រុមឆ្មាំសមុទ្រលីប៊ី បានស្រង់ជនអន្តោប្រវេសន៍ នៅក្នុងសមុទ្រម៉េឌីទែរ៉ាណេ បានចំនួនជិត១០០នាក់ នៅថ្ងៃទី ២៨កុម្ភៈ។ ឆ្មាំសមុទ្រលីប៊ី បានបញ្ជូនពួកគេ យកទៅទុកទៅទុក នៅមូលដ្ឋានកងទ័ពជើងទឹក ក្រុងទ្រីប៉ូលី ខណៈដែលមានមនុស្ស ជាង២០នាក់ផ្សេងទៀត ស្ថិតក្នុងការបាត់ខ្លួន។
យោងតាមប្រភពដដែល ជនអន្តោប្រវេសន៍ដែលគេសង្គ្រោះបាន គឺភាគច្រើនជាប្រជាជនអាហ្វ្រិក មកពីប្រទេស កាម៉េរូន ប្រទេសស៊ូដង់ និង ប្រទេសម៉ាលី ដែលក្នុងនោះមានស្ត្រី៦នាក់ និងកុមារ២នាក់។
ដោយឡែក កាលពីថ្ងៃសៅរ៍ទី២៧កុម្ភៈ នាវារបស់អង្គការ Sea-Watch បានស្រង់ជនអន្តោប្រវេសនន៍ នៅក្នុងសមុទ្រ មិនឆ្ងាយប៉ុន្មានពីឆ្នេរលីប៊ី បានចំនួន១៤៧នាក់។ ហើយកាលពីថ្ងៃសុក្រវិញ នាវារបស់អង្គការដដែលនេះ បានសង្គ្រោះជីវិតជនអន្តោប្រវេសន៍ ចំនួន៤៥នាក់ផ្សេងទៀត។
សូមបញ្ជាក់ថា យោងតាមតួលេខរបស់អង្គការអន្តរជាតិ ដើម្បីជនអន្តោប្រវេសន៍ នៅក្នុងឆ្នាំ២០២០កន្លងទៅ មានជនអន្តោប្រវេសន៍យ៉ាងហោច ១២០០នាក់ បានស្លាប់ នៅក្នុងសមុទ្រម៉េឌីទែរ៉ាណេ។ ក្រៅពីនេះ មានយ៉ាងហោច ៣៧០០នាក់ ត្រូវបានគេសង្គ្រោះបាន ហើយដឹកយកទៅដាក់ក្នុងមណ្ឌលក្នុងប្រទេសលីប៊ី។ យ៉ាងណាមិញ អង្គការមនុស្សធម៌ បានលើកឡើងជាញឹកញាប់ អំពីលក្ខខណ្ឌរស់នៅដ៏លំបាក និងការឃុំឃាំងដោយអមនុស្សធម៌ នៅតាមមណ្ឌលដាក់ជនអន្តោប្រវេសន៍ ក្នុងប្រទេសលីប៊ី។
គួរកត់សំគាល់ថា បើទោះបីជាត្រូវឆ្លងកាត់ការលំបាក ប្រឈមគ្រោះថ្នាក់ដល់ជីវិតយ៉ាងណា ប្រជាជនអាហ្វ្រិកកាន់តែច្រើនឡើង បានសម្រេចចិត្តផ្សងព្រេង ចាកចោលភូមិស្រុក ដើម្បីមកសុំសិទ្ធិជ្រកកោននៅអឺរ៉ុប។ ភាពក្រីក្រខ្លាំង គ្រោះធម្មជាតិ សង្រ្គាមរ៉ាំរ៉ៃ ព្រមទាំងអំពើពុករលួយ នៅតាមប្រទេសពួកគេ គឺជាមូលហេតុដែលធ្វើឲ្យពួកគេ គ្មានសេចក្តីសង្ឃឹមចំពោះអនាគត។ លីប៊ីដែលស្ថិតនៅចំងាយប្រមាណ៣០០គីឡូម៉ែត្រ ពីឆ្នេរសមុទ្រប្រទេសអ៊ីតាលី គឺជាច្រកមួយដ៏សំខាន់។ សង្រ្គាម និងបញ្ហាអសន្តិសុខនៅលីប៊ី ប៉ុន្មានឆ្នាំមកនេះ បានបើកផ្លូវយ៉ាងទូលាយ ឲ្យដល់ក្រុមឈ្មួញទុច្ចរិត ដែលរកស៊ីដឹកជញ្ជូនជនអន្តោប្រវេសន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ