ក្មេងស្រីចំនួនជិត៣០០នាក់ ត្រូវបានដោះលែងមកវិញ នៅភាគពាយ័ព្យនីហ្សេរីយ៉ា
ក្មេងស្រីសិស្សសាលានីស្សេរីយ៉ា ចំនួន២៧៩នាក់ ដែលត្រូវបានក្រុមអន្ធពាលចាប់យកទៅ កាលពីថ្ងៃសុក្រកន្លងទៅ ត្រូវបានដោះលែងមកវិញហើយ កាលពីថ្ងៃអង្គារម្សិលមិញ។ អាជ្ញាធរនីហ្សេរីយ៉ា អះអាងថា មិនបានបង់ប្រាក់ជាថ្នូរនឹងការដោះលែងនេះទេ។ គួរបញ្ជាក់ថា តំបន់ភាគពាយ័ព្យនីហ្សេរីយ៉ា កំពុងស្ថិតនៅក្នុងភាពអសន្តិសុខខ្លាំងបំផុត ដោយសារតែមានក្រុមប្រដាប់អាវុធ និងក្រុមភេរវកម្មអ៊ីស្លាមជ្រុលនិយម ធ្វើសកម្មភាពជាញឹកញាប់។
ចុះផ្សាយនៅថ្ងៃ៖
ស្តាប់ - ០២:១៤
កម្មវិធីអបអរទទួលក្មេងស្រីសិស្សសាលា ចំនួន២៧៩នាក់ ដែលត្រូវបានគេដោះលែងមកវិញ ត្រូវបានគេរៀបចំឡើង យ៉ាងអាធិកអាធម្ម កាលពីថ្ងៃអង្គារទី២មិនា នៅទីតាំងរដ្ឋបាល រដ្ឋ Zamfara ស្ថិតនៅភាគពាយ័ព្យប្រទេសនីហ្សេរីយ៉ា។ លោក Bello Matawalle អភិបាលរដ្ឋនេះ បានអះអាងថា ក្មេងស្រីដែលត្រូវបានដោះលែងមកវិញ ក្នុងយប់ថ្ងៃចន្ទឈានចូលថ្ងៃអង្គារ គឺមានចំនួនគ្រប់ទាំងអស់ ២៧៩នាក់ គ្មានបាត់នរណាម្នាក់ទេ។ ក្មេងស្រីម្នាក់បាននិយាយថា នៅក្នុងពេលចាប់ខ្លួន ពួកក្រុមអន្ធពាល បានបង្ខំឲ្យពួកគេដើរ ជាច្រើនម៉ោង ហើយមានក្មេងស្រីខ្លះ ដើរលែងរួច ត្រូវបានក្មេងស្រីផ្សេងទៀត ជួយសែងផង។
សូមបញ្ជាក់ថា ហេតុការណ៍ចាប់ក្មេងស្រីសិស្សសាលានេះ បានកើតឡើងនៅទីតាំង មណ្ឌលទេវាសិក្ខដ្ឋាន មួយកន្លែង ក្នុងរដ្ឋ Zamfara កាលពីថ្ងៃសុក្រសប្តាហ៍មុន។ អាជ្ញាធរនីហ្សេរីយ៉ា បានហៅក្រុមជនប្រដាប់អាវុធ ដែលធ្វើអំពើនេះ ថាជា « ក្រុមអន្ធពាល »។ យោងតាមការផ្សព្វផ្សាយដំបូង អាជ្ញាធរនីហ្សេរីយ៉ា អះអាងថាមានក្មេងស្រីចំនួន៣១៧នាក់ មានអាយុចន្លោះ ពី ១២ ទៅ ១៦ឆ្នាំ ដែលត្រូវបានគេចាប់ទៅ។
គួរបញ្ជាក់ផងដែរថា នៅតំបន់ភាគខាងជើងប្រទេសនីហ្សេរីយ៉ា ស្ថិតក្នុងភាពអសន្តិសុខយ៉ាងខ្លាំង ខណៈដែលកងទ័ពជាតិនីហ្សេរីយ៉ា គ្មានសមត្ថភាពការពារ។ នៅតំបន់នេះ មានក្រុមភេរវកម្មអ៊ីស្លាមជាច្រើនក្រុម ដូចជាក្រុមជីហាតបូកូហារាំ ចេញធ្វើសកម្មភាព កាប់សម្លាប់ប្រជាជនស្លូតត្រង់។ យ៉ាងណាមិញ កាលពីថ្ងៃអង្គារទី២មីនា ប្រភពជាច្រើនបានអះអាងថា ក្រុមភេរវកម្ម បានវាយប្រហារនៅទីតាំងអង្គការមនុស្សធម៌ ក្នុងនោះមានមន្ទីរពេទ្យមួយផង នៅភាគឥសាន។
បន្ថែមពីនេះ មានក្រុមប្រដាប់អាវុធជាច្រើនក្រុម តែងតែធ្វើសកម្មភាព បំផ្លាញដំណាំ សម្លាប់សត្វចិញ្ចឹម និងចាប់ជំរិតក្មេងស្រីសិស្សសាលា ដើម្បីជាថ្នូរនឹងប្រាក់។ អ្នកជំនាញអន្តរជាតិប្រចាំនៅទីនោះ បានអះអាងថា ការចាប់ជំរិតក្មេងសិស្សសាលា បានក្លាយជាជំនួញដ៏កាក់កប របស់ក្រុមអន្ធពាល។ តំបន់ដែលប្រជាជនប្រមាណ៨០% រស់នៅក្នុងភាពក្រីក្របំផុត មានយុវជន ប្រុសៗជាច្រើននាក់ បានចូលរួមក្នុងក្រុមអន្ធពាលទាំងនេះ។ មានក្មេងស្រីយ៉ាងហោចជាង១០០នាក់ នៅបាត់ខ្លួននៅឡើយ មិនដឹងស្លាប់ឬរស់។ ការចាប់ជំរិតក្មេងស្រីសិស្សសាលា បានធ្វើឲ្យឪពុកម្តាយកាន់តែមិនហ៊ានបញ្ជូនកូនទៅរៀន នៅក្នុងប្រទេសនីហ្សេរីយ៉ា ដែលកម្រិតសិក្សារបស់ក្មេងស្រីមានទាបបំផុតណាស់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ