លីប៊ី៖ នាយករដ្ឋមន្ត្រីថ្មីស្បថចូលកាន់តំណែង ដឹកនាំរដ្ឋាភិបាលបណ្តោះអាសន្ន បង្រួបបង្រួមជាតិ
លោក អាប់ឌែលហាមីដ ដបីបាហ បានស្បថចូលកាន់តំណែងជានាយករដ្ឋមន្ត្រីលីប៊ី កាលពីថ្ងៃចន្ទ ទី១៥មីនា។ រដ្ឋាភិបាលបណ្តោះអាសន្ននេះ មានតួនាទីបង្រួបបង្រួមជាតិលីប៊ី គ្រប់ភាគីទាំងអស់ ហើយឈានទៅរៀបចំការបោះឆ្នោតមួយ នៅចុងឆ្នាំ២០២១នេះ ដើម្បីបិទបញ្ចប់សង្គ្រាមស៊ីវីល ដែលបានយាយីលីប៊ី ប្រមាណ១០ឆ្នាំមកហើយ។
ចុះផ្សាយនៅថ្ងៃ៖
ស្តាប់ - ០២:៣២
កម្មវិធីស្បថចូលកាន់តំណែងរបស់រដ្ឋាភិបាលលីប៊ីថ្មី បានប្រារព្ធធ្វើនៅ ទីតាំងសភាបណ្តោះអាសន្នលីប៊ី ស្ថិតនៅក្រុង Tobrouk ដោយមានវត្តមានលោក Aguila Saleh ប្រធានសភាលីប៊ី និងតំណាងអង្គទូតបរទេសជាច្រើនផងដែរ។ លោក អាប់ឌែលហាមីដ ដបីបាហ (Abdelhamid Dbeibah) នាយករដ្ឋមន្ត្រីថ្មី បានស្បថសច្ចាថា នឹងប្រឹងប្រែងការពារឯកភាពជាតិ សន្តិសុខ និងបូរណភាពដែនដីរបស់លីប៊ី។
តំណាងអង្គទូតនៃសហភាពអឺរ៉ុប លោក Jose Sabadell បានលើកឡើងថា កម្មវិធីនេះ គឺជាសញ្ញានឹងជាសារមួយដ៏សំខាន់ ដើម្បីចាប់ផ្តើមផែនការបង្រួបបង្រួមជាតិលីប៊ី។ ដូចគ្នាដែរ លោក Aguila Saleh ប្រធានសភាលីប៊ី បានលើកឡើងថា ដល់ពេលហើយ ដែលគ្រប់ភាគីត្រូវចាប់ដៃគ្នា។
សូមបញ្ជាក់ថា លោក Abdelhamid Dbeibah មានអាយុ៦១ឆ្នាំ ជាអតីតអ្នកជំនួញមានមុខមាត់ម្នាក់ ត្រូវសមាជិកទាំង៧៥នាក់ នៃក្រុមប្រឹក្សាបង្រួបបង្រួមជាតិលីប៊ី បោះឆ្នោតតែងតាំងឲ្យដឹកនាំរដ្ឋាភិបាលបណ្តោះអាសន្ន កាលពីថ្ងៃទី ៥កុម្ភៈ នៅទីក្រុងហ្សឺណែវ។ បន្ទាប់មក សភាលីប៊ី បានបោះឆ្នោតផ្តល់សេចក្តីទុកចិត្ត កាលពីថ្ងៃពុធកន្លងទៅ។
គួរកត់សំគាល់ថា នេះគឺជាការបោះជំហានទៅមុខ ខ្លាំងបំផុត ក្នុងការផ្សះផ្សាជាតិលីប៊ី បន្ទាប់ពីមានសង្រ្គាមស៊ីវីល ប្រមាណ១០ឆ្នាំមកនេះ។ លីប៊ី ត្រូវពុះចែកជា២ ដោយរដ្ឋាភិបាលខាងកើត ដឹកនាំដោយលោក Abdallah al-Theni សហការជាមួយលោកមេបញ្ជការ Khalifa Haftar រីឯរដ្ឋាភិបាលខាងលិច ដឹកនាំដោយ លោក Fayez al-Sarraj។ រដ្ឋាភិបាលបណ្តោះអាសន្នថ្មី ដឹកនាំដោយ លោក Abdelhamid Dbeibah នឹងមកជំនួស រដ្ឋាភិបាលលីប៊ីទាំង២នេះ។ តែយ៉ាងណា នៅក្នុងកម្មវិធីស្បថចូលកាន់តំណែង កាលពីថ្ងៃចន្ទ ទី១៥មីនា គេពុំឃើញមានវត្តមាន របស់លោក Abdallah al-Theni និងលោក Fayez al-Sarraj ចូលរួមទេ។
កម្មវត្ថុរបស់រដ្ឋាភិបាលបណ្តោះអាសន្ននេះ គឺប្រមូលភាគីនយោបាយទាំងអស់ ឲ្យចូលរួមការបោះឆ្នោតដោយសេរី នៅថ្ងៃទី២៤ ខែធ្នូ ឆ្នាំ២០២១។ លោក Abdelhamid Dbeibah ត្រូវបានគេស្គាល់ថា ជាមនុស្សស្និទនឹងបក្សពួកអតីតមេដឹកនាំផ្តាច់ការ កាដាហ្វ៊ី ហើយមានទំនោរងាកទៅខាងតួកគី។ ថ្វីបើភាគីខាងកើត និងខាងលិច បានចុះកិច្ចព្រមព្រៀងទំលាក់អាវុធ កាលពីខែតុលា ឆ្នាំ២០២០មែន តែការកសាងឯកភាព មិនមែនជាការងាយស្រួលទេ សម្រាប់រដ្ឋាភិបាលបណ្តោះអាសន្ន ដោយសារតែបែងចែកបក្សពួក ក្រុមប្រដាប់អាវុធខុសៗគ្នា ព្រមទាំងបញ្ហាពុករលួយផងដែរ។ ក្រៅពីការស្តារសេដ្ឋកិច្ច នាយករដ្ឋមន្ត្រីថ្មី ក៏ត្រូវតែសម្រេច ឲ្យក្រុមទាហានបរទេសស៊ីឈ្នួល ប្រមាណ២០០០០នាក់ ចាកចេញពីលីប៊ីដែរ ព្រោះនេះជាការទាមទាររបស់អង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ