ប្រធានក្រុមប្រឹក្សាអឺរ៉ុបទៅលីប៊ី ដើម្បីសំដែងការគាំទ្រចំពោះដំណើរការផ្សះផ្សារជាតិ
លោក ស្ហាល មីឈែល ប្រធានក្រុមប្រឹក្សាអឺរ៉ុប បានធ្វើដំណើរទៅក្រុងទ្រីប៉ូលី ប្រទេសលីប៊ី កាលពីថ្ងៃអាទិត្យម្សិលមិញ ដើម្បីបង្ហាញការគាំទ្រ ដល់រដ្ឋាភិបាលបណ្តោះអាសន្នថ្មីលីប៊ី ដឹកនាំដោយលោក នាយករដ្ឋមន្ត្រី អាប់ឌែល ហាមីដ បេបាហ។ រដ្ឋាភិបាលនេះ មានតួនាទីប្រមែរប្រមូលគ្រប់ភាគីនយោបាយលីប៊ី ឲ្យចូលរួមបោះឆ្នោត នៅចុងឆ្នាំ២០២១ ដើម្បីឈានផ្សះផ្សារជាតិ និងកសាងសន្តិភាព។
ចុះផ្សាយនៅថ្ងៃ៖
ស្តាប់ - ០២:៣៧
១០ឆ្នាំមកហើយ ដែលលីប៊ីបានឆ្លងកាត់សង្គ្រាមស៊ីវីល ហែកហួរ បែងចែកបក្សពួក គ្មានរដ្ឋាភិបាលពិតប្រាកដឹកនាំប្រទេស។ ឆ្លងកាត់ការចរចាសម្របសម្រួលដ៏លំបាក ក្រោមគំនិតផ្តួចផ្តើមរបស់អង្គការសហប្រជាជាតិ រដ្ឋាភិបាលបណ្តោះអាសន្នមួយ ត្រូវបានបង្កើតឡើង នៅខែកុម្ភៈ ដោយមានលោក អាប់ឌែល ហាមីដ បេបាហ (Abdel Hamid Dbeibah) ជានាយករដ្ឋមន្ត្រី។ រដ្ឋាភិបាលនេះ មានភារៈកិច្ចស្តារស្ថិរភាព សន្តិសុខជាតិ និងរៀបចំការបោះឆ្នោតសេរីមួយ នៅខែធ្នូខាងមុខ ដោយមានការចូលរួម ពីគ្រប់ភាគីលីប៊ីទាំងអស់ ទាំងក្រុមខាងកើត និងក្រុមខាងលិច។
នៅថ្ងៃអាទិត្យទី ៤មេសា លោក ស្ហាល មីឈែល (Charles Michel) ប្រធានក្រុមប្រឹក្សាអឺរ៉ុប ដែលបានទៅដល់ក្រុងទ្រីប៉ូលី ជាលើកដំបូងបង្អស់ បានប្រកាសថា សហភាពអឺរ៉ុប នឹងប្រឹងប្រែងសហការធ្វើការជាមួយរដ្ឋាភិបាលបណ្តោះអាសន្ននេះ ឲ្យអស់ពីចិត្ត។ លោកបន្ថែមថា ការផ្តល់សន្ទុះស្តារសេដ្ឋកិច្ចលីប៊ី ការរៀបចំការបោះឆ្នោត និងការប្រយុទ្ធប្រឆាំង នឹងបណ្តាញឧក្រិដ្ឋកម្មដឹកជញ្ជូនជនភៀសខ្លួន ទាំងអស់នេះ គឺជាបញ្ហា ដែលសហភាពអឺរ៉ុបផ្តោតការយកចិត្តទុកដាក់ ចង់ជួយលីប៊ីបំផុត។
នៅក្រោយការចូលកាន់តំណែងរបស់រដ្ឋាភិបាលបណ្តោះអាសន្នលីប៊ី ប្រទេសអឺរ៉ុបមួយចំនួនធំ មានបារាំង អាល្លឺម៉ង់ អ៊ីតាលី ក្រិកជាដើម បានចាប់ផ្តើមបើកស្ថានទូតឡើងវិញ។ យ៉ាងណាមិញ លោកប្រធានក្រុមប្រឹក្សាអឺរ៉ុប បានបញ្ជាក់ថា ក្នុងរវាងប៉ុន្មានសប្តាហ៍ខាងមុខ សហភាពអឺរ៉ុបនឹងរៀបចំតែងតាំងឯកអគ្គរដ្ឋទូតថ្មីម្នាក់ ប្រចាំនៅលីប៊ី។
សូមបញ្ជាក់ថា លីប៊ី គឺជាច្រកផ្លូវដ៏សំខាន់ ក្នុងដំណើរឆ្លងកាត់របស់ជនភៀសខ្លួន ដែលធ្វើដំណើរមកពីអាហ្វ្រិក ឆ្លងសមុទ្រម៉េឌីទែរ៉ាណេ ចូលដីអឺរ៉ុប។ ដោយសារតែបញ្ហាអសន្តិសុខ និងគ្មានអាជ្ញាធរច្បាស់លាស់នៅលីប៊ី ក្រុមជនទុច្ចរិតបានឆ្លៀតឱកាស ធ្វើសកម្មភាពនេះ យ៉ាងបើកចំហរ។ ការជួយជ្រោមជ្រែង ស្តារស្ថិរភាពនយោបាយ និងសន្តិសុខនៅលីប៊ី គឺជាដំណោះស្រាយមួយដ៏សំខាន់ ក្នុងការទប់ជនអន្តោប្រវេសន៍ខុសច្បាប់ កុំឲ្យឆ្លងទូកចូលអឺរ៉ុប។
យ៉ាងណាក៏ដោយ សំរាប់ពេលនេះសំណុំរឿងដ៏រសើបមួយនៅលីប៊ី គឺនៅតែមិនទាន់អាចដោះស្រាយបាននៅឡើយ គឺវត្តមានរបស់កងកម្លាំងបរទេស ដែលគេបញ្ជូនពីប្រទេសក្រៅ មកជួយប្រយុទ្ធភាគីលីប៊ីម្ខាងៗ។ យោងតាមអង្គការសហប្រជាជាតិ នៅរវាងខែធ្នូ ឆ្នាំ២០២០នៅលីប៊ី គឺមានកម្លាំងប្រយុទ្ធបរទេសស៊ីឈ្នួល ចំនួនប្រមាណ២ម៉ឺននាក់។ លោកស្រី Najla al-Mangoush រដ្ឋមន្ត្រីការបរទេសលីប៊ីថ្មី បានអំពាវនាវជាថ្មីម្តងទៀត កាលពីថ្ងៃអាទិត្យទី៤មេសា ថាត្រូវតែដក កម្លាំងប្រយុទ្ធបរទេសទាំងនេះ ចេញឲ្យអស់ពីលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ