៤៨ម៉ោងចុងក្រោយ ឆ្មាំសមុទ្រលីប៊ីសង្គ្រោះបានជនអន្តោប្រវេសន៍ឆ្លងទូកទៅអឺរ៉ុប ចំនួនជាង៦០០នាក់
ជនអន្តោប្រវេសន៍ ដែលឆ្លងទូកតាមសមុទ្រម៉េឌីទែរ៉ាណេ ចូលទៅកាន់ទឹកដីអឺរ៉ុប នៅតែមានឥតដាច់ បើទោះបីជាត្រូវផ្សងគ្រោះថ្នាក់យ៉ាងណាក៏ដោយ។ យោងតាមការឲ្យដឹង ពីឆ្មាំសមុទ្រលីប៊ី គឺនៅរវាងថ្ងៃសុក្រទី៣០មេសា និង ថ្ងៃអាតិទ្យទី២ឧសភា គេបានឃាត់សង្គ្រោះបានជនអន្តោប្រវេសន៍ ចំនួនជាង៦០០នាក់។ ដែលឡែក កាលពីថ្ងៃទី២២មេសា ជនអន្តោប្រវេសន៍ចំនួនប្រមាណ១៣០នាក់ បានលេចទូកក្នុងសមុទ្រ ដោយក្រុមសង្គ្រោះ មិនអាចទៅជួយទាន់ពេលវេលា។
ចុះផ្សាយនៅថ្ងៃ៖
ស្តាប់ - ០២:២៥
ចន្លោះពីថ្ងៃសុក្រ ដល់ថ្ងៃអាទិត្យចុងសប្តាហ៍កន្លងទៅនេះ ក្រុមឆ្មាំសមុទ្រលីប៊ី បានឃាត់សង្គ្រោះបានជនអន្តោប្រវេសន៍ឆ្លងទូក ចំនួន៣ក្រុមផ្សេងគ្នា។ ក្រុមទីមួយមានមនុស្ស ១៣២នាក់ ក្រុមទី២មានមនុស្ស១៧២នាក់ និងក្រុមទី៣ មានមនុស្ស៣៣៤នាក់ ភាគច្រើនសុទ្ធតែជាប្រជាជនមកពីទ្វីបអាហ្វ្រិក។
ជនអន្តោប្រវេសន៍ទាំងនេះ ត្រូវបានក្រុមឆ្មាំសមុទ្រលីប៊ី បញ្ជូនយកទៅអង្គភាពប្រយុទ្ធប្រឆាំងនឹងអន្តោប្រវេសន៍ខុសច្បាប់ របស់ក្រសួងមហាផ្ទៃលីប៊ី។ អង្គការអន្តរជាតិដើម្បីជនភៀសខ្លួន (OIM) បានបញ្ជាក់ឲ្យដឹង ថា៤៨ម៉ោងចុងក្រោយនេះ គេពិតជាបានបញ្ជូនជំនួយសង្គ្រោះបន្ទាន់ ជួយដល់ ជនអន្តោប្រវេសន៍ជាង៦០០នាក់ នៅលីប៊ី។
គួរបញ្ជាក់ថា លីប៊ី គឺច្រកដ៏សំខាន់ ក្នុងការធ្វើដំណើររបស់ជនភៀសខ្លួន ជនអន្តោប្រវេសន៍ ដែលមានបំណងចូលទៅសុំសិទ្ធិជ្រកកោននៅអឺរ៉ុប។ កោះប្រទេសអ៊ីតាលី ស្ថិតនៅចំងាយតែប្រមាណជាង៣០០គីឡូម៉ែត្រប៉ុណ្ណោះ ពីឆ្នេរលីប៊ី។ ក្រុមឈ្មួញទុច្ចរិត រកស៊ីដឹកជញ្ជូនជនអន្តោប្រវេសន៍ឆ្លងសមុទ្រ ដោយប្រើទូកពោងតូចៗ ដាក់មនុស្សពេញៗ ប្រថុយនឹងគ្រោះថ្នាក់បំផុត។
កាលពីថ្ងៃសៅរ៍ទៅ១ឧសភា នាវា Ocean Viking របស់អង្គការ SOS Méditerranée បានដឹកជនអន្តោប្រវេសន៍ចំនួន ២៣៦នាក់ ទៅដាក់នៅលើកោះSicile របស់អ៊ីតាលី។ អង្គការនេះបានអះអាងថា អ្វីដែលគេសង្កេតឃើញ គឺក្នុងចំណោមជនអន្តោប្រវេសន៍ដែលឆ្លងទូក គឺមានកុមារ និងអនីតិជនកាន់តែច្រើនឡើង ហើយធ្វើដំណើរតែម្នាក់ឯង ដោយគ្មានក្រុមគ្រួសារមកជាមួយទេ។
យោងតាមអង្គការ SOS Méditerranée ដែលតែងតែជួយសង្គ្រោះជនអន្តោប្រវេសន៍ បានអះអាងថា គិតពីដើមឆ្នាំ២០២១នេះមក មានជនអន្តោប្រវេសន៍ ចំនួន៤៥៣នាក់ បានស្លាប់បាត់ខ្លួនក្នុងសមុទ្រ។ កាលពីថ្ងៃទី២២មេសា ទូកដឹកជនអន្តោប្រវេសន៍មួយ មានមនុស្សប្រមាណ១៣០នាក់ បានលិចក្នុងសមុទ្រ ដោយក្រុមសង្គ្រោះទៅជួយមិនទាន់។ លោកស្រី Sophie Beau អគ្គនាយកអង្គការ SOS Méditerranée បានអំពាវនាវ សុំឲ្យប្រទេសសហភាពអឺរ៉ុប សហការគ្នា បង្កើនអន្តរាគមន៍នាវាល្បាត ឲ្យបានច្រើន និងចែកចាយដំណឹងគ្នា ជាមួយនាវាអង្គការ និងនាវាដឹកទំនិញឯកជន ដើម្បីធ្វើយ៉ាងណា ជួយសង្គ្រោះជនអន្តោប្រវេសន៍ ឲ្យបានទាន់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ