រដ្ឋប្រហារនៅហ្គីណេ ប្រធានាធិបតីត្រូវបានចាប់ខ្លួន
កងកម្លាំងពិសេសហ្គីណេ បានដឹកនាំធ្វើរដ្ឋប្រហារ និងចាប់ខ្លួនប្រធានាធិបតីហ្គីណេលោក អាល់ហ្វា កុងដេ Alpha Condéនៅថ្ងៃអាទិត្យទី ៥កញ្ញា២០២១។ បើតាមក្រុមយោធា លោកប្រធានាធិបតីវ័យ៨៣ឆ្នាំ មានសុខភាពល្អ។ ប៉ុន្តែក្រៅពីរូបភាពនិងវីដេអូបង្ហោះផ្សាយតាមប្រព័ន្ធសង្គម គេគ្មានដំណឹងពីលោក អាល់ហ្វាកុងដេ។ លោក កុងដេ ជាអ្នកនយោបាយដ៏សំខាន់មួយរបស់ហ្គីណេ តាំងពីកន្លះសតវត្សរ៍មកហើយ។ លោកទើបបានជាប់ឆ្នោតអាណត្តិទីបី បន្ទាប់ពីបានគ្រប់គ្រងប្រទេសអស់១១ឆ្នាំ។ រដ្ឋប្រហារទម្លាក់លោកនៅពេលនេះ ត្រូវបានថ្កោលទោសយ៉ាងខ្លាំងពីសំណាក់សហគមន៍អន្តរជាតិ។
ចុះផ្សាយនៅថ្ងៃ៖
ស្តាប់ - ០២:២១
ទោះបីមានស្នូរកាំភ្លើងស្វ័យប្រវត្តិលាន់ឮខ្លាំងកណ្តាលរដ្ឋធានីមែន ប៉ុន្តែរដ្ឋប្រហារបានប្រព្រឹត្តទៅដោយគ្មានការបង្ហូរឈាមទេ។ គ្មានពលរដ្ឋស៊ីវិលណាម្នាក់ត្រូវស្លាប់ឬរងរបួសឡើយ។
វរសេនីយ៍ ម៉ាម៉ាឌី ឌូមប៊ូយ៉ា Mamady Doumbouya ដែលជាអ្នកដឹកនាំធ្វើរដ្ឋប្រហារ ក្នុងនាមគណៈកម្មការជាតិប្រមូលផ្តុំនិងអភិវឌ្ឍន៍ បានប្រកាសដាក់បម្រាមគោរចទូទាំងប្រទេស និងបិទព្រំដែន ព្រមទាំង រំលាយរដ្ឋធម្មនុញ្ញ រដ្ឋាភិបាល ដោយសន្យាពិគ្រោះពិចារណាក្នុងអត្ថន័យរួបរួមគ្នានាំប្រទេសឆ្លងអន្តរកាលដោយសន្តិវិធី។ ក្រុមយោធាដឹកនាំធ្វើរដ្ឋប្រហារបានបញ្ជាក់ថា លោកប្រធានាធិបតី អាល់ហ្វា កុងដេ ស្ថិតក្នុងកណ្តាប់ដៃពួកគេ និងមានសុខភាពល្អទេ តែនៅក្នុងវីដេអូ លោកកុងដេ មិនឆ្លើយនឹងសំណួររបស់ទាហានបិទមុខម្នាក់ថាលោកមិនបានរងទារុណកម្ម និងអំពើហិង្សាទេ។
តើជោគវាសនារបស់លោកប្រធានាធិបតី នឹងក្លាយទៅជាយ៉ាងណា ? លោកអាចនឹងបន្តមានតួនាទីនយោបាយនៅហ្គីណេទៀតឬយ៉ាងណា ? ឬក៏ត្រូវក្រុមយោធាដោះលែង រួចចាកចេញទៅបរទេស ដូចមេដឹកនាំប្រទេសជាច្រើនផ្សេងទៀតដែលគេបណ្តេញពីអំណាច ? ទាំងនេះសុទ្ធតែជាសំណួរដែលពុំទាន់មានចម្លើយ។ ជាមួយនឹងការថ្កោលទោសការធ្វើរដ្ឋប្រហារទម្លាក់ សហភាពអាហ្វ្រិក អង្គការសហប្រជាជាតិ បានទាមទារជាឯកច្ឆ័ន្ទឱ្យក្រុមយោធាដោះលែងនិងគោរពភាពថ្លៃថ្នូរ លោកប្រធានាធិបតី កុងដេ ដោយគ្មានលក្ខខណ្ឌ។
សូមបញ្ជាក់ថាលោក អាល់ហ្វា កុងដេ ជាអ្នកនយោបាយដ៏សំខាន់ម្នាក់ របស់ហ្គីណេ នាកន្លះសតវត្សរ៍ចុងក្រោយនេះ។ នៅឆ្នាំ១៩៦០ និងនៅជានិស្សិតសិក្សានាទីក្រុងប៉ារីសនៅឡើយ លោកបានបង្កើតចលនាប្រឆាំងនឹងរបបផ្តាច់ការហ្គីណេ Sekou Touré ដែលបានកាត់ទោសប្រហារជីវិតលោកដោយកំបាំងមុខ។ មេដឹកនាំផ្តាច់ការTouréស្លាប់ ហ្គីណេចាប់ដើរតាមគន្លងប្រជាធិបតេយ្យ លោក កុងដេ បានត្រលប់ចូលប្រទេសវិញ និងបានបង្កើតបក្សនយោបាយ តែត្រូវបរាជ័យក្នុងសម័យបោះឆ្នោតប្រធានាធិបតីឆ្នាំ១៩៩៣-១៩៩៨ រួចត្រូវប្រធានាធិបតីឈ្នះឆ្នោតចាប់ដាក់ពន្ធនាគារ មុននឹងដោះលែងវិញក្រោមសម្ពាធអន្តរជាតិ។ គេត្រូវរង់ចាំទាល់តែមានរដ្ឋប្រហារឆ្នាំ២០០៨ ទើបលោកកុងដេ បានឡើងកាន់អំណាចដឹកនាំប្រទេស នៅឆ្នាំ២០១០ តាមរយៈការបោះឆ្នោតដ៏ចម្រូងចម្រាស។ ក្នុងរយៈពេល១០ឆ្នាំនៃអំណាច លោក កុងដេ ជួនឯកា ជួនផ្តាច់ការ បើគ្រប់ល្បិចដើម្បីរក្សាតំណែងកំពូល រហូតប្រជាពលរដ្ឋងើបតវ៉ាប្រឆាំង និងបន្ទោសលោក លួចបន្លំសន្លឹកឆ្នោតនិងរដ្ឋធម្មនុញ្ញ ដើម្បីបានជាប់ឆ្នោតជាលើកអាណត្តិទីបី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ