មេដឹកនាំយោធាស៊ូដង់សន្យាធ្វើកំណែទម្រង់ក្នុងជួរកងទ័ព
ឧត្តមសេនីយ៍ អាប់ឌែល ហ្វាតា អាល់បួរ៉ាន ប្រធានក្រុមប្រឹក្សាអធិបតេយ្យស៊ូដង់ នៅថ្ងៃអាទិត្យ ទី២៦ កញ្ញា បានសន្យាថានឹងធ្វើកំណែទម្រង់ក្នុងជួរកងទ័ព។ ការប្រកាសនេះធ្លាក់មកនៅប៉ុន្មានថ្ងៃបន្ទាប់ពីអាជ្ញាធរស៊ូដង់និយាយថាខ្លួនបានរារាំងការប៉ុនប៉ងធ្វើរដ្ឋប្រហារមួយ។
ចុះផ្សាយនៅថ្ងៃ៖
ស្តាប់ - ០២:៣០
នៅឯពិធីបើកសម្ពោធមន្ទីរពេទ្យយោធាមួយក្នុងទីក្រុងខាទុំ ប្រធានក្រុមប្រឹក្សាយោធាដែលកំពុងកាន់អំណាចនៅស៊ូដង់លោកអាល់បួរ៉ាន បានប្រកាសថានឹងរៀបចំពង្រឹងកម្លាំងទ័ពឡើងវិញ ...រាល់សកម្មភាពបក្សពួកនិយមត្រូវតែហាមឃាត់នៅក្នុងជួរកងទ័ព។ ហើយកងកម្លាំងប្រដាប់អាវុធត្រូវតែប្តេជ្ញារៀបចំការបោះឆ្នោតទៅតាមកាលបរិច្ឆេទដែលបានកំណត់នៅឆ្នាំ ២០២៣ ខាងមុខដែលជាវេលាបញ្ចប់សម័យអន្តរកាល។
គួរបញ្ជាក់ថា ប្រទេសស៊ូដង់សព្វថ្ងៃនេះដឹកនាំដោយរដ្ឋបាលស៊ីវិលនិងយោធា។ រដ្ឋាភិបាលនេះបានប្រសូតឡើងក្រោមកិច្ចព្រមព្រៀងចែករំលែកអំណាចគ្នាកាលពីខែសីហា ឆ្នាំ ២០១៩ រវាងយោធា និងសម្ព័ន្ធបក្សប្រឆាំងដ៏ធំរបស់ស៊ូដង់ ក្រោយរដ្ឋប្រហារទម្លាក់ប្រធានាធិបតី អូម៉ា អាល់បាស្ហៀរ កាលពីខែមេសា ឆ្នាំ ២០២១៩ដដែលនោះ។ ក្រុមស៊ីវិលនិងក្រុមយោធាត្រូវកាន់ដៃគ្នាដឹកនាំស៊ូដង់ក្នុងសម័យអន្តរកាលមុននឹងរៀបចំការបោះឆ្នោតជាផ្លូវការ។
រដ្ឋាភិបាលស៊ូដង់បាននិយាយថាខ្លួនបានរារាំងការប៉ុនប៉ងធ្វើរដ្ឋប្រហារមួយកាលថ្ងៃទី ២១ ខែកញ្ញា ឆ្នាំ២០២១។ អ្នកដែលជាប់ពាក់ព័ន្ធរដ្ឋប្រហារនេះរួមមានមន្រ្តីយោធា និងជនស៊ីវិលដែលស្មោះស័្មគ្រនឹងលោកអាល់បាស្ហៀរដែលបច្ចុប្បន្នកំពុងជាប់ពន្ធនាគារ។ យ៉ាងហោចណាស់មន្រ្តីចំនួន ១១ នាក់ ស្ថិតក្នុងចំណោមជនដែលត្រូវបានចាប់ខ្លួន។
នាយករដ្ឋមន្ត្រីស៊ូដង់ លោក អាប់ដាឡា ហមដុក (Abdalla Hamdok) បានអំពាវនាវឲ្យមានការធ្វើកំណែទម្រង់នៅក្នុងជួរកងទ័ពដែលជាបញ្ហារសើបខ្លាំងនៅក្នុងប្រទេស។ ការផ្ទេរអំណាចឲ្យរដ្ឋាភិបាលស៊ីវិលគ្រប់គ្រងទាំងស្រុង ត្រូវគេមើលឃើញថានៅតែជួបឧបសគ្គច្រើនក្នុងប្រទេសស៊ូដង់ដោយសារការបែកបាក់គ្នាក្នុងចំណោមមន្ត្រីរដ្ឋាភិបាល វិបត្តិសេដ្ឋកិច្ចធ្ងន់ធ្ងរ និងតួនាទីរបស់មេដឹកនាំស៊ីវិលដែលកាន់តែថយធ្លាក់ចុះ។
ក្រោយមានការប៉ុនប៉ងធ្វើរដ្ឋប្រហារ ថ្នាក់ដឹកនាំយោធាបានស្តីបន្ទោសអ្នកនយោបាយស៊ូដង់ និងថាពួកគេគឺជាបុព្វហេតុចំបងជំរុញឲ្យមានការធ្វើរដ្ឋប្រហារ ពីព្រោះពួកគេមិនបានយកចិត្តទុកដាក់ពីប្រជាជន ប៉ុន្តែគិតតែពីខ្វល់រឿងប្រយុទ្ធប្រឆាំងគ្នាដើម្បីអាចបន្តកាន់អំណាចទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ