WFP ព្រមានពីគ្រោះទុរភិក្សសម្រាប់ប្រជាជនកេនយ៉ា ជាង ២លាននាក់
បន្ទាប់ពីគ្រោះទឹកជំនន់ ប្រជាជនកេនយ៉ាកំពុងរងគ្រោះ ដោយសារ ភាពរាំងស្ងួត ហួតហែង។ ក្នុងកាលៈទេសៈ ដែលប្រទេសកំពុងជួបវិបត្តិកូវីដរួចទៅហើយនោះ គ្រោះធម្មជាតិផ្ទួនៗ កំពុង រុញច្រានប្រជាជនកេនយ៉ាឲ្យធ្លាក់ក្នុងគ្រោះអត់ឃ្លាន។ នៅថ្ងៃសុក្រ មន្រ្តីកម្មវិធីស្បៀងអាហារពិភពលោករបស់អង្គការសហប្រជាជាតិ ប្រចាំប្រទេសកេនយ៉ា បានទាញសញ្ញាអាសន្ន ពីអសន្តិសុខស្បៀងធ្ងន់ធ្ងរ សម្រាប់ប្រជាជនកេនយ៉ា ជាង ២លាន ៤សែននាក់។
ចុះផ្សាយនៅថ្ងៃ៖
ស្តាប់ - ០២:៤៦
ទុក្ខជាន់លើទុក្ខ។ គ្រោះរាំងស្ងួត ជាបន្តបន្ទាប់គ្នា តាំងពីចុងឆ្នាំ ២០២០មក បានធ្វើឲ្យប្រជាជនកេនយ៉ា ជាង២លាននាក់ធ្លាក់ខ្លួន ជួប គ្រោះអត់ឃ្លាន។ ដោយសារភាពរាំងស្ងួតក្នុងរយៈពេលវែង ប្រធានាធិបតីកេនយ៉ា លោក Uhuru Kenyatta បានប្រកាសដាក់ប្រទេសក្នុងស្ថានភាពរងគ្រោះមហន្តរាយធម្មជាតិ កាលពីថ្ងៃទី ៨កញ្ញាកន្លងទៅ។ កាលណោះអាជ្ញាធរជាតិគ្រប់គ្រងគ្រោះរាំងស្ងួតបានវាយតម្លៃថា ប្រជាជនកេនយ៉ាប្រមាណ ២លាន ១សែននាក់ ជួបគ្រោះអត់ឃ្លាន។ សម្រាប់ កម្មវិធីស្បៀងអាហារពិភពលោក ចាប់ពីខែវិច្ឆិកាខាងមុខ ប្រជាជនកេនយ៉ាដែលត្រូវជួបគ្រោះទុរភិក្ស នឹងកើនឡើង ដល់ចំនួន២លាន ៤សែននាក់។
តាមកម្មវិធីស្បៀងអាហារពិភពលោក នៅកេនយ៉ា ចំនួនប្រជាជនជួបគ្រោះអត់ឃ្លាន បានកើនឡើង ៣ដង បើប្រៀបធៀបនឹងរយៈពេលដូចគ្នា កាលពីឆ្នាំមុន។ ពីខែតុលា ដល់ ខែ វិច្ឆិកា ឆ្នាំ ២០២០ មានប្រជាជនកេនយ៉ា ជាង ៨សែន ៥ម៉ឺននាក់ ដែលជួបគ្រោះដាច់ស្បៀងអាហារធ្ងន់ធ្ងរ។
ប៉ុន្មានឆ្នាំមកហើយ តំបន់ភាគខាងកើតកេនយ៉ា ជួបគ្រោះរាំងស្ងួត ធ្ងន់ធ្ងរ។ តាំងពីចុងឆ្នាំ ២០២០ ទឹកភ្លៀងធ្លាក់មិនគ្រប់គ្រាន់ ដែលជាហេតុធ្វើឲ្យប្រជាជនខកខានមិនបានធ្វើដំណាំ ប្រមូលផល អស់ជាច្រើនរដូវ។ គ្រោះរាំងស្ងួតកើតឡើងនៅក្រោយ មួយភាគនៃទឹកដីខាងកើតរបស់កេនយ៉ាធ្លាប់រងគ្រោះ ដោយសារការរាតត្បាតនៃហ្វូងសត្វកណ្តូបចង្រៃ កាលពីចុងឆ្នាំ ២០១៩។ គេបារម្ភថា គ្រោះរាំងស្ងួតនឹងអាចអូសបន្លាយយូរតទៅទៀត ព្រោះថា រដូវភ្លៀង ចាប់ពីខែតុលា នឹងមិនអាចផ្តល់ទឹកភ្លៀងគ្រប់គ្រាន់ដូចមុន។ គេវាយតម្លៃថា ការប្រែប្រួលអាកាសធាតុ ជាដើមហេតុធ្វើឲ្យមានគ្រោះរាំងស្ងួត ភ្លៀងធ្លាក់មិនគ្រប់គ្រាន់ នៅប្រទេសកេនយ៉ា។
នៅក្នុងសេចក្តីថ្លែងការណ៍អំពាវនាវយកជំនួយមនុស្សធម៌បន្ទាន់ កាលពីថ្ងៃសុក្រ កម្មវិធីស្បៀងអាហារពិភពលោក បានលើកឡើងថា មានកុមារកេនយ៉ាងជាង ៤សែន៦ម៉ឺននាក់ និងស្រ្តីមានផ្ទៃពោះ ជិត ១០ម៉ឺននាក់ ដែលកំពុងរងគ្រោះខ្វះអាហារូបត្ថម្ភធ្ងន់ធ្ងរនៅកេនយ៉ា។ ការខ្វះទឹក និងអាហារប៉ះពាល់ផងដែរ ដល់មុខរបរចិញ្ចឹមសត្វដែលជាប្រភពចំណូលសំខាន់របស់ប្រជាជននៅតំបន់ភាគខាងកើតកេនយ៉ា។ សម្រាប់អ្នកតំណាងរបស់កម្មវិធីស្បៀងអាហារពិភពលោក គ្រោះរាំងស្ងួតបានរួមចំណែកបង្កើតឲ្យមានជម្លោះ ដណ្តើមប្រភពទឹក។
ស្ថានភាពនៅកេនយ៉ាកាន់តែធ្លាក់ដុនដាប។ អង្គការសហប្រជាជាតិវាយតម្លៃថា គេត្រូវការប្រាក់ ១៣៩លានដុល្លារ សម្រាប់ជំនួយមនុស្សធម៌បន្ទាន់នៅកេនយ៉ា។ បើសិនទឹកភ្លៀងធ្លាក់មិនគ្រប់គ្រាន់ នៅចុងឆ្នាំនេះ ដូចការព្យាករទុក នោះ តម្រូវការ ជំនួយ សម្រាប់វិបត្តិគ្រោះទុរ្ភិក្សនៅកេនយ៉ានឹងកើនឡើងច្រើនជាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ