១០ឆ្នាំក្រោយការស្លាប់របស់កាដាហ្វ៊ី តើលីប៊ីកំពុងតែបោះជំហានទៅរកស្ថិរភាព និងសន្តិភាពហើយឬនៅ?
ថ្ងៃទី២០ តុលា ឆ្នាំ២០១១ មេដឹកនាំផ្តាច់ការលីប៊ី មូអាម៉ា កាដាហ្វ៊ី ត្រូវបានគេសម្លាប់ នៅក្នុងព្រឹត្តិការណ៍បដិវត្ត ផ្តួលរំលំរបបផ្តាច់ការ។ តែក្រោយមក លីប៊ីបានឆ្លងកាត់នូវសង្រ្គាមវឹកវរ បំផ្លិចបំផ្លាញស្ទើគ្រប់វិស័យ ព្រមទាំងក្លាយជាចំណែកលូកដៃអន្តរាគមន៍ ពីសំណាក់ប្រទេសផ្សេងៗផង មុននឹងមានកិច្ចព្រមព្រៀងឈប់បាញ់ នៅខែតុលា ឆ្នាំ២០២០។ ១០ឆ្នាំ ក្រោយការស្លាប់ របស់មេដឹកនាំផ្តាច់ការ កាដាហ្វ៊ី តើប្រទេសលីប៊ី អាចបោះជំហាន ឈានទៅរកស្ថិរភាព និងសន្តិភាពពិតប្រាកដ ដែរឬទេ?
ចុះផ្សាយនៅថ្ងៃ៖
ស្តាប់ - ០២:៤០
សង្គ្រាមស៊ីវីល រវាងក្រុមប្រដាប់អាវុធ ភាគខាងកើត និងភាគខាងលិចលីប៊ី បានហែកហួរ ប្រទេសនេះ ឲ្យខ្ទិចខ្ទីជាជម្រៀក ប្រមាណ១០ឆ្នាំមកហើយ ក្រោយការដួលរលំ នៃរបបផ្តាច់ការរបស់ មូអាម៉ា កាដាហ្វ៊ី។ ក្រោមការជ្រោមជ្រែង ពីអង្គការសហប្រជាជាតិ រដ្ឋាភិបាលបង្រួមបង្រួមជាតិលីប៊ី បណ្តោះអាសន្នមួយ ត្រូវបានរៀបចំឡើងកាលពីខែមីនា និងដើម្បីឈានទៅរៀបចំការបោះឆ្នោត នៅថ្ងៃទី២៤ ធ្នូខាងមុខ។
យោងតាមលោក Hamish Kinnear អ្នកជំនាញនៅវិទ្យាស្ថាន Verisk Maplecroft ស្ថានភាពនៅលីប៊ី ក្នុងពេលបច្ចុប្បន្ននេះ បានប្រសើរឡើងច្រើនហើយ។ កិច្ចព្រមព្រៀងបទឈប់បាញ់ ចុះខែតុលា ឆ្នាំ២០២០ នៅតែមានធរមាន ហើយរដ្ឋាភិបាលបង្រួបបង្រួមជាតិ(GNU) គឺជារដ្ឋាភិបាលតែមួយតំណាងលីប៊ី។ តែយ៉ាងណាក៏ដោយ ស្ថិរភាពនយោបាយនេះ មានភាពផុយស្រួយណាស់ ខណៈដែលការបោះឆ្នោតខិតជិតមកដល់។ តាមការវិភាគរបស់លោក ក្នុងរវាង៦ខែទៅមុខ គឺទើបអាចដឹងច្បាស់ ថាភាពស្ងប់ស្ងាត់កន្លងមកនេះ គ្រាន់តែជាការសំងំយកកម្លាំងរៀងៗខ្លួន ឬក៏ជាការវិវឌ្ឍន៍ប្រសើរផ្នែកនយោបាយ ពិតប្រាកដមែននោះ។
សម្រាប់លោក Mahmoud Khalfallah សាស្ត្រាចារ្យនៅសកលវិទ្យាល័យលីប៊ី ការបោះឆ្នោតតែមួយមុខ មិនអាចដោះស្រាយបញ្ហាបានទាំងស្រុង និងរៀងដរាបនោះទេ។ លោកលើកឡើងថា លីប៊ី មានឧបសគ្គច្រើនណាស់ ដែលត្រូវឆ្លងកាត់ និងជំនះឲ្យបាន។ តួយ៉ាងដូចជា ការលូកដៃកកូរកកាយពីបរទេស សមត្ថភាពវិចារណញានរបស់ប្រជាជនក្នុងការជ្រើសរើសថ្នាក់ដឹកនាំ ការបែងចែកបក្សពួក តំបន់ប្រជែងគ្នា និងការទទួលយកលទ្ធផលបោះឆ្នោតជាដើម។ ការបែកបាក់គ្នា មានទំហំធំក្រៃ ដែលពិបាកនឹងផ្សះផ្សា។ ក្រុមប្រដាប់អាវុធ ជាច្រើនក្រុមនៅភាគខាងលិច អាចនឹងមិនទទួលបានទេ ប្រសិនបើលោកមេបញ្ជាការ Khalifa Haftar ឈ្នះឆ្នោតក្លាយជាប្រធានាធិបតី។ ហើយបក្សពួកលោកមេបញ្ជាការ Khalifa Haftar ក៏មិនប្រាកដថានឹងទទួលស្គាល់បរាជ័យដែរ។
យ៉ាងណាក៏ដោយ សម្រាប់សហគមន៍អន្តរជាតិ ការបោះឆ្នោតនៅខែធ្នូ គឺជាដំណាក់កាលមួយដ៏សំខាន់ សម្រាប់ការបោះជំហានឈានទៅកសាងស្ថិរភាពលីប៊ី។ មន្ត្រីទូតអឺរ៉ុបម្នាក់ បានលើកឡើងថា គេដឹងថាមានបញ្ហាច្រើនណាស់ ដូចជាអំពើពុករលួយ និងភាពមិនប្រក្រតីទាំងឡាយដែលអាចកើតមានក្នុងដំណើរការបោះឆ្នោត។ ក៏ប៉ុន្តែ សហគមន៍អន្តរជាតិនៅតែបន្តសង្ឃឹមលើផ្លូវដើរនេះ។ លោក Ahmed el-Rachrach អ្នកវិភាគឯករាជម្នាក់នៅលីប៊ី បានលើកឡើងថា ប្រជាជនលីប៊ី ស្រេកឃ្លានចង់បានស្ថិរភាព សន្តិភាព ដើម្បីកសាងជីវភាពដែលធ្លាក់ដុនដាប ឲ្យល្អប្រសើរឡើងវិញ បន្ទាប់ពីការដួលរលំទៅ១០ឆ្នាំមកនេះ នៃរបបផ្តាច់ការកាដាហ្វ៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ