អង្គការសហប្រជាជាតិជំរុញឲ្យស៊ូដង់គោរពសិទ្ធិសេរីភាពសារព័ត៌មាន
ប្រមុខអង្គការសហប្រជាជាតិលោក អង់តូនីញ៉ូ ហ្គូទែរស៍ បានអំពាវនាវឲ្យអាជ្ញាធរក្នុងប្រទេសស៊ូដង់គោរពសេរីភាពនៃការបញ្ចេញមតិ និងសារព័ត៌មាន។ នៅក្នុងរបាយការណ៍មួយដែលបានដាក់ជូនទៅក្រុមប្រឹក្សាសន្តិសុខកាលពីថ្ងៃសុក្រ ទី៣ ធ្នូម្សិលមិញ លោកប្រមុខអង្គការសហប្រជាជាតិថារបបយោធាស៊ូដង់បានចាត់ទុកអ្នកកាសែតជាសត្រូវ។
ចុះផ្សាយនៅថ្ងៃ៖
ស្តាប់ - ០២:០៨
សកម្មជននយោបាយ អ្នកកាសែត បាតុកររាប់រយនាក់ និងអ្នកដែលបានឈរមើលបាតុកម្មប្រឆាំងរដ្ឋប្រហារត្រូវបានចាប់ខ្លួនបន្ទាប់ពីផ្ទះការចលាចលចុងក្រោយនៅស៊ូដង់ក្នុងព្រឹត្តិការណ៍រដ្ឋប្រហារកាលពីថ្ងៃទី ២៥ ខែតុលា ឆ្នាំ២០២១។
នៅថ្ងៃនោះ ឧត្តមសេនីយ៍ អាប់ឌែល ហ្វាតា អាល់បួរ៉ាន បានដណ្ដើមអំណាចនិងបានចាប់ឃុំខ្លួននាយករដ្ឋមន្ត្រីលោក អាប់ដាឡា ហមដុក (Abdallah Hamdok)។ ក៏ប៉ុន្តែបន្ទាប់ពីមានការថ្កោលទោសខ្លាំងពីអន្តរជាតិនិងមានការតវ៉ាដ៏ធំក្នុងប្រទេសផងនោះ មេដឹកនាំរដ្ឋប្រហារក៏យល់ព្រមឲ្យ លោក អាប់ដាឡា ហមដុក ចូលកាន់តំណែងនាយករដ្ឋមន្ត្រីវិញតាមរយៈកិច្ចព្រមព្រៀងមួយ កាលពីថ្ងៃទី ២១ ខែវិច្ឆិកា។
"នៅខណៈដែលការប្រឆាំងទល់នឹងអ្នកសារព័ត៌មានកាន់តែរីកធំឡើងនោះ ខ្ញុំសូមជំរុញឲ្យអាជ្ញាធរស៊ូដង់គោរពនូវសេរីភាពនៃការបញ្ចេញមតិនិងសារព័ត៌មាន" ។ នេះគឺជាប្រសាសន៍របស់លោក អគ្គលេខាធិការអង្គការសហប្រជាជាតិ ហ្គូទែរស៍ នៅក្នុងឯកសារប្រចាំត្រីមាសដែលនៅមិនទាន់ត្រូវបានផ្សព្វផ្សាយជាសាធារណៈទេ ប៉ុន្តែត្រូវទទួលបានដោយទីភ្នាក់ងារព័ត៌មាន AFP។
លោក ហ្គូទែរស៍ បានបន្ថែមដោយរំលឹកឡើងវិញនូវការអំពាវនាវរបស់លោកឲ្យមានការដោះលែងជាបន្ទាន់ និងដោយគ្មានលក្ខខណ្ឌនូវជនដែលត្រូវបានចាប់ខ្លួននិងឃុំខ្លួនតាមតែអំពើចិត្តរបស់អាជ្ញាធរស៊ូដង់។ ក្រៅពីនេះ លោកក៏បានទាមទារឲ្យបញ្ឈប់នូវការចាប់ខ្លួនមេដឹកនាំ និងសកម្មជននយោបាយនៅស៊ូដង់ដែរ។
គួររំឭកថា ជាយូរមកហើយដែលប្រទេសស៊ូដង់មានប្រវត្តិធ្វើរដ្ឋប្រហារយោធា និងកម្របានស្គាល់ការគ្របគ្រងតាមបែបប្រជាធិបតេយ្យណាស់ចាប់តាំងពីទទួលបានឯករាជ្យនៅឆ្នាំ១៩៥៦។ តាំងពីរដ្ឋប្រហារចុងក្រោយនាថ្ងៃទី ២៥តុលាមក បាតុកម្មបានផ្ទុះឡើងនៅទូទាំងស៊ូដង់ដែលជាប្រទេសដ៏ក្រីក្របំផុតមួយនៅក្នុងពិភពលោក។ ហើយមកទល់នឹងពេលនេះ អនាគតរបស់ស៊ូដង់នៅតែមានភាពស្រពេចស្រពិលដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ