OMS/WHO ៖ កូវីដ១៩បានបណ្តាលឲ្យចំនួនមនុស្សស្លាប់ ដោយជំងឺគ្រុនចាញ់ កើនឡើងក្នុងឆ្នាំ២០២០
ជំងឺកូវីដ១៩ មិនមែនត្រឹមតែបានសម្លាប់ជីវិតមនុស្ស ដោយផ្ទាល់នោះទេ តែវាបានបង្កឲ្យចំនួនមនុស្សស្លាប់ ដោយជំងឺផ្សេងៗទៀត បានកើនឡើងផងដែរ។ អង្គការសុខភាពពិភពលោក បានអះអាងថា ក្នុងឆ្នាំ២០២០កន្លងទៅ វិបត្តិកូវីដ១៩ បានធ្វើឲ្យចំនួនមនុស្សស្លាប់ ដោយជំងឺគ្រុនចាញ់កើនឡើងខ្ទង់ពី ៥ ទៅ ៧ម៉ឺននាក់ នៅទូទាំងពិភពលោក។ វិធានការបិទខ្ទប់ ព្រមទាំងការបង្វែទិសដៅអាទិភាព គិតតែអំពីជំងឺកូវីដ១៩ បានធ្វើឲ្យការប្រឹងប្រែងប្រយុទ្ធប្រឆាំង និង ការព្យាបាលអ្នកជំងឺគ្រុនចាញ់ ត្រូវដើរថយក្រោយ។
ចុះផ្សាយនៅថ្ងៃ៖
ស្តាប់ - ០២:៥១
យោងតាមរបាយការណ៍ នៃអង្គការសុខភាពពិភពលោក ចេញផ្សាយថ្ងៃទី៦ធ្នូ បានឲ្យដឹងថា នៅក្នុងឆ្នាំ២០២០កន្លងទៅ ជំងឺគ្រុនចាញ់ បានសម្លាប់ជីវិតមនុស្ស ចំនួនប្រមាណ៦២៧០០០នាក់ នៅទូទាំងពិភពលោក។ បើប្រៀបធៀបទៅឆ្នាំ ២០១៩ ចំនួននេះបានកើនឡើង ប្រមាណ៦៩០០០នាក់។ ចំនួនអ្នកឆ្លងជំងឺគ្រុនចាញ់ បានកើនឡើង ជាង១៤លាននាក់ ក្នុងឆ្នាំ២០២០ ធ្វើឲ្យមានចំនួនសរុបប្រមាណ២៤១លាននាក់។
កម្រិតកើនឡើង ក្នុងឆ្នាំ២០២០ ទាំងចំនួនមនុស្សឆ្លង និងករណីស្លាប់ ដោយជំងឺគ្រុនចាញ់នេះ គឺជាផលវិបាក បណ្តាលមកពីវិធានការបិទខ្ទប់នានា ដោយសារតែវិបត្តិកូវីដ១៩។ ការបិទខ្ទប់ បានរារាំងមនុស្ស មិនអាចទទួលបានព័ត៌មាន អំពីវិធានការការពារ និងការព្យាបាលបានត្រឹមត្រូវ។ តែយ៉ាងណា លោក Pedro Alonso នាយកកម្មវិធីប្រយុទ្ធប្រឆាំងជំងឺគ្រុនចាញ់ នៃអង្គការសុខភាពពិភពលោក បានលើកឡើងថា ការកើនឡើងនេះ វាមានទាបជាងការភ័យបារម្ភទុកជាមុន។ លោកបាន សង្កត់ធ្ងន់លើចំណុចវិជ្ជមានមួយចំនួន ដែលបញ្ជាក់ថា រដ្ឋាភិបាលប្រទេសមួយចំនួន បានព្យាយាមយកចិត្តទុកដាក់ បើទោះបីជាត្រូវរវល់ វក់វី ជាមួយជំងឺកូវីដ១៩ យ៉ាងណាក្តី។
គួរបញ្ជាក់ថា សត្វមូលគឺជាភ្នាក់ងារចម្លងជំងឺគ្រុនចាញ់។ ក្នុងចំណោមបារ៉ាស៊ីត Plasmodium ទាំង៥ប្រភេទ ដែលបង្កជំងឺគ្រុនចាញ់ គឺបារ៉ាស៊ីត Plasmodium falciparum ដែលអាចបង្កគ្រោះថ្នាក់ធ្ងន់ធ្ងរជាងគេ។ ក្រោយប៉ារ៉ាស៊ីតនេះ ចូលទៅក្នុងខ្លួន អ្នកជំងឺអាចមានអាការៈ ក្តៅខ្លួនខ្លាំង ឈឺក្បាលខ្លាំង បែកញើស គ្រុនញាក់ រងារ ស្រៀវស្រាញ ជាច្រើនថ្ងៃ។
គួរកត់សំគាល់ថា ក្នុងចំណោមប្រទេសទាំងអស់ទូទាំងពិភពលោក ទ្វីបអាហ្វ្រិក ជាទ្វីបដែលរងគ្រោះខ្លាំងជាងគេ ដោយសារជំងឺគ្រុនចាញ់។ យោងតាមតួលេខរបស់អង្គការសុខភាពពិភពលោក ៩៥%នៃករណីឈឺជំងឺក្រុនចាញ់ គឺស្ថិតនៅទ្វីបអាហ្វ្រិក ហើយករណីស្លាប់វិញគឺមាននៅអាហ្វ្រិក ចំនួន៩៦%។ ជាងនេះទៀត ករណីស្លាប់ដោយជំងឺគ្រុនចាញ់ នៅអាហ្វ្រិក គឺ៨០% ជាកុមារអាយុក្រោម៥ឆ្នាំ។
បច្ចុប្បន្ននេះ មានតែថ្នាំវ៉ាក់សាំង « RTS,S » របស់មន្ទីរពិសោធន៍ GSK តែមួយគត់ ដែលបានប្រសិទ្ធភាពទប់ទល់ជំងឺគ្រុនចាញ់។ ចាប់ពីឆ្នាំ២០១៩មក ប្រទេសបីនៅអាហ្វ្រិក មាន ហ្កាណា កេនយ៉ា និងម៉ាឡាវី បានចាប់ផ្តើមចាក់ធ្វើតេស្តសាកល្បង ប្រើវ៉ាក់សាំង « RTS,S » ទៅលើមនុស្សប្រមាណ ២លាន៣សែននាក់។ នៅដើមខែធ្នូនេះ ក្រុមប្រឹក្សារដ្ឋបាលនៃសម្ព័ន្ធវ៉ាក់សាំងអន្តរជាតិ (Gavi) បានសម្រេច ផ្តល់កញ្ចប់ប្រាក់ចំនួន ១៥៥.៧លានដុល្លារ ដើម្បីចាប់ផ្តើម បើកយុទ្ធនាការចាក់ថ្នាំបង្ការជំងឺគ្រុនចាញ់ ឲ្យកុមារនៅតាមប្រទេសអាហ្វ្រិក ខាងត្បូងសមុទ្រខ្សាច់សាហារ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ