ម៉ាលីអះអាងថា គ្មានវត្តមានក្រុមទាហានស៊ីឈ្នួល Wagner របស់រុស្ស៊ី នៅក្នុងប្រទេសខ្លួនទេ
រដ្ឋាភិបាលម៉ាលី បានចេញលិខិតប្រកាស បដិសេធថា គ្មានវត្តមានក្រុមទាហានស៊ីឈ្នួល Wagner របស់រុស្ស៊ី នៅក្នុងប្រទេសខ្លួនទេ។ ការបដិសេធជាផ្លូវការនេះ គឺបន្ទាប់ពីក្រុមប្រទេសលោកខាងលិច ចំនួន១៥ប្រទេស បានចេញលិខិតកាលពីថ្ងៃព្រសហ្បតិ៍ លើកឡើងថាក្រុមទាហានស៊ីឈ្នួល Wagner របស់រុស្ស៊ី កំពុងតែមានវត្តមាន និងធ្វើសកម្មភាពនៅម៉ាលី។ ជាការចោទប្រកាន់ ដែលរដ្ឋាភិបាលម៉ាលី បានចាត់ទុកថា គ្មានមូលដ្ឋានភស្តុតាងត្រឹមត្រូវ។
ចុះផ្សាយនៅថ្ងៃ៖
ស្តាប់ - ០២:១៤
តាមរយៈលិខិតរបស់អ្នកនាំពាក្យរដ្ឋាភិបាលម៉ាលី ចេញផ្សាយថ្ងៃសុក្រទី២៤ធ្នូ ប្រទេសម៉ាលី បានបដិសេធជាផ្លូវការ ថាគ្មានវត្តមានក្រុមទាហានស៊ីឈ្នួល Wagner របស់រុស្ស៊ី ដូចដែលក្រុមប្រទេសលោកខាងលិច បានចោទប្រកាន់នោះទេ។ រដ្ឋាភិបាលម៉ាលី ទាមទារផងដែរ ឲ្យមានការបង្ហាញភស្តុតាង ដែលបានមកពីប្រភពឯករាជ្យ មិនមែនចោទប្រកាន់ដោយយោងតែលើពាក្យចចាមអារ៉ាមនោះទេ។
ទន្ទឹមគ្នានេះ រដ្ឋាភិបាលម៉ាលី បានបញ្ជាក់ថា ពិតជាមានក្រុមមន្ត្រីជំនាញការរបស់រុស្ស៊ី នៅម៉ាលីមែន តែស្ថិតក្នុងក្របខណ្ឌនៃបេសកកម្ម បណ្តុះបណ្តាលបង្វឹកសមត្ថភាពប្រតិបត្តិការ របស់កម្លាំងទាហានជាតិម៉ាលីតែប៉ុណ្ណោះ។ ម៉ាលីអះអាងថា ខ្លួនមានទំនាក់ទំនងជាមួយរុស្ស៊ី ក្នុងក្របខណ្ឌរដ្ឋ ប្រទេសនិងប្រទេស។
គួរបញ្ជាក់ថា កាលពីថ្ងៃព្រហស្បតិ៍កន្លងទៅ ប្រទេសលោកខាងលិច១៥ប្រទេស ដែលមានបារាំង អង់គ្លេស អាល្លឺម៉ង់ កាណាដា ជាអ្នកនាំមុខ បានចេញលិខិតមួយ ថ្កោលទោសចំពោះរុស្ស៊ី ដែលបានលួចលាក់ បញ្ជូនកម្លាំងទាហានស៊ីឈ្នួល ក្រុមWagner ព្រមទាំងសម្ភារៈសព្វាវុធ ទៅកាន់ប្រទេសម៉ាលី។ ក្រុមប្រទេសលោកខាងលិច បានហៅឲ្យរុស្ស៊ី ត្រូវតែធ្វើសកម្មភាពដែលមានការទទួលខុសត្រូវ និងដោយគំនិតស្ថាបនា នៅក្នុងតំបន់សាហ៊ែល។
យោងតាមប្រភពពីរដ្ឋាភិបាលបារាំង គឺគេបានសង្កេតឃើញ តំរុយជាច្រើន ដែលបញ្ជាក់ពីវត្តមានក្រុមទាហានស៊ីឈ្នួលរុស្ស៊ី នៅប្រទេសម៉ាលី។ ជាក់ស្តែង សកម្មភាពហោះហើរចុះឡើងញឹកញាប់ របស់យន្តហោះដឹកជញ្ជូនកម្លាំងទ័ពរុស្ស៊ី ការសាសង់បន្ទាយនៅព្រលានយន្តហោះរងចាំទទួលកម្លាំងច្រើននាក់ វត្តមានចុះត្រួវពិនិត្យញឹកញាប់ របស់មេដឹកនាំក្រុមWagner នៅក្រុងបាម៉ាកូ ព្រមទាំងវត្តមានរបស់ក្រុមជំនាញធរណីសាស្ត្រ ដែលគេស្គាល់ថាអ្នកធ្វើការឲ្យក្រុមWagner។
គួររំលឹកដែរថា ប្រទេសលោកខាងលិច បានចោទរុស្ស៊ីថាបានប្រើប្រាស់យុទ្ធសាស្ត្រសង្គ្រាមលាក់មុខ ដោយបានបញ្ជូនកម្លាំងទាហានស៊ីឈ្នួលក្រុមWagner ទៅកាន់សមរភូមិជាច្រើន ដូចជានៅអ៊ុយក្រែន លីប៊ី ស៊ីរី និងតាមប្រទេសអាហ្វ្រិកខាងត្បូងសមុទ្រខ្សាច់សាហារ៉ា ជាច្រើនផ្សេងទៀត។ កាលពីថ្ងៃចន្ទទី២០ធ្នូ សហរដ្ឋអាមេរិក និងសហភាពអឺរ៉ុប បានសម្រេចដាក់ទណ្ឌកម្មលើក្រុមទាហានស៊ីឈ្នួលនេះ ដែលគេអះអាងថា ជាក្រុមស្និទ្ធនឹងលោកប្រធានាធិបតីពូទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ