អេត្យូពី លើកលែងទោសមេដឹកនាំបក្សប្រឆាំងនិងឧទ្ទាមទីហ្ក្រេ ដើម្បីផ្សះផ្សាជាតិ
ឥស្សរជនបក្សប្រឆាំង អ្នកទទួលខុសត្រូវ និងយុទ្ធជននៃកងកម្លាំងឧទ្ទាមទីហ្ក្រេជាច្រើននាក់ បានទទួលសេរីភាពវិញនៅថ្ងៃសៅរ៍ទី ៨មករា ២០២២។ ក្នុងឱកាសបុណ្យណូអែលរបស់បណ្តាគ្រិស្តសាសនិកជននិកាយអ័រតូដុក រដ្ឋាភិបាលអេត្យូពី បានធ្វើសេចក្តីប្រកាសដ៏គួរឱ្យភ្ញាក់ផ្អើលមួយ លើកលែងទោស ដល់អ្នកទោសនយោបាយជាច្រើនរូប។
ចុះផ្សាយនៅថ្ងៃ៖
ស្តាប់ - ០២:១០
គេនៅពុំទាន់ដឹងច្បាស់អំពីចំនួនអ្នកទោសដែលបានទទួលការលើកលែងពីរដ្ឋាភិបាលទេ។ ប៉ុន្តែអ្នកទោសនយោបាយ មានជាអាទិ៍ ស្ថាបនិកគណបក្សប្រឆាំង សមាជិកព្រឹទ្ធសភាសហព័ន្ធជនជាតិអូរ៉ូម៉ូ អតីតប្រធានប្រព័ន្ធឃោសនាព័ត៌មាន មេដឹកនាំចលនាឧទ្ទាមរណសិរ្សរំដោះប្រជាជនទីហ្ក្រេ ព្រមទាំងយុទ្ធជនឧទ្ទាមទីហ្ក្រេជាច្រើននាក់ បានទទួលសេរីភាព នៅថ្ងៃសោរ៍ទី ៨មករា២០២២នេះ។ នេះបើការបញ្ជាក់ព័ត៌មានរបស់មេធាវីមកកាន់ភ្នាក់ងារសារព័ត៌មានបារាំងafp។
នេះជាដំណឹងល្អ ដ៏គួរឱ្យភ្ញាក់ផ្អើល ដែលធ្វើឡើងក្រោយពីលោកនាយករដ្ឋមន្ត្រី អាប៊ីអាមេដ បានថ្លែងសារអំពាវនាវសុំផ្សះផ្សាជាតិ កាលពីថ្ងៃសុក្រទី ៧មករា២០២២។ នៅក្នុងសេចក្តីថ្លែងការណ៍ រដ្ឋាភិបាលអេត្យូពី បានពន្យល់ថា ការដោះលែងអ្នកទោសមនសិការ ជាការបើកផ្លូវឱ្យមានដំណោះស្រាយ បញ្ចប់វិបត្តិអេត្យូពីជានិរន្តន៍។ គន្លឹះនៃការផ្សះផ្សានិងបង្រួមបង្រួមជាតិ គឺការចរចា។ អេត្យូពី នឹងប្រឹងធ្វើពហិការគ្រប់យ៉ាងដើម្បីសម្រេចកម្មវត្ថុផ្សះផ្សាជាតិឱ្យបាន។ នេះបើតាមសេចក្តីថ្លែងការណ៍ដដែល ដែលមានរៀបរាប់ទាំងឈ្មោះមេដឹកនាំបក្សប្រឆាំង និងសកម្មជនទីហ្ក្រេ ជាភស្តុតាងបញ្ជាក់អំពីការលើកលែងទោសផង។
ប៉ុន្តែសេចក្តីថ្លែងការណ៍មិនបានបញ្ជាក់ឱ្យច្បាស់ថាតើរដ្ឋាភិបាលស្នើសុំចរចាជាមួយចលនារណសិរ្សរំដោះប្រជាជនទីហ្ក្រេ គណបក្សដែលបានដឹកនាំប្រទេសអេត្យូពីអស់រយៈពេលបីទសវត្សរ៍ តែត្រូវបានចាត់ទុកជាក្រុមឧទ្ទាមនៅពេលលោកអាប៊ី អាមេដ បានឡើងកាន់អំណាចនៅឆ្នាំ២០១៨មក។
ក្រុមឧទ្ទាមទីហ្ក្រេបានចាប់កាន់អាវុធ តាំងពីខែវិច្ឆិកា២០២០ ប្រឆាំងនឹងរដ្ឋាភិបាល ក្រោយពីនាយករដ្ឋមន្ត្រីអាប៊ីអាមេដ បានបញ្ជូនទ័ពទៅកម្ចាត់អាជ្ញាធរមូលដ្ឋានតំបន់ទីហ្ក្រេ ដែលស្ថិតនៅភាគខាងជើងប្រទេស។ ការប្រយុទ្ធតតាំងគ្នា បានបង្កឱ្យជនស៊ីវិលស្លាប់រាប់ពាន់នាក់។ បើតាមអង្គការសហប្រជាជាតិ តំបន់ទីហ្ក្រេ ដែលស្ថិតក្រោមការបិទខ្ទប់ មិនអាចទទួលជំនួយមនុស្សធម៌ រងគ្រោះយ៉ាងខ្លាំង ខ្វះសព្វខ្វះគ្រប់។
សេចក្តីប្រកាសលើកលែងទោសសកម្មជនបក្សប្រឆាំងនេះប្រព្រឹត្តទៅជួនចំពេលប្រេសិតពិសេសអាមេរិកប្រចាំតំបន់ខ្នែងអាហ្វ្រិកកំពុងបំពេញបេសកកម្មនៅក្នុងតំបន់ដើម្បីលើកទឹកចិត្តឱ្យមានការចរចារកសន្តិភាព។ ចំណែកអគ្គលេខាធិការអង្គការសហប្រជាជាតិ បានអបអរ និងប្រកាសចូលរួមយ៉ាងសកម្មជួយស្តារសន្តិភាពនិងស្ថិរភាពឱ្យអេត្យូពី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ