អង្គការ FAO ទាញសញ្ញាអាសន្នពីតម្រូវការជំនួយបន្ទាន់ដើម្បីបញ្ជៀសវិបត្តិស្បៀងអាហារនៅអាហ្រ្វិក
អង្គការកសិកម្ម និងស្បៀងរបស់អង្គការសហប្រជាជាតិហៅកាត់ FAO បានទាញសញ្ញាអាសន្នថា តំបន់អាហ្រ្វិកខាងកើតអាចប្រឈមនឹងវិបត្តិខ្វះស្បៀងដ៏ធ្ងន់ធ្ងរមួយលើលោក។ ក្រៅពីវិបត្តិបង្កឡើងដោយជំងឺកូវីដ១៩ និងការរ៉ៅឆានពីហ្វូងសត្វចង្រិត ប្រជាជននៅតាមតំបន់ជនបទកំពុងប្រឈមនឹងគ្រោះរាំងស្ងួត។ នៅក្នុងប្រទេសអេត្យូពី កេនយ៉ា និងនៅសូម៉ាលី មានប្រជាជនជាង ២៥លាននាក់អាចប្រឈមនឹងវិបត្តិខ្វះស្បៀងខ្លាំងពីពេលនេះទៅពាក់កណ្តាលឆ្នាំ ២០២២។ លោករ៉ូឌ្រីហហ្គេ វីនេ អ្នកនាំពាក្យអង្គការ FAO បានពន្យល់ថា អ្នកដែលកំពុងប្រឈមនឹងហានិភ័យដោយភាពរាំងស្ងួតខ្លាំងជាងគេ គឺអ្នកចិញ្ចឹមសត្វ និងកសិករចំនួន ១លាន ៥សែននាក់។
ចុះផ្សាយនៅថ្ងៃ៖
ស្តាប់ - ០១:៣៤
« តំបន់ប៉ែកខាងត្បូងនៃប្រទេសអេត្យូពី ប្រទេសសូម៉ាលី និងតំបន់ប៉ែកខាងជើងនៃប្រទេសកេនយ៉ាជាតំបន់ដែលប្រឈមនឹងគ្រោះរាំងស្ងួតខ្លាំងជាងគេ។ គេត្រូវដឹងថា នៅពេលដែលមានសត្វគោមួយងាប់ គឺមានន័យស្មើនឹងកូនក្មេងចំនួន ២នាក់លែងមានទឹកដោះគោញាំប្រចាំថ្ងៃ។ ដូច្នេះពិតណាស់ គេត្រូវតែជួយគាំទ្រដល់អ្នកចិញ្ចឹមសត្វដើម្បីការពារសត្វរបស់ពួកគាត់ដោយត្រូវផ្តល់ចំណីឲ្យសត្វ ត្រូវមានក្រុមពេទ្យសត្វ និងរថយន្តគ្លីនិកចល័តដើម្បីពិនិត្យ តាមដានសុខភាពសត្វរបស់ពួកគាត់។
បន្ថែមពីនេះ គេត្រូវដឹកជញ្ជូនទឹកទៅកាន់តំបន់ដាច់ស្រយាល និងជួយធ្វើឲ្យប្រសើរឡើងនូវអណ្តូងទឹកដែលមានស្រាប់តាមរយៈការបំពាក់នូវថាមពលព្រះអាទិត្យដើម្បីធានាការផ្គត់ផ្គង់ទឹកដល់សត្វទាំងអស់។ ចំពោះក្រុមកសិករវិញ ពួកគាត់ត្រូវការគ្រាប់ពូជសម្រាប់រដូវភ្លៀងខាងមុខដែលនឹងត្រូវចាប់ផ្តើមក្នុងខែមីនា និងមេសាឆ្នាំនេះ។
បន្ទាប់មក ក្រុមកសិករក៏ត្រូវការ និងត្រូវការភ្លាមៗនូវជំនួយជាលុយកាក់ដើម្បីយកទៅទិញម្ហូបអាហារដែលពួកគេមិនអាចរកបានខ្លួនឯងទៀតឡើយ។ គេត្រូវតែជួយជាចាំបាច់ និងភ្លាមៗនៅក្នុងខែមករា កុម្ភៈ និងខែមីនា។ បើពុំនោះសោតទេ គឺវាយឺតពេលហើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ