ទាហានបួគីណាហ្វាសូ និងទាហានបារាំង សម្លាប់បានជនជីហាតភេរវកម្មជាង៦០នាក់
យ៉ាងហោចណាស់ មានជនជីហាតភេរវកម្មនៅតំបន់សាហ៊ែល ចំនួន៦០នាក់ ត្រូវបានទាហានបួគីណាហ្វាសូ សហការជាមួយទាហានបារាំង សម្លាប់បាននៅរវាង២សប្តាហ៍ចុងខែមករានេះ។ នេះបើផ្អែកតាមការប្រកាស របស់អគ្គបញ្ជាការដ្ឋានកងទ័ពបារាំង កាលពីថ្ងៃអាទិត្យម្សិលមិញ។ កងទ័ពបារាំង បានបង្ហាញសុទិដ្ឋិនិយមចំពោះលទ្ធផលនិង ព្រមទាំងសមត្ថភាពប្រយុទ្ធរបស់កងទ័បជាតិបួគីណាហ្វាសូ ដើម្បីប្រយុទ្ធនឹងក្រុមជីហាតភេរវកម្ម។
ចុះផ្សាយនៅថ្ងៃ៖
ស្តាប់ - ០២:០៩
យោងតាមការបញ្ជាក់ពីអគ្គបញ្ជាការដ្ឋានកងទ័ពបារាំង ទាហានបារាំងនៃបេសកកម្ម Barkhane តំបន់សាហ៊ែល បានសហការជាមួយកងទ័ពបួគីណាហ្វាសូ កំណត់គោលដៅ និងបានបើកប្រតិបត្តិការចំនួន៤លើក រវាងថ្ងៃទី១៦ ដល់ថ្ងៃទី២៣មករា។ ក្នុងប្រតិបត្តិការទាំង៤លើកនេះ សមាជិកក្រុមជីហាតភេរវកម្មចំនួនយ៉ាងហោច៦០នាក់ ត្រូវបានសម្លាប់។
កងទ័ពបួគីណាហ្វាសូ ជាអ្នកបើកប្រតិបត្តិការផ្ទាល់នៅដី សហការជាមួយកងទ័ពបារាំង ដែលបើកការវាយប្រហារបើកផ្លូវពីលើអាកាស។ ម៉ូតូចំនួនជាង២០គ្រឿង ព្រមទាំងរថយន្ត pick-ups បំពាក់ដោយអាវុធជាច្រើនគ្រឿង ដែលក្រុមជីហាតប្រើប្រាស់ដើម្បីធ្វើសកម្មភាព ត្រូវបានកងទ័ពសម្ព័ន្ធមិត្តតំបន់សាហ៊ែល កំទេចចោល។
អគ្គបញ្ជាការដ្ឋានកងទ័ពបារាំង បានសម្តែងការអបអរ ចំពោះលទ្ធផលវិជ្ជមាននៃការសហការនេះ។ កម្មវត្ថុនៃប្រតិបត្តិការគឺ ឈានទៅតាមរក និងកំទេចជនជីហាតភេរវកម្ម ដល់ទីកន្លែងលាក់ខ្លួន។ កងទ័ពបារាំងអះអាងថា បេសកកម្មរបៀបនេះ គេនឹងធ្វើបន្តទៀត ព្រោះវាបានបង្ហាញពីសមត្ថភាព របស់កងទ័ពបួគីនាហ្វាសូ ដើម្បីឈានចូលទៅដល់តំបន់ឆ្ងាយៗ ដែលធ្លាប់ស្ថិតក្រោមការកាន់កាប់របស់បណ្តាញជីហាត។
គួរបញ្ជាក់ថា ប្រតិបត្តិការជោគជ័យរបស់កងទ័ពបួគីណាហ្វាសូនេះ គឺបានធ្វើមុនពេលមានរដ្ឋប្រហារ។ កាលពីថ្ងៃព្រហស្បតិ៍ទី២៧មករា លោកប្រធានាធិបតីបួគីណាហ្វាសូ ត្រូវបានកងទ័ពធ្វើរដ្ឋប្រហារទម្លាក់ពីតំណែង ដោយសារតែអសមត្ថភាពមិនអាចដោះស្រាយបញ្ហាសន្តិសុខ។ មេបញ្ជាការកងទ័ពបួគីណាហ្វាសូ Paul-Henri Sandaogo Damiba ដែលបានប្រកាសដឹកនាំប្រទេសបណ្តោះអាសន្ន បានអះអាងថា ខ្លួនត្រូវការជំនួយពីសម្ព័ន្ធមិត្ត ហើយធានាថានឹងគោរពសិទ្ធិមនុស្ស ព្រមទាំងភាពឯករាជ្យនៃប្រព័ន្ធតុលាការ៕
គួរបញ្ជាក់ដែរថា មិនខុសពី ម៉ាលី និងនីហ្សេ បួគីណាហ្វាសូ បានធ្លាក់ទៅក្នុងវិបត្តិអសន្តិសុខ បង្កឡើងដោយក្រុមបណ្តាញជីហាតជាច្រើនក្រុម មានក្រុមជីហាតអង្គការរដ្ឋអ៊ីស្លាម និងក្រុមអាល់កៃដា ជាដើម។ នៅបួគីណាហ្វាសូ ក្រៅពីបានសម្លាប់ជីវិតជនស្លូតត្រង់ប្រមាណ២០០០នាក់ ក្រុមជីហាតភេរវកម្ម បានធ្វើឲ្យប្រជាជនប្រមាណ១.៥លាននាក់ រត់ភៀសខ្លួនពីផ្ទះសម្បែង៕អូ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ