ជម្លោះអ៊ីស្រាអែល-ប៉ាឡេស្ទីន បង្កើតភាពចម្រូងចម្រាស់ក្នុងវេទិកាកំពូល នៃសហព័ន្ធអាហ្វ្រិក
សហព័ន្ធអាហ្វ្រិក ដែលមានប្រទេសសមាជិកចំនួន៥៥ប្រទេស បានបើកវេទិកាកំពូលប្រចាំឆ្នាំរបស់ខ្លួន នៅទីក្រុងដាឌីស អាបេបា ប្រទេសអេត្យូពី កាលពីថ្ងៃសៅរ៍ ទី៥កុម្ភៈម្សិលមិញ។ ជម្លោះរវាងអ៊ីស្រាអែល និងប៉ាឡេស្ទីន បានក្លាយជាចំណោទ ធ្វើឲ្យមានការជជែកគ្នា យ៉ាងតឹងតែងក្នុងវេទិកានេះ។ តំណាងអាជ្ញាធរប៉ាឡេស្ទីន បានបរិហារការសម្រេចរបស់លោកប្រធានគណកម្មាធិការសហព័ន្ធអាហ្វ្រិក ដែលបានអនុញ្ញាតផ្តល់សិទ្ធិឲ្យអ៊ីស្រាអែល ចូលរួមស្ដាប់ និងតាមដានកិច្ចប្រជុំ របស់សហព័ន្ធអាហ្វ្រិក។ ជាការសម្រេចដែលប៉ាឡេស្ទីន ចាត់ទុកថាជាការប្រមាថមកលើការឈឺចាប់របស់ប្រជាជនប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០២:៥៣
កាលពីខែកក្កដាកន្លងទៅ លោក Moussa Faki Mahamat ប្រធានគណកម្មាធិការសហព័ន្ធអាហ្វ្រិក បានសម្រេចផ្តល់សិទ្ធិឲ្យអ៊ីស្រាអែល បញ្ជូនតំណាងមកចូលរួម នៅក្នុងកិច្ចប្រជុំនានារបស់សហព័ន្ធអាហ្វ្រិក។ ជាការសម្រេច ដែលត្រូវបានប្រទេសសមាជិកមួយចំនួន ដូចជា អាល់ហ្សេរី និងអាហ្វ្រិកខាងត្បូងជាដើម បង្ហាញការជំទាស់។ តាមការគ្រោងទុក នៅថ្ងៃអាទិត្យទី៦ កុម្ភៈនេះ សមាជិកទាំង៥៥នៃសហព័ន្ធអាហ្វ្រិក នឹងត្រូវជជែកគ្នា ហើយបោះឆ្នោតសម្រេច លើបញ្ហានេះ។
កាលពីថ្ងៃសៅរ៍ទី ៥កុម្ភៈ នៅក្នុងពេលបើកវេទិកាប្រចាំឆ្នាំ លោក Mohammed Shtayyeh នាយករដ្ឋមន្ត្រីនៃអាជ្ញាធរប៉ាឡេស្ទីន បានថ្លែងថា ការអនុញ្ញាតឲ្យអ៊ីស្រាអែល មានសិទ្ធិចូលរួមនៅក្នុងវេទិកា ក៏ដូចជាការប្រជុំនានា នៃសហព័ន្ធអាហ្វ្រិក វាប្រៀបបីដូចជាការលើកតម្លៃអ៊ីស្រាអែល ទាំងដែលគ្រប់គ្នាដឹងថា អ៊ីស្រាអែលបានធ្វើអំពើរំលោភបំពានអ្វីខ្លះ មកលើប៉ាឡេស្ទីន។ តំណាងអាជ្ញាធរប៉ាឡេស្ទីនរូបនេះបន្ថែមថា ជីវភាពប្រចាំថ្ងៃរបស់ប្រជាជនប៉ាឡេស្ទីន កាន់តែលំបាកខ្លាំងឡើងជាលំដាប់ ដោយសារតែគោលនយោបាយឈ្លានពាន របស់អ៊ីស្រាអែល។
គួរបញ្ជាក់ថា ប៉ាឡេស្ទីន ត្រូវបានសម្ព័ន្ធអាហ្វ្រិកផ្តល់សិទ្ធិឲ្យចូលរួមក្នុងកិច្ចការប្រជុំនានា តាំងតែពីឆ្នាំ២០១៣មក។ នៅក្នុងសន្ទរកថាបើកវេទិកា កាលពីថ្ងៃទី៥កុម្ភៈ លោក Moussa Faki បានការពារការសម្រេចរបស់លោក ដោយបានអះអាងថា ការសម្រេចនេះ វាមិនប៉ះពាល់អ្វីដល់ការប្តេជ្ញាចិត្តរបស់សម្ព័ន្ធអាហ្វ្រិក ក្នុងការជួយជ្រោមជ្រែងប៉ាឡាស្ទីន ឲ្យបានទទួលឯករាជ្យនោះឡើយ។ លោកបន្ថែមថា ផ្ទុយទៅវិញ ការផ្តល់សិទ្ធិឲ្យអ៊ីស្រាអែល នៅក្នុងសម្ព័ន្ធអាហ្វ្រិកដែរ គឺវាជាការបើកផ្លូវមួយ ដើម្បីឈានៅទៅកសាងសន្តិភាព រវាងអ៊ីស្រាអែល និងប៉ាឡេស្ទីន។
គួរកត់សំគាល់ថា ក្រៅពីសំណុំរឿងអ៊ីស្រាអែល ប៉ាឡេស្ទីន សហព័ន្ធអេហ្វ្រិក កំពុងពើបប្រទះនឹងបញ្ហាផ្សេងៗទៀតជាច្រើន ដែលទាមទារឲ្យមានដំណោះស្រាយ។ ប្រទេសអេត្យូពីខ្លួនឯង ដែលជាអ្នករៀបចំបើកវេទិកាប្រចាំឆ្នាំនេះ បានរងនូវការរិះគន់ជាច្រើន ពីអង្គការមនុស្សធម៌ ទាក់ទិននឹងសង្គ្រាមផ្ទុះអាវុធ នៅតំបន់ទីហ្ក្រេ ដែលបានផ្តាច់ជីវិតមនុស្សជាច្រើនពាន់នាក់។ បន្ថែមពីនេះទៀត ប្រទេសសមាជិកសម្ព័ន្ធអាហ្វ្រិកកាន់តែច្រើនឡើង បានឆ្លងកាត់រដ្ឋប្រហារយោធាជាបន្តបន្ទាប់ តួយ៉ាង ម៉ាលី ហ្គីណេ ស៊ូដង់ និងបួគីណាហ្វាសូជាដើម។ ទោះជា ប្រទេសទាំង៤នេះ ត្រូវបានក្រុមប្រឹក្សាសន្តិភាព និងសន្តិសុខនៃសហព័ន្ធអាហ្វ្រិក សម្រេចព្យួរឈ្មោះ តែយ៉ាងណា សហព័ន្ធអាហ្រ្វិកនៅតែត្រូវគេរិះគន់ ថាខ្វះភាពទៀតទាត់ និងសច្ចភាព។
ក្រៅពីបញ្ហានយោបាយ និងសន្តិសុខ វេទិកាកំពូលប្រចាំឆ្នាំនាពេលនេះ ក៏ត្រូវផ្តោតសំខាន់ផងដែរ ទៅលើការប្រយុទ្ធប្រឆាំងជម្ងឺកូវីដ១៩។ គិតមកត្រឹមពេលនេះ ក្នុងចំណោមប្រជាជនអាហ្វ្រិកជាង១ពាន់លាននាក់ មានតែ១១%ប៉ុណ្ណោះដែលបានទទួលការចាក់វ៉ាក់សាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ