របបសិកម៉ាលី បិទវិទ្យុបារាំង RFI និងបណ្ដាញទូរទស្សន៍ France 24 លែងឲ្យផ្សាយ
របបសិកម៉ាលី បានចេញលិខិតប្រកាសមួយ កាលពីព្រឹកថ្ងៃព្រហស្បតិ៍ ទី១៧មីនា ដោយបានសម្រេច បិទលែងឲ្យផ្សាយ នូវវិទ្យុបារាំងអន្តរជាតិ RFI និងបណ្ដាញទូរទស្សន៍ France 24 នៅក្នុងប្រទេសម៉ាលី។ របបសិកម៉ាលី បានចោទបណ្តាញព័ត៌មានបារាំងទាំង២នេះ ថាបានផ្សព្វផ្សាយព័ត៌មានមិនពិត ដែលថាកងទ័ពម៉ាលីបានធ្វើសកម្មភាពកាប់សម្លាប់ប្រជាជនស៊ីវីល។ លោកម៉ាក្រុង បានថ្កោលទោសការសម្រេចរបស់របបសិកម៉ាលីនេះ ថាជារឿងធ្ងន់ធ្ងរ ព្រោះវាបំពាននឹងសិទ្ធិសេរីភាពសារព័ត៌មាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ចាប់ពីពេលនេះទៅ វិទ្យុបារាំងអន្តរជាតិ RFI និងបណ្ដាញទូរទស្សន៍ France 24 មិនអាចដំណើរការផ្សាយ នៅក្នុងប្រទេសម៉ាលីបានទៀតទេ។ បណ្តាញព័ត៌មានក្នុងស្រុក ក៏មិនអាចយកកម្មវិធីផ្សាយ របស់បណ្តាញព័ត៌មានបារាំងទាំង២នេះ មកផ្សាយបន្តបានដែរ។ លិខិតប្រកាស របស់អ្នកនាំពាក្យរបបសិកម៉ាលី ដោយបានចោទថា បណ្តាញព័ត៌មានរបស់បារាំងទាំង២នេះ បានផ្សព្វផ្សាយព័ត៌មានមិនពិត តាមរយៈការផ្សាយសំដីសាក្សី និងជនរងគ្រោះជាច្រើននាក់ ដែលអះអាងថាបានរងសកម្មភាពធ្វើទុក្ខបុកម្នេញ និងការកាប់សម្លាប់ ពីសំណាក់កងទ័ពម៉ាលី និងក្រុមទាហានស៊ីឈ្នួល Wagner របស់រុស្ស៊ី។ ការផ្សព្វផ្សាយបែបនេះ គឺប្រឆាំងនឹងកេរ្តិ៍ឈ្មោះ និងវីរៈភាព របស់កងទ័ពម៉ាលីដ៏ក្លាហាន។
គួររំលឹកថា ការសម្រេចហាមឃាត់ការផ្សាយ របស់វិទ្យុបារាំង RFI និងបណ្ដាញទូរទស្សន៍ France 24 ពីសំណាក់របបសិកម៉ាលី នាពេលនេះ គឺវាស្ថិតក្នុងបរិបទ ដែលរបបសិកនេះ កំពុងតែប្រើយុទ្ធនាការស្អប់ និងស្តីបន្ទោសបារាំងគ្រប់រូបភាព។ កាលពីចុងខែកុម្ភៈ របបសិកម៉ាលី បានបណ្តេញឯកអគ្គរដ្ឋទូតបារាំងចេញពីប្រទេស។ ក្រោយមកនៅថ្ងៃទី១៨កុម្ភៈ រដ្ឋាភិបាលបារាំង បានសម្រេចដកទ័ពចេញពីម៉ាលី បន្ទាប់ពីបានធ្វើបេសកកម្មប្រឆាំងក្រុមជីហាតភេរវកម្ម អស់រយៈពេល៩ឆ្នាំកន្លងមក។
ព្រឹកថ្ងៃសុក្រ ទី១៨មីនា លោកអេម៉ានុយអែល ម៉ាក្រុង បានប្រតិកម្មចំពោះការសម្រេចរបស់របបសិកម៉ាលី ថាវាជារឿងធ្ងន់ធ្ងរ។ លោកបានអំពាវនាវ ឲ្យអង្គការសហប្រតិបត្តិការអាហ្វ្រិកខាងលិច ហៅកាត់ថា Cédéao ត្រូវតែចេញវិធានការអ្វីមួយ ដើម្បីបិទបញ្ចប់សកម្មភាពហិង្សា នៅប្រទេសម៉ាលី ព្រមទាំងការពារសិទ្ធិសេរីភាពរបស់អ្នកកាសែត ក៏ដូចជារបស់សិទ្ធិប្រជាពលរដ្ឋម៉ាលី ក្នុងការទទួលបានព័ត៌មាន។
គួរបញ្ជាក់ថា វិទ្យុបារាំង RFI និងបណ្ដាញទូរទស្សន៍ France 24 គឺជាបណ្តាញព័ត៌មាន ដែលប្រជាជននៅទ្វីបអាហ្វ្រិក និយមតាមដានបំផុត។ ជារៀងរាល់សប្តាហ៍ ប្រជាជនម៉ាលីយ៉ាងហោច ១ភាគ៣ តាមដានស្តាប់និងទស្សនាការផ្សាយ របស់បណ្តាញព័ត៌មានបារាំងទាំង២នេះ។ នាប៉ុន្មានខែចុងក្រោយនេះ គេសង្កេតឃើញថា របបសិកម៉ាលី មានបំណងរឹតបន្តឹងការគ្រប់គ្រង ការផ្សព្វផ្សាយព័ត៌មាន។ ជាក់ស្តែង កាលពីថ្ងៃទី៨កុម្ភៈ របបសិកម៉ាលី បានបណ្ដេញអ្នករាយការណ៍ម្នាក់ របស់បណ្តាញព័ត៌មានបារាំងឯករាជ្យមួយទៀត ឈ្មោះ "Jeune Afrique »។
គួរកត់សំគាល់ថា ដំណឹងស្តីពីសកម្មភាពហិង្សា កាប់សម្លាប់ប្រជាជនស៊ីវីល បង្កឡើងដោយកងទ័ពម៉ាលី ត្រូវបានអង្គការ Human Rights Watch អះអាងផងដែរ កាលពីថ្ងៃទី១៥មីនា ដោយលើកឡើងថា យ៉ាងហោចប្រជាជនស៊ីវីលចំនួន ១០៧នាក់ ត្រូវបានគេសម្លាប់ បើគិតពីខែធ្នូមក។ យ៉ាងណាមិញ លោកស្រី មីឈែល បាឆឡេ ឧត្តមស្នងការទទួលបន្ទុកសិទ្ធិមនុស្ស បានលើកឡើងកាលពីថ្ងៃទី៨មីនា ថារបបសិកម៉ាលី កំពុងតែបំពានច្បាប់់អន្តរជាតិ សិទ្ធិមនុស្ស និងសិទ្ធិមនុស្សមនុស្សធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ