សន្និសីទអ.ស.ប.ប្រឆាំងនឹងការបង្ខូចដី លើកទី១៥ ចាប់បើកនៅ Abidjan
សន្និសីទអង្គការសហប្រជាជាតិប្រឆាំងនឹងការបោះបង់ដី COP15 ដែលប្រព្រឹត្តទៅនៅរដ្ឋធានីប្រទេសកូដឌីវ័រ ចាប់ពីថ្ងៃចន្ទទី ៩ឧសភា ២០២២ សម្រាប់រយៈពេល១០ថ្ងៃ ចង់រកឱ្យបាននូវមធ្យោបាយសម្រាប់ប្រយុទ្ធប្រឆាំងការរីកដីវាលរហោស្ថាន ការកាប់ព្រៃឈើ និង ការខ្សោះដី ឬការបំពុលដី។ សន្និសីទបានការចូលរួមពីប្រទេសចំនួន១៩៦ និងដោយមានប្រមុខរដ្ឋ-រដ្ឋាភិបាលប្រទេសរងគ្រោះផ្ទាល់ ជាអ្នកបើកកម្មវិធីផង។
ចុះផ្សាយនៅថ្ងៃ៖
ស្តាប់ - ០២:០៧
មិនល្បីដូចសន្និសីទអាកាសធាតុមែន តែសន្និសីទប្រឆាំងនឹងការបោះបង់ដី លើកទី១៥ ឬសរសេរកាត់ដូចគ្នាថា COP15 ក៏ជជែកពិភាក្សាអំពីបញ្ហាដ៏សំខាន់ខ្លាំងសម្រាប់ផែនដីដែរ ព្រោះបើតាមអង្គការសហប្រជាជាតិ ផ្ទៃដីនៅលើពិភពលោកចំនួន៤១% បានខូចខាត។ ល្បឿននៃបង្ខូចដី (ដោយធម្មជាតិ និងដោយស្នាដៃមនុស្ស) កើនលឿនជាលំដាប់ ក្នុងកំរិតប្រមាណ ១២ពាន់លានហិចតារ ពោលគឺស្មើនឹងផ្ទៃក្រឡាប្រទេសបេណាំងឬប៊ែលហ្សិក ឯណោះក្នុងមួយឆ្នាំៗ។ ទ្វីបអាហ្វ្រិកប្រឈមនឹងគ្រោះបោះបង់ចោលដីធ្ងន់ធ្ងរជាងគេ ជាពិសេសដីនៅតាមបណ្តោយវាលខ្សាច់សាហារ៉ា។
ហេតុដូច្នេះហើយបានជាប្រមុខរដ្ឋ-ប្រមុខរដ្ឋាភិបាល នៃប្រទេសលើទ្វីបអាហ្វ្រិកចំនួន៩ ដែលរងផលប៉ះពាល់ផ្ទាល់ មានជាអាទិ៍ប្រធានាធិបតីនីហ្សេរីយ៉ា កុងហ្កោ តុងហ្កោ ... បានបង្ហាញវត្តមានដោយផ្ទាល់ក្នុងអង្គសន្និសីទ ក្បែរប្រធានាធិបតីកូដឌីវ័រ។ ប្រធានាធិបតីបារាំងលោក អេម៉ាណុយអែល ម៉ាក្រុង និងប្រធានគណៈកម្មការអឺរ៉ុប លោកស្រី អួរស៊ូឡា វ៉ុនឌែរ ឡេយែន ចូលរួមតស៊ូមតិពីចម្ងាយតាមប្រព័ន្ធវីដេអូ។
ក្រុមអ្នកចរចាទាំង១៩៦ប្រទេស ដែលបង្ហាញវត្តមានក្នុងសន្និសីទ១០ថ្ងៃនេះ ចង់សាកល្បងស្វែងរកឱ្យឃើញនូវការព្រមព្រៀងគ្នាជុំវិញវិធានការជាក់ស្តែងសម្រាប់បញ្ឈប់កំណើននៃបំផ្លាញបោះបង់ចោលដី ក្នុងរយៈពេល១០ឆ្នាំ ខាងមុខ។ ក្រោមប្រធានបទ “ដី ជីវិត បេតកភ័ណ្ឌ ៖ ពីពិភពលោកមិនទៀងឆ្ពោះទៅអនាគតរុងរឿង” សន្និសីទCOP15 អំពាវនាវឱ្យពិភពលោកបញ្ចេញសកម្មភាពធ្វើយ៉ាងណាថែរក្សាដី ដែលជាប្រភពទ្រទ្រង់ជីវិតរបស់ផែនដី ឱ្យនៅជាប្រយោជន៍សម្រាប់ក្មេងជំនាន់នេះនិងជំនាន់ក្រោយ។
ស្ថាប័នអង្គការសហប្រជាជាតិដដែលបានគូសបញ្ជាក់ទៀតថា សន្និសីទនឹងចាប់អារម្មណ៍ជាពិសេសទៅលើការស្តារដីខូចខាតជាង១ពាន់លានហិចតារ ពីពេលនេះដល់ឆ្នាំ២០៣០ធានាឱ្យដីតែអាចប្រើប្រាស់បានបើទោះបីរងឥទ្ធិពលពីការប្រែប្រួលអាកាសធាតុ ហើយប្រយុទ្ធប្រឆាំងនឹងកំណើនគ្រោះហានិភ័យធម្មជាតិ ដូចជាភាពរាំងស្ងួត ព្យុះដីខ្សាច់ និងភ្លើងឆេះព្រៃ។
គម្រោងសាងសង់ជញ្ជាំងបរិស្ថាន ដែលចង់ស្តារដីខ្សោះចំនួន១០០លានហិចតារនៅអាហ្វ្រិកពីពេលនេះដល់ឆ្នាំ២០៣០ តាមបណ្តោយវាលខ្សាច់ប្រវែង៨០០០គីឡូម៉ែត្រ ចាប់ពីប្រទេសសេណេហ្កាល់ (អាហ្វ្រិកចុងខាងលិច) ទៅដល់ប្រទេសជីប៊ូទី (អាហ្វ្រិកចុងខាងកើត៌ ក៏នឹងត្រូវលើកមកពិភាក្សានៅក្នុងសន្និសីទនេះដែរ ដើម្បីអាចបញ្ចប់បាននៅថ្ងៃទី ២០ឧសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ