ការប្រយុទ្ធប្រឆាំងនឹងពលកម្មកុមារត្រូវយឺតយ៉ាវដោយសារតែជំងឺកូវីដ១៩
យ៉ាងហោចណាស់ មានកុមារម្នាក់ នៅក្នុងចំណោម១០នាក់ ត្រូវបង្ខំឱ្យធ្វើការងាររកប្រាក់កម្រៃ។ នេះបើតាមការលើកឡើងក្នុងរបាយការណ៍របស់ អង្គការពលកម្មអន្តរជាតិ នៅក្នុងសន្នីសីទពិភពលោកលើកទី៥ ស្តីពីការលុបបំបាត់ពលកម្មកុមារ ដែលរៀបចំនៅប្រទេសអាហ្វ្រិកខាងត្បូង។ អង្គការពលកម្មអន្តរជាតិ ក៏បានបញ្ជាក់ដែរថា វិបត្តិជំងឺកូវីដ១៩ បានកាន់តែបង្ខំឱ្យក្មេងៗធ្វើការរកលុយជួយគ្រួសារ ហើយវិបត្តិនេះគំរាមកំហែង និង ពន្យឺត ដល់ការព្យាយាមលុបបំបាត់ពលកម្មកុមារ។ សូមជ្រាបថា អង្គការសហប្រជាតិ មានទិសដៅលុបបំបាត់ពលកម្មកុមារនៅឆ្នាំ២០២៥ ហើយនិង លុបបំបាត់ការធ្វើការងារដោយបង្ខំ នៅឆ្នាំ២០៣០។
ចុះផ្សាយនៅថ្ងៃ៖
ស្តាប់ - ០២:០៤
អគ្គលេខាធិការ សន្នីសីទពិភពលោកលើកទី៥ រៀបចំដោយអង្គការពលកម្មអន្តរជាតិ បានបញ្ជាក់ក្នុងសេចក្តីសន្នីដ្ឋាន បិទបញ្ជប់កម្មវិធីប្រជុំ៥ថ្ងៃមកនេះ ថា ពលកម្មលើកុមារ គឺរងគ្រោះកាន់តែខ្លាំងឡើងៗពិសេសនៅក្នុងឱកាសជួបវិបត្តិកូវីដ១៩ ហើយកុមារចំនួនច្រើនណាស់ ដែលត្រូវបោះបង់ការរៀនសូត្រ លាដៃចាកចោលដំបូលសាលារៀន ហើយធ្លាក់ចូលកន្លែងទីផ្សារការងារ។
ក្រៅពីកូវីដ១៩ គឺនៅមានហេតុផលផ្សេងទៀត ដូចជាជម្លោះប្រដាប់អាវុធ សង្គ្រាម វិបត្តិខ្វះស្បៀងចំណីអាហារ វិបត្តិមនុស្សធម៌ និងការប្រែប្រួលអាកាសធាតុ ក៏បានធ្វើឱ្យការខិតខំប្រឹងប្រែងលុបបំបាត់ពលកម្មលើកុមារ ត្រូវជួបការលំបាក និងជួបភាពយឺតយ៉ាវ។ នេះបើតាម អង្គការពលកម្មអន្តរជាតិ ហើយនិង លើកឡើងថា នៅក្នុងចំណោមការងាររបស់កុមារ ចំពោះប្រទេសនៅក្នុងទ្វីបអាហ្វ្រិក គឺ ៧០% លើវិស័យកសិកម្ម ហើយភាគច្រើនក្នុងបរិបទដែលពួកក្មេងៗត្រូវជំរុញឱ្យជួយការងារម្តាយឪពុក។
តាមទិដ្ឋន័យរបស់អង្គការសហប្រជាជាតិ គិតត្រឹមឆ្នាំ២០២០ មានក្មេងៗ ចំនួន ១៦០លាននាក់ ធ្វើការងារ។ ចំនួននេះ គឺកើនឡើន ៨,៤លាននាក់ ក្នុងរយៈពេល៤ឆ្នាំចុងក្រោយ ហើយក្នុងចំណោមក្មេងៗទាំងនោះ គឺមានប្រហែលជាពាក់កណ្តាលត្រូវបង្ខំចិត្តធ្វើការងារដែលអាចនាំឲ្យមានការប្រឈមគ្រោះថ្នាក់ដល់រាងកាយនិងផ្លូវចិត្តរបស់ពួកគេ។
ក្នុងចំណោមកុមារដែលចាប់ផ្តើមធ្វើការថ្មីៗ គេសង្កេតឃើញថាមានក្មេងចន្លោះពី៥ទៅ១១ឆ្នាំ មានចំនួនកើនឡើង។ លោក Gilbert Houngbo អគ្គលេខាធិការ របស់ អង្គការពលកម្មអន្តរជាតិ បាននិយាយថា ក្មេងៗ ទាំងប្រុសស្រី ចង់ និងត្រូវការ លេងកម្សាន្ត រៀនសូត្រ ធំធាត់ និងទទួលការព្យាបាលត្រឹមត្រូវ មុននឹងអាចទទួលការងារធ្វើនៅពេលធំពេញវ័យ។ ក៏ប៉ុន្តែ គេបានបដិសេធចំពោះសិទ្ធិទាំងអស់នេះ។ នេះជារឿងមិនអាចទទួលយកបាន និងខុសពីមនសិការ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ