បារាំង ដកទ័ពចេញទាំងស្រុងពីប្រទេសម៉ាលី
ក្រុមទាហានបារាំងចុងក្រោយបានចាកចេញពីប្រទេសម៉ាលីកាលពីថ្ងៃចន្ទនេះ បញ្ចប់ការអន្តរាគមន៍យោធារបស់បារំងដែលមានរយៈពេល៩ឆ្នាំមកហើយ។ កងកម្លាំងបារាំងបានគាំទ្ររដ្ឋាភិបាលប្រទេសម៉ាលីប្រឆាំងនឹងពួកបះបោរជិតមួយទសវត្សរ៍មកហើយ ប៉ុន្តែប្រធានាធិបតីលោក អេម៉ានុយអែល ម៉ាក្រុងបានសម្រេចចិត្តដកទព័ចេញ បន្ទាប់ពីរបបយោធាម៉ាលីឡើងកាន់អំណាចកាលពីខែសីហាឆ្នាំទៅនេះ។
ចុះផ្សាយនៅថ្ងៃ៖
ស្តាប់ - ០១:៥៤
ទំនាក់ទំនងរវាងប្រទេសម៉ាលី និងទីក្រុងប៉ារីសបានបែកបាក់ បន្ទាប់ពីរបបយោធាបានឡើងកាន់អំណាចហើយ អំពើហឹង្សារបស់ពួកជីហាដនិយមបានកើនឡើងនៅក្នុងតំបន់។ ជនស៊ីវិលជាង ២ពាន់ នាក់ត្រូវបានសម្លាប់នៅក្នុងប្រទេសម៉ាលី នីហ្សេរីយ៉ា និងប្រទេស បួគីណា ហ្វាសូ អាហ្រ្វិកខាងលិចចាប់តាំងពីដើមឆ្នាំនេះមក ផ្អែកលើការរកឃើញរបស់អង្គការមិនមែនរដ្ឋាភិបាលមួយ។
ភាពមិនពេញចិត្តរបស់ប្រទេសបារាំងបានកើតមានពេលដែរ របបយោធានេះបានពន្យារពេលផ្ទេរសិទ្ធគ្រប់គ្រងដល់រដ្ឋាភិបាលស៊ីវិល និងបានទទួលយកទាហានស៊ីឈ្នួលរុស្ស៊ីចូលមកក្នុងប្រទេស។
ប្រធានាធិបតីបារាំង កាលពីថ្ងៃចន្ទនេះបានធ្វើការអបអរសាទកោតសរសើរទៅលើកងកម្លាំងបារាំង ដែលក្នុងរយៈពេលប្រាំបួនឆ្នាំកន្លងមកនេះបានជួយ រារាំងការគ្រប់គ្រងរបស់ក្រុមជីហាដ ហើយបានប្រយុទ្ធប្រឆាំងនឹងភេរវជន ដែលបានវាយប្រហារប្រជាជនក្នុងតំបន់ និងបានគំរាមកំហែងដល់សន្តិភាពរបស់សហភាពអឺរ៉ុប។ លោកក៏បន្ថែមទៀតថា ទោះមានទាហានបារាំង ៥៩ នាក់បានស្លាប់នៅក្នុងប្រទេសម៉ាលីក៏ដោយ សមាជិកជាន់ខ្ពស់ភាគច្រើននៃក្រុមភេរវកម្មត្រូវបាន លុបបំបាត់។
យ៉ាងណាមិញប្រទេសបារាំងនឹងរក្សាទាហានជាង ១ពាន់នាក់នៅក្នុងប្រទេសនីហ្សេរីយ៉ាដែលប្រទេសជិតខាងរបស់ម៉ាលី ហើយក៏ជា ប្រទេសក្រីក្របំផុតនៅក្នុងពិភពលោក តែងរងការវាយប្រហារយ៉ាងធ្ងន់ធ្ងរ ពីក្រុមជីហាដនិយម ដែលបានចាប់ផ្តុំគ្នាឡើងនៅភាគខាងជើងប្រទេសម៉ាលីកាលពីឆ្នាំ ២០១២។ ប្រទេសនីហ្សេរីយ៉ានេះ បានទទួលជំនួយដ៏ធំបំផុតពីបារាំង ចំនួនជាង មួយរយសែសិបលានអឺរ៉ូ កាលពីឆ្នាំមុន។
រដ្ឋមន្ត្រីការបរទេសបារាំង បានប្រាប់សមាជិកសភាថា ហានិភ័យលទ្ធិប្រជាធិបតេយ្យនៅអាហ្រ្វិកខាងលិចកំពុងតែមានការកើនឡើង ហើយបញ្ជាក់ថាទោះជាយ៉ាងណាក៏ដោយ បារាំងនឹងនៅតែបន្តជួយកងទ័ពនៅក្នុងតំបន់ ដើម្បីប្រយុទ្ធប្រឆាំងនឹងក្រុមភេរវជនដដែល។
ប្រធានាធិបតីបារាំងលោក ម៉ាក្រុង កាលពីខែមិថុនានេះ ក៏បានស្នើឱ្យរដ្ឋាភិបាល និងប្រមុខយោធា គិតឡើងវិញអំពីវត្តមានទាំងមូលរបស់បារាំងនៅលើទ្វីបអាហ្រ្វិក។ គាត់បានអំពាវនាវឱ្យ គួរមានការ បង្កើនទំនាក់ទំនងឲ្យកាន់តែជិតស្និទ្ធ ជាមួយកងកម្លាំងតាមតំបន់ តែគួរកាត់បន្ថយវត្តមានយោធាកុំឲ្យមានភាពធំដុំពេក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ