ម៉ាលីទាមទារកិច្ចប្រជុំបន្ទាន់នៅក្រុមប្រឹក្សាសន្តិសុខ ដោយចោទបារាំងថារំលោភអធិបតេយ្យភាព
របបសិកម៉ាលី បានធ្វើលិខិតមួយ ទាមទារឲ្យមានការប្រជុំបន្ទាន់ នៅក្រុមប្រឹក្សាសន្តិសុខនៃអង្គការសហប្រជាជាតិដោយចោទថាបារាំង បានធ្វើសកម្មភាព “គំរាមកំហែង” និង “រំលោភអធិបតេយ្យភាព” របស់ខ្លួន។ លិខិតរបស់ក្រសួងការបរទេសម៉ាលីនេះ បានអះអាងថាកងទ័ពបារាំង បានធ្វើសកម្មភាពឈ្លបយកការណ៍ មកលើម៉ាលី ហើយថែមទាំងបានឃុបឃិត ជាមួយក្រុមជីហាតភេរវកម្ម ថែមទៀតផង។
ចុះផ្សាយនៅថ្ងៃ៖
នេះគឺជាការបោះជំហានថ្មីមួយទៀត នៃការរករឿង ចោទប្រកាន់ប្រឆាំងបារាំង ពីសំណាក់របបសិកម៉ាលី បន្ទាប់ពីរបបសិកនេះ បានធ្វើរដ្ឋប្រហារដណ្តើមអំណាច កាលពីខែសីហាឆ្នាំ២០២០ ហើយបានបណ្តេញកងទ័ពបារាំងចេញពីប្រទេសខ្លួន។
គួររំលឹកថា កងទ័ពបារាំងមានវត្តមាននៅម៉ាលី តាំងតែពីឆ្នាំ២០១២មក ដើម្បីប្រយុទ្ធប្រឆាំងនឹងក្រុមជីហាតភេរវកម្ម នៅតំបន់សាហ៊ែល។ លោក ប្រ៊ុយណូ បារ៉ាតស៍ (Bruno Baratz) មេបញ្ជាការកងទ័ពបារាំង ទទួលបន្ទុកប្រតិបត្តិការនេះ បានប្រតិកម្មលើកឡើងថា ការចោទពីសំណាក់របបសិកម៉ាលី ថាបារាំងឃុបឃិតជាមួយក្រុមជីហាតនេះ វាគឺជាការជេរប្រមាថមួយ មកលើកងទ័ពបារាំង ព្រមទាំងកងទ័ពមួកខៀវនៃអង្គការសហប្រជាជាតិ និងជាពិសេសនោះគឺវាជាការជេរប្រមាថដ៏ធ្ងន់ធ្ងរ មកលើវិញ្ញាណក្ខន្ធរបស់ទាហានបារាំងទាំង៥៩នាក់ ដែលបានស្លាប់បាត់បង់ជីវិត ក្នុងបុព្វហេតុការពារម៉ាលី ពីក្រុមជីហាតភេរវកម្ម។
សម្រង់ប្រសាសន៍របស់ លោក Bruno Baratz មេបញ្ជាការកងទ័ពបារាំងនៃប្រតិបត្តិការប្រឆាំងជីហាតភេរវកម្មនៅសាហ៊ែល
“ក្នុងនាមយើងជាកងទ័ពបារាំង យើងតែងតែមានតម្លាភាពច្បាល់លាសជានិច្ច ជាមួយនឹងអាជ្ញាធរម៉ាលី។ យើងយល់ថា ការចោទប្រកាន់នេះ វាគឺជាការជេរប្រមាថ មកលើវិញ្ញាណក្ខន្ធរបស់ទាហានបារាំងទាំង៥៩នាក់ ដែលបានស្លាប់ពលីជីវិត ក្នុងបុព្វហេតុជួយការពារប្រទេសម៉ាលី ព្រមទាំងទាហានម៉ាលីដែលបានជួយវាយប្រយុទ្ធជាមួយយើង ក៏ដូចជាកងទ័ព Manusma អាហ្វ្រិក នៃអង្គការសហប្រជាជាតិ ដែលបានស្លាប់បាត់បង់ជីវិត នៅក្នុងប្រតិបត្តិការជួយប្រយុទ្ធប្រឆាំងនឹងក្រុមជីហាតភេរវកម្ម។
វាជាការជេរប្រមាថ មកលើកយើង។ ជាងនេះទៀត យើងបានប្តេជ្ញាចិត្ត ធ្វើគ្រប់យ៉ាង តស៊ូប្រយុទ្ធរហូតដល់ទីបំផុត មិនទំលាក់ដៃទេ បើទោះបីជាស្ថិតក្នុងកាលៈទេសៈ កំពុងតែដកទ័ពចេញពីម៉ាលី ទៅតាមការទាមទាររបស់របបសិកនេះក៏ដោយ។ ជាក់ស្តែងដូចយើងបានដឹងហើយ ថាចុងក្រោយបំផុតនេះ កងទ័ពយើងបានប៉ះដៃគ្នាជាមួយក្រុមជីហាតអ៊ីស្លាមសាហ៊ែល ហើយយើងបានសម្លាប់សមាជិកក្រុមនេះចំនួន២នាក់។ ដូច្នេះវាគឺជារឿងដ៏ចម្លែកណាស់ ដែដែលមកចោទយើងថាឃុបឃិតជាមួយក្រុមជីហាតភេរវកម្ម បែបនេះទៅវិញ។”
សូមបញ្ជាក់ដែរថា យោងតាមប្រភពព័ត៌មានជាច្រើន គឺរបបសិកម៉ាលី កំពុងតែព្យាយាមបណ្តេញកងទ័ពសម្ព័ន្ធមិត្តដឹកនាំដោយបារាំង ហើយងាកទៅសហការជាមួយនឹងរុស្ស៊ីវិញ។ កងទ័ពបារាំងដកចេញមិនទាន់ផុតផង គេឃើញវត្តមានរបស់ជំនាញការទ័ពរុស្ស៊ី ចាប់ផ្តើមទៅដល់ម៉ាលីហើយ។ កាលពីថ្ងៃពុធម្សិលមិញ ប្រភពពីរដ្ឋាភិបាលអាល្លឺម៉ង់ អះអាងថា យ៉ាងហោចណាស់ មានទាហានរុស្ស៊ីពាក់ឯកសណ្ឋាន ប្រមាណ២០ ទៅ៣០នាក់ ត្រូវបានគេប្រទះឃើញ កំពុងតែទំលាក់សម្ភារៈពីលើយន្តហោះ នៅឯព្រលានយន្តហោះតំបន់ GAO មិនឆ្ងាយប៉ុន្មានពីមូលដ្ឋានទ័ពបារាំង និងបន្ទាយរបស់កងបេសកកម្មពិសេស នៃអង្គការសហប្រជាជាតិ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ