សូម៉ាលី ៧ខែស្លាប់ក្មេងប្រមាណ៣៧០នាក់ ដោយជំងឺខ្វះអាហារូបត្ថម្ភ
នៅរវាងពីខែមករាដល់ខែកក្កដា មានកុមារប្រមាណ៣៧០នាក់បានស្លាប់បាត់បង់ជីវិត នៅក្នុងមជ្ឈមណ្ឌលសង្គ្រោះ របស់អង្គការយូនីសេហ្វ។ នេះបើតាមការគូសបញ្ជាក់របស់មូលនិធិអង្គការសហប្រជាជាតិដើម្បីកុមារ ដែលយល់ថា អត្រាក្មេងស្លាប់ដោយជំងឺខ្វះអាហារ អាចមានចំនួនច្រើនជាងនេះខ្លាំងដោយជាក់ស្តែង។
ចុះផ្សាយនៅថ្ងៃ៖
ស្តាប់ - ០២:០១
សូម៉ាលីកំពុងស្ថិតនៅលើមាត់ជ្រោះនៃគ្រោះទុរ្ភិក្ស។ ចំនួនកុមារខ្វះអាហារូបត្ថម្ភ បានឡើងដល់កំរិតកំពូល មិនធ្លាប់មានពីមុនមកទេ។ នេះបើតាមសេចក្តីប្រកាសរបស់លោកស្រី Wafaa Saeed តំណាងអង្គការយូនីសេហ្វប្រចាំសូម៉ាលី ពីទីក្រុងហ្សឺណែវទៅកាន់អ្នកសារព័ត៌មាន។
ជាសរុបមានក្មេងប្រមាណ៣៧០នាក់បានស្លាប់ នៅក្នុងមណ្ឌលសង្គ្រោះនៅទូទាំងប្រទេស គិតចាប់ពីខែមករាដល់ខែកក្កដា២០២២។ អត្រាស្លាប់ដោយជំងឺខ្វះអាហារ មានកំរិតតែ ១%ទេ បើប្រៀបទៅចំនួនក្មេងដែលចូលមកព្យាបាលនៅក្នុងមជ្ឈមណ្ឌល ប៉ុន្តែតួលេខពិតជាក់ស្តែងក្នុងប្រទេសច្បាស់ជាខ្ពស់ខ្លាំងជាងនេះឆ្ងាយ ព្រោះមានករណីស្លាប់ច្រើន ដែលមិនបានចុះក្នុងបញ្ជី។ បើតាមការពន្យល់របស់លោកស្រី សាអ៊ីដ កុមារសូម៉ាលី អាយុក្រោម៥ឆ្នាំ ចំនួនពាក់កណ្តាល ពោលគឺស្មើនឹងប្រមាណ ១លាននាក់កន្លះ កំពុងមានជំងឺខ្វះអាហារូបត្ថម្ភស្រួចស្រាវ ហើយក្នុងចំណោមនោះ កុមារជាង៣៨៥០០០នាក់ ត្រូវការថ្នាំព្យាបាល ប្រឆាំងនឹងជំងឺខ្វះអាហារធ្ងន់ធ្ងរ។
បន្ថែមពីលើនេះទៅទៀត ទោះបីជាក្មេងសូម៉ាលី បានទទួលទានអាហារក្នុងបរិមាណប៉ុនណាក៏ដោយ ក៏ក្មេងទាំងនោះពុំអាចជាពីជំងឺបានដែរ បើគ្មានទឹកស្អាតបរិភោគទេនោះ។ នេះជាការអះអាងរបស់លោកស្រី សាអ៊ីដ ដោយបន្ថែមថា កុមារសូម៉ាលីប្រមាណជាង៤លាននាក់កន្លះកំពុងត្រូវការទឹកស្អាតជាបន្ទាន់។
ដោយហេតុភាពរាំងស្ងួត ប្រភពទឹកជាច្រើនបានរីង ឯច្រើនទៀតត្រូវស្ងួតព្រោះតម្រូវការខ្លាំងពេក។ រាំងស្ងួតកាន់តែខ្លាំង តម្លៃទឹកកាន់តែឡើងពី៥៥ទៅ៨៥% តាំងពីមករាមក។ បើតាមអង្គការសហប្រជាជាតិ ប្រជាជនសូម៉ាលីជិតពាក់កណ្តាល (៧,៨លាននាក់) កំពុងរងគ្រោះពីភាពរាំងស្ងួតជាប្រវត្តិសាស្ត្រនេះ ក្នុងនោះ ២១៣០០០នាក់ ក្នុងប្រឈមនឹងគ្រោះទុរ្ភិក្ស។ កាលពីឆ្នាំ២០១១-១២ គ្រោះទុរ្ភិក្សបានផ្តាច់ជីវិតជនសូម៉ាលីអស់២៦០០០០នាក់ ក្នុងនោះពាក់កណ្តាលជាក្មេងអាយុក្រោម៥ឆ្នាំ។
ក្តីព្រួយបារម្ភដ៏ធំមួយទៀត សម្រាប់យូនីសេហ្វ គឺនៅពេលក្មេងមានគ្រោះខ្វះអាហារស្រួចស្រាវកាន់តែច្រើន អត្រាមរណៈកុមារដោយជំងឺឆ្លងនិងរាតត្បាតក៏ឡើងខ្ពស់ទៅតាមនោះដែរ។ ជាក់ស្តែង ពេលនេះ សូម៉ាលី សង្កេតឃើញមានកុមារកើតជំងឺរាករូសលើសធម្មតា ៨៤០០ករណី និងជំងឺកញ្ជ្រិល១៣០០០ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ