លោកអគ្គលេខាធិការ អ.ស.ប ៖ ពិភពលោកមានជម្រើសតែ២ទេ សាមគ្គីគ្នា ឬ ស្លាប់ទាំងអស់គ្នា
វិបត្តិអាកាសធាតុ គឺជាភាពអាសន្ន ដែលកំពុងចោទឡើងមកលើមនុស្សជាតិយើងឲ្យដោះស្រាយ។ យោងតាមអង្គការឧតុនិយមពិភពលោក ៨ឆ្នាំកន្លងមកនេះ ផែនដីយើងបានឡើងកំដៅជាខ្លាំងមិនធ្លាប់មាន ធ្វើឲ្យប្រែប្រួលក្រឡាប់ចាក់ ដល់ប្រព័ន្ធអាកាធាតុសកល។ “ពិភពលោកយើង មានជម្រើសតែ២ទេ ទីមួយ គឺការសាមគ្គីគ្នា ទីពីរគឺស្លាប់ទាំងអស់គ្នា”។ នេះគឺជាសំដីថ្លែងរន្ធាន់ របស់លោកអង់តូនីញ៉ូ ហ្គូទែរស៍ អគ្គលេខាធិការអង្គការសហប្រជាជាតិ នៅក្នុងឱកាសបើកសន្និសីទពិភពលោកស្តីពីអាកាសធាតុ COP27 កាលពីថ្ងៃចន្ទ ទី៧វិច្ឆិកា។
ចុះផ្សាយនៅថ្ងៃ៖
លោកអង់តូនីញ៉ូ ហ្គូទែរស៍ បានអំពាវនាវ ឲ្យក្រុមប្រទេសអភិវឌ្ឍន៍ ប្រទេសកំពុងអភិវឌ្ឍន៍ត្រូវរួមសាមគ្គីគ្នា បង្កើតជា “កតិកាសញ្ញាសាមគ្គីដើម្បីអាកាសធាតុ” ប្រសិនបើមិនចង់ស្លាប់ទាំងអស់គ្នា ដោយសារគ្រោះមហន្តរាយអាកាសធាតុទេនោះ។ វាគឺជាកតិកាសញ្ញាដើម្បីជួយគ្នា ចាកចេញពីថាមពលហ្វូស៊ីល ដែលជាដើមហេតុចង្រៃ ធ្វើឲ្យផែនដីឡើងកំដៅ។
សម្រង់ប្រសាសន៍លោក អង់តូនីញ៉ូ ហ្គូទែរស៍ ថ្លែងបើកសន្និសីទCOP27
“ខ្ញុំសូមអំពាវនាវ ឲ្យមានការបង្កើត កាតិកាសញ្ញាជាប្រវត្តិសាស្ត្រមួយ រវាងក្រុមប្រទេសអ្នកមាន និងក្រុមប្រទេសកំពុងអភិវឌ្ឍន៍។ ជាកាតិកាសញ្ញាសាមគ្គីភាព ដើម្បីដោះស្រាយវិបត្តិអាកាសធាតុ។ តាមរយៈកាតិកាសញ្ញានេះ ប្រទេសទាំងអស់នឹងរួមគ្នា ប្រឹងប្រែងបន្ថែមទៀត ក្នុងរយៈពេល១០ទៅមុខ ដើម្បីកាត់បន្ថយការបញ្ចេញឧស្ម័នផ្ទះកញ្ចក់។
ជាមួយកតិកាសញ្ញានេះ ប្រទេសអ្នកមានជីវភាពល្អ និងស្ថាប័នហិរញ្ញវត្ថុអន្តរជាតិ នឹងជួយផ្តល់ជាជំនួយថវិកា ព្រមទាំងជំនួយចំណេះដឹងបច្ចេកទេស ឲ្យដល់ប្រទេសកំពុងអភិវឌ្ឍន៍ ដើម្បីឲ្យពួកគេ អាចបន្ថែមល្បឿន ដល់ការធ្វើអន្តរកម្មថាមពល។
កតិកាសញ្ញានេះ នឹងជម្រុញឲ្យពិភពលោក បានប្រើប្រាស់ថាមពលស្អាតស្អំ ថាមពលកកើតឡើងវិញទាំងអស់គ្នា។ មហាអំណាចសេដ្ឋកិច្ចដ៏ធំជាងគេទាំង២ គឺចិននិងសហរដ្ឋអាមេរិក គួរតែមានការទទួលខុសត្រូវជាពិសេសជាងកេ ក្នុងការសម្រេចឲ្យបាននូវសម្ព័ន្ធសាមគ្គីភាពនេះ។ ព្រោះថាសេចក្តីសង្ឃឹមរបស់យើងទាំងអស់គ្នា ក្នុងការឈានទៅសម្រេចកម្មវត្ថុដោះស្រាយវិបត្តិអាកាសធាតុ គឺវាស្ថិតនៅលើកតិកាសញ្ញានេះហើយ។ យើងមានជម្រើសតែ២ទេ រវាង កាតិកាសញ្ញាសាមគ្គីភាពអាកាសធាតុ ឬពុំដូច្នោះទេ គឺកតិកាសញ្ញាធ្វើអត្តឃាត ស្លាប់រួមគ្នា៕”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ