អង្គការសុខភាពពិភពលោកអំពាវនាវឲ្យប្រឹងប្រែងទ្វេដង ប្រយុទ្ធនឹងជំងឺគ្រុនចាញ់
ជម្ងឺគ្រុនចាញ់ បន្តសម្លាប់ជីវិតមនុស្សជាច្រើនម៉ឺនសែននាក់ ជារៀងរាល់ឆ្នាំ ដែលភាគច្រើនលើសលុបគឺនៅទ្វីបអាហ្វ្រិក។ ថ្វីបើឆ្នាំ២០២១កន្លងទៅ ចំនួនករណីឆ្លងរាលដាល និងករណីស្លាប់បានប្រសើរឡើងបន្តិចជាងឆ្នាំ២០២០ក៏ដោយ តែអង្គការសុខភាពពិភពលោក បានអំពាវនាវ ឲ្យគ្រប់ប្រទេស ព្រមទាំងភ្នាក់ងារពាក់ព័ន្ធទាំងអស់ ត្រូវប្រឹងប្រែង ឲ្យបានទ្វេដងបន្ថែមទៀត ដើម្បីប្រយុទ្ធប្រឆាំងនឹងជម្ងឺគ្រុនចាញ់។
ចុះផ្សាយនៅថ្ងៃ៖
ស្តាប់ - ០២:៣៨
អង្គការសុខភាពពិភពលោក បានចេញរបាយការណ៍ប្រចាំឆ្នាំ ស្តីអំពីការប្រយុទ្ធប្រឆាំងនឹងជម្ងឺគ្រុនចាញ់ នៅទូទាំងពិភពលោក។ យោងតាមរបាយការណ៍នេះ ពិភពលោកត្រូវតែបង្កើនការប្រឹងប្រែងឲ្យបានទ្វេដង តាមរយៈការប្រមូលថវិកា ឲ្យបានគ្រប់គ្រាន់ ដើម្បីប្រើប្រាស់ ក្នុងយុទ្ធនាការប្រយុទ្ធប្រឆាំងការឆ្លងរាលដាល និងការព្យាបាលថែទាំអ្នកជំងឺជាដើម។
យោងតាមអង្គការសុខភាពពិភពលោក គឺពិភពលោកយើង បានដើរចាកឆ្ងាយ ពីកម្មវត្ថុដែលកំណត់កាត់បន្ថយឲ្យបាន៩០% នូវចំនួនឆ្លងរាលដាល និងចំនួនមនុស្សស្លាប់ នៅរវាងឆ្នាំ២០៣០។ ក៏ប៉ុន្តែវិបត្តិកូវីដ១៩ នៅឆ្នាំ២០២០កន្លងទៅ បានធ្វើឲ្យរំខានយ៉ាងខ្លាំង ដល់យុទ្ធនាការប្រយុទ្ធប្រឆាំងនឹងជម្ងឺគ្រុនចាញ់។ ការបង្ការ ទប់ស្កាត់ការឆ្លងរាលដាល ព្រម ការព្យាបាលថែទាំ ត្រូវបានអាក់ខានសឹងទាំងស្រុង ធ្វើឲ្យចំនួនករណីឆ្លងជម្ងឺគ្រុនចាញ់ និងចំនួនមនុស្សស្លាប់ បានកើនឡើងយ៉ាងខ្លាំងក្នុងឆ្នាំ២០២០។
សូមរំលឹកថា នៅរវាងពីឆ្នាំ២០០០ ដល់ឆ្នាំ២០១៩ ចំនួនមនុស្សស្លាប់ដោយជម្ងឺគ្រុនចាញ់បានធ្លាក់ចុះគួរឲ្យត្រេកអរ ។ តែនៅឆ្នាំ២០២០ ចំនួនករណីស្លាប់ដោយគ្រុនចាញ់ បានកើនឡើង១០% ពោលគឺមានសរុប ៦២៥០០០នាក់ហើយនៅឆ្នាំ២០២១ ករណីស្លាប់ មានចំនួនសរុប ៦១៩០០០នាក់។ ៩៥%នៃចំនួនករណីឆ្លងថ្មី និង ៩៦%នៃករណីស្លាប់ដោយគ្រុនចាញ់ គឺមាននៅក្នុងទ្វីបអាហ្វ្រិក ដែលក្នុងនោះកុមារអាហ្វ្រិកគឺជាជនរងគ្រោះធំបំផុត។
កាលពីឆ្នាំ២០២១គេបានប្រមូលថវិកាចំនួន ៣,៥ពាន់លានដុល្លារ ដើម្បីប្រើប្រាស់ក្នុងយុទ្ធនាការប្រយុទ្ធប្រឆាំងនឹងជម្ងឺគ្រុនចាញ់។ ជាទំហំថវិកាដែលបានកើនឡើងបន្តិច បើប្រៀបធៀបទៅ២ឆ្នាំមុន តែនៅតែទាបឆ្ងាយ បើប្រៀបធៀបទៅនឹងតម្រូវការដែលមានចំនួន ៧,៣ពាន់លានដុល្លារ។ ទន្ទឹមគ្នានេះ អង្គការសុខភាពពិភពលោក បានអបអរចំពោះការប្រឹងប្រែងនៅតាមប្រទេសខ្លះ ក្នុងការចែកចាយមុងជ្រលក់ថ្នាំបណ្តេញសត្វមូស ទៅឲ្យប្រជាជននៅតាមទីជនបទ។
ដោយឡែក ក្តីសង្ឃឹមត្រូវបានផ្ញើទៅលើថ្នាំបង្ការថ្មីមួយប្រភេទ ដែលត្រូវបានចាក់ទៅឲ្យកុមារចំនួន ប្រមាណ១លាននាក់ហើយ។ អង្គការសុខភាពពិភពលោកអះអាងថា ថ្នាំវ៉ាក់សាំងនេះ នឹងត្រូវបានចែកចាយឲ្យបានទូលំទូលាយ ចាប់ពីឆ្នាំក្រោយទៅ។ យ៉ាងណាក៏ដោយ លោក Peter Sands អគ្គនាយកមូលនិធិពិភពលោក ដែលចូលរួមចំណែកជាង៦០%ដល់ថវិការចំណាយប្រយុទ្ធនឹងជម្ងឺគ្រុនចាញ់ បានលើកឡើងថា សត្វមូស ដែលជាភ្នាក់ងារចម្លងជម្ងឺគ្រុនចាញ់ វាវិវឌ្ឍន៍ខ្លួនជានិច្ច ដើម្បីបន្សាំខ្លួនទប់ទល់ជាមួយថ្នាំសម្លាប់មូស ឬក៏រកវិធីរស់ដោយខាំមនុស្សនៅពេលថ្ងៃ ដែលគ្មានមុងការងារជាដើម។ ជាងនេះទៀត ជាមួយនឹងការកើនឡើងកំដៅផែនដី តំបន់ដែលមានសីតុណ្ហភាពក្តៅ ហើយប្រឈមខ្លាំងនឹងការរាតត្បាតរបស់សត្វមូស នឹងកាន់តែរីកធំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ