អង្គការសុខភាពពិភពលោកទាញសញ្ញាអាសន្នពីកង្វះវ៉ាក់សាំងប្រឆាំងជំងឺអាសន្នរោគ
ខណៈពេលដែលជំងឺអាសន្នកាន់តែរីករាតត្បាត នៅក្នុងពិភពលោក អង្គការសុខភាពពិភពលោកបានទាញសញ្ញា ព្រមានពីកង្វះវ៉ាក់សាំងប្រឆាំងនឹងជំងឺដ៏មរណៈ។ នៅក្នុងសន្និសីទកាសែត នៅទីក្រុងហ្សឺណែវ កាលពីថ្ងៃសុក្រ ប្រធានក្រុមទទួលបន្ទុកជំងឺអាសន្នរោគរបស់អង្គការសុខភាពពិភពលោក បានអំពាវនាវឲ្យគេបង្កើនការផលិត វ៉ាក់សាំង បន្ថែមដើម្បីប្រឈមនឹងកំណើនជំងឺអាសន្នរោគគួរឲ្យព្រួយបារម្ភ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ក្នុងកាលៈទេសៈដែលពិភពលោកប្រឈមនឹងសន្ទុះកំណើនជំងឺអាសន្នរោគ ដែលអំណោយផល ដោយការប្រែប្រួលអាកាសធាតុ អង្គការសុខភាពពិភពលោកហៅកាត់ជាភាសាបារាំងថា OMS ត្រូវខ្វល់ខ្វាយ ទាញសញ្ញាអាសន្ន ពីរឿងខ្វះវ៉ាក់សាំងប្រឆាំងជំងឺអាសន្នរោគ។
អង្គការសុខភាពពិភពលោកមាន វ៉ាក់សាំង ចំនួន ៣៦លានដូស ក្នុងមួយឆ្នាំៗ នៅក្នុងស្តុករបស់ខ្លួន។ ប៉ុន្តែ តាមលោក Philippe Barboza ប្រធានក្រុមទទួលបន្ទុកជំងឺអាសន្នរោគ និងជំងឺរាគរូស របស់OMS ចំនួនវ៉ាក់សាំងក្នុងស្តុករបស់អង្គការសុខភាពពិភពលោកបានធ្លាក់ចុះ មកនៅចំនួនតិចតួចស្តួចស្តើងមែនទែន បន្ទាប់ពីចែកចាយ ទៅប្រទេសចំនួន ២៩ ដែលកំពុងផ្ទុះកើតមានជំងឺរាតត្បាតអាសន្នរោគ ជាពិសេស ហៃទី។
បើតាមអ្នកទទួលខុសត្រូវដដែល កង្វះវ៉ាក់សាំងបង្ការជំងឺអាសន្នរោគ មានមួយផ្នែក ជាប់ពាក់ព័ន្ធនឹងការសម្រេចចិត្តរបស់ក្រុមហ៊ុនផលិតឱសថឥណ្ឌា ដែលសម្រេចឈប់នាំចេញវ៉ាក់សាំង។ អាហ្រ្វិកខាងត្បូងធ្លាប់អះអាង ចង់ផលិតវ៉ាក់សាំងបង្ការជំងឺអាសន្នរោគ ប៉ុន្តែ នៅក្នុងរយៈពេលប៉ុន្មានឆ្នាំខាងមុខ។ សម្រាប់លោក Philippe Barboza ផ្ទុយពីវ៉ាក់សាំង បង្ការជំងឺកូវីដ ដែលផ្តល់ប្រាក់ចំណេញដ៏ក្រាស់ក្រែល គម្រោងការផលិតវ៉ាក់សាំងជំងឺអាសន្នរោគ មិនសូវទាក់ទាញខ្លាំងសម្រាប់អ្នកផលិត ក្នុងហេតុផលថា អាសន្នរោគ ជាជំងឺនៅប្រទេសក្រីក្រ។
ដោយសារចំនួនរោងចក្រផលិតវ៉ាក់សាំង មានមិនច្រើន ការផលិតវ៉ាក់សាំង សម្រាប់ស្តុករបស់អង្គការសុខភាពពិភពលោក មាន តែ ២,៥លានដូសប៉ុណ្ណោះ ក្នុងមួយខែ ពោល ប្រមាណ២៥លានដូសក្នុងមួយឆ្នាំ។ តាមមន្រ្តីអង្គការសុខភាពពិភពលោក គេត្រូវពេលវេលាជាច្រើនឆ្នាំ ដើម្បីអាចបំពេញស្តុក វ៉ាក់សាំងប្រឆាំងជំងឺអាសន្នរោគ។
ក្នុងពេលរង់ចាំ អង្គការសុខភាពពិភពលោកត្រូវបង្ខំចិត្តកាត់បន្ថយ ការផ្តល់វ៉ាក់សាំង ពី២ ដូស មកនៅ១ដូស វិញ ដើម្បីធានាការចែកចាយវ៉ាក់សាំងដល់អ្នកប្រឈមជំងឺរាតត្បាតអាសន្នរោគ។
ជំងឺអាសន្នរោគ ដែលឆ្លងដោយការបរិភោគទឹកមិនស្អាត និងចំណីអាហារដែលមានបាក់តេរី កំពុងផ្ទុះរាតត្បាតនៅក្នុងប្រទេសចំនួន ២៩ ដែលមានដូចជា ហៃទី ប៉ាគីស្ថាន លីបង់ ស៊ីរី អេត្យូពីនិងកេនយ៉ាជាដើម។ នៅហៃទី ជំងឺអាសន្នរោគរីករាតត្បាតយ៉ាងឆាប់រហ័ស និងសម្លាប់មនុស្ស២៨០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ