អ្នកកាសែតបារាំងOlivier Dubois ដែលក្រុមជីហាតតំបន់សាហ៊ែលចាប់ចំណាប់ខ្មាំង ត្រូវរំដោះបានមកវិញ
អ្នកកាសែតបារាំង ឈ្មោះ Olivier Dubois ដែលត្រូវបានក្រុមជីហាតអ៊ីស្លាមតំបន់សាហ៊ែល ចាប់ធ្វើជាចំណាប់ខ្មាំង កាលពីឆ្នាំ២០២១ ពេលនេះ ត្រូវបានរំដោះមកវិញហើយ។ អ្នកកាសែតរូបនេះ បានធ្វើដំណើរទៅទៅដល់ទីក្រុងប៉ារីសហើយ នៅព្រឹកថ្ងៃអង្គារ ទី២១មីនានេះ ដោយមានលោកប្រធានាធិបតីម៉ាក្រុង ទៅរងចាំទទួលនៅឯព្រលានយន្តហោះ។
ចុះផ្សាយនៅថ្ងៃ៖
ស្តាប់ - ០២:០២
លោក Olivier Dubois ត្រូវបានគេឃើញ ក្នុងទឹកមុខញញឹម តែមានអាការៈហត់ហេវខ្លាំង នៅពេលចុះពីយន្តហោះ នៅក្រុង Niamey កាលពីរសៀលថ្ងៃចន្ទ ដើម្បីឡើងយន្តហោះបន្តមកទីក្រុងប៉ារីស។ លោកត្រូវបាន ប្រតិបត្តិការពិសេសចូលទៅរំដោះមកវិញ ជាមួយនឹងបុគ្គលិកអង្គការរមនុស្សធម៌ជនជាតិអាមេរិកម្នាក់ទៀត ឈ្មោះ Jeffery Woodke ដែលត្រូវបានចាប់ជាចំណាប់ខ្មាំង កាលពីថ្ងៃទី១៤ តុលា ឆ្នាំ២០១៦ នៅប្រទេសនីហ្សេ។
សូមបញ្ជាក់ថា លោក Olivier Dubois លោកគឺជាអ្នកកាសែតឯករាជ្យ តែងតែសរសេរព័ត៌មានឲ្យបណ្តាញព័ត៌មានបារាំងមួយចំនួន ដូចជាកាសែត Libération និងទស្សនាវត្តី Le Point ជាដើម។ លោករស់នៅ និងធ្វើការនៅប្រទេសម៉ាលី តាំងតែពីឆ្នាំ ២០១៥ មុននឹងត្រូវបានក្រុមជីហាតអ៊ីស្លាម GSIM ដែលជាបណ្តាញមួយរបស់ក្រុមអាល់កៃដា ចាប់យកទៅធ្វើជាចំណាប់ខ្មាំង កាលពីថ្ងៃទី៨ មេសា ឆ្នាំ២០២១ នៅតំបន់ GAO ភាគខាងជើងម៉ាលី។
ថ្លែងប្រាប់អ្នកកាសែតមុននឹងឡើងយន្តហោះ លោក Olivier Dubois បានបញ្ជាក់ថា លោកសុខសប្បាយទេ ទោះហេវហត់បន្តិច តែលោកសប្បាយចិត្តណាស់ ដែលបានរួចខ្លួនមានសេរីភាពឡើងវិញ។ លោកបានថ្លែងអរគុណចំពោះអាជ្ញាធរប្រទេសនីហ្សេ ដែលបានបើកប្រតិបត្តិការរំដោះដ៏លំបាកលំបិននេះ ដោយសហការជាមួយកងកម្លាំងបារាំង។
អមដំណើរជាមួយលោក Olivier Dubois ចំណាប់ខ្មាំងជនជាតិអាមេរិក ឈ្មោះ Jeffery Woodke សក់ស្កូវ ដៃកាន់ឈើច្រត់ ក៏បានថ្លែងអំណរគុណដែរ ដល់រដ្ឋាភិបាលប្រទេសនីហ្សេ និងបារាំង ដែលបានជួយជ្រោមជ្រែងរំដោះខ្លួនមកវិញ។ មុននឹងត្រូវក្រុមជីហាតចាប់ខ្លួននៅឆ្នាំ២០១៦ លោក Jeffery Woodke បានធ្វើការក្នុងអង្គការមនុស្សធម៌ ABALAK ជួយប្រជាជនរស់នៅក្នុងចរភាព នៅភាគកណ្តាលប្រទេសនីហ្សេ។
លោកម៉ាក្រុងនិងលោកអង់តូនីប្លីងកិន បានថ្លែងអរគុណផងដែរ ដល់រដ្ឋាភិបាលនីហ្សេ ដែលបានជួយជ្រោមជ្រែង បើកប្រតិបត្តិការដ៏គ្រោះថ្នាក់ ដើម្បីរំដោះចំណាប់ខ្មាំងពីដៃក្រុមជីហាតអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ