ស៊ូដង់៖ ក្បួនរថយន្តមន្ត្រីការទូតអាមេរិក បានរងនូវការបាញ់ប្រហារ
ស្ថានការណ៍ផ្ទុះអាវុធ ប្រយុទ្ធដណ្តើមអំណាចគ្នា រវាងមេទ័ពពីរក្រុមនៅប្រទេសស៊ូដង់ បានឈានចូលដល់ថ្ងៃទី៤ហើយ។ យោងតាមតួលេខអង្គការសហប្រជាជាតិ គិតត្រឹមពេលនេះ ការផ្ទុះអាវុធនេះបានសម្លាប់ជីវិតជនស្លូតត្រង់ស៊ូដង់ ប្រមាណជិត២០០នាក់។ ជាងនេះទៀត ផ្អែកតាមលោកអង់តូនី ប្លីងកិន ប្រមុខការទូតអាមេរិក គឺកាលពីថ្ងៃចន្ទទី១៧មេសា ក្បួនរថយន្តមន្ត្រីការទូតអាមេរិក បានរងនូវការបាញ់ប្រហារ ពីក្រុមប្រដាប់អាវុធស៊ូដង់។
ចុះផ្សាយនៅថ្ងៃ៖
ស្តាប់ - ០២:៣៤
ជាសំណាងល្អ ពុំមានបុគ្គលិកមន្ត្រីទូតអាមេរិក រងរបួសទេ នៅក្នុងហេតុការណ៍វាយប្រហារមកលើក្បួនរថយន្តនៅស៊ូដង់។ ថ្លែងបញ្ជាក់ពីក្រុង Karuizawa ប្រទេសជប៉ុន ក្រោយចប់ការប្រជុំរដ្ឋមន្ត្រីការបរទេសក្រុមប្រទេស G7 លោក អង់តូនី ប្លីងកិន បានអះអាងថា ក្បួនរថយន្តរបស់មន្ត្រីទូតអាមេរិក ដែលរងការបាញ់រះនៅស៊ូដង់នោះ គឺមានពាក់ផ្លាកលេខសំគាល់យ៉ាងត្រឹមត្រូវ។ លោកបញ្ជាក់ថា នឹងមានការស៊ើបអង្កេតស៊ីជំរៅស្តីពីហេតុការណ៍នេះ តែបើតាមប្រភពព័ត៌មានបឋម ដែលភាគីអាមេរិកទទួលបាន គឺក្រុមកងប្រដាប់អាវុធប្រតិបត្តិការរហ័ស FSR ក្រោមបង្គាប់ របស់លោកមេបញ្ជាការ Mohamed Hamdane Daglo ជាអ្នកបង្ក។
ដោយឡែក កាលពីល្ងាចថ្ងៃចន្ទ លោកប្រមុខការទូតសហភាពអឺរ៉ុប Josep Borrell បានអះអាងថា តំណាងអង្គទូតអឺរ៉ុបប្រចាំនៅស៊ូដង់ បានរងនូវការគំរាមកំហែង មកលើរូបរាងកាយ នៅគេហដ្ឋានក្នុងរដ្ឋធានីកាទូម។
សូមបញ្ជាក់ ការប្រទូស្តរាយ ផ្ទុះអាវុធ រវាងមេបញ្ជាការកងទ័ពដ៏មានអំណាចទាំង២ នៅស៊ូដង់ បានចាប់ផ្តើមកាលពីថ្ងៃសៅរ៍ចុងសប្តាហ៍កន្លងទៅ។ គឺជាការប្រយុទ្ធដណ្តើមអំណាច រវាងក្រុមកម្លាំងប្រតិបត្តិការរហ័ស ក្រោមបង្គាប់លោកមេបញ្ជាការ Mohamed Hamdane Daglo ហៅកាត់ថា Hamedti ជាមួយនិងកងទ័ពជាតិស៊ូដង់ ដឹកនាំដោយលោកអគ្គមេបញ្ជាការ Abdel Fattah al-Burhane។ មេបញ្ជាការទាំង២នេះ ធ្លាប់បានសហការគ្នាកាលពីឆ្នាំ២០២១ ក្នុងការធ្វើរដ្ឋប្រហារយោធាប្លន់អំណាចពីរដ្ឋាភិបាលអន្តរកម្មស៊ីវីល។
ថ្លែងពីប្រទេសជប៉ុន រដ្ឋមន្ត្រីការបរទេសក្រុមប្រទេស G7 បានអំពាវនាវ ឲ្យគូបដិបក្សកងទ័ពស៊ូដង់ទាំង២នេះ ទម្លាក់អាវុធឈប់ប្រយុទ្ធ ដោយត្រូវគិតពីអាយុជីវិតរបស់ប្រជាជនស្លូតត្រង់ និងមន្ត្រីបេសកម្មបរទេស ដែលស្ថិតនៅកណ្តាល។ យោងតាមអង្គការសហប្រជាជាតិ ការវាយប្រយុទ្ធគ្នា៣ថ្ងៃមកនេះ បានបណ្តាលឲ្យស្លាប់ជីវិតជនស៊ីវីល ចំនួន ជិត២០០នាក់ និងរបួសប្រមាណ១៨០០នាក់ ភាគច្រើនលើសលុប នៅទីក្រុងកាទូម។
លោកអង់តូនី ប្លីងកិន បានឲ្យដឹងផងដែរថា លោកទើបបានទូរស័ព្ទទៅនិយាយជាមួយ មេបញ្ជាការកងទ័ពស៊ូដង់ទាំង២នេះ ដែលកំពុងតែប្រយុទ្ធដណ្តើមអំណាចគ្នា ដើម្បីបញ្ចុះបញ្ចូលឲ្យទម្លាក់អាវុធ ហើយចរចាគ្នា។ លោកប្រមុខការទូតអាមេរិកលើកឡើងទៀតថា ប្រជាជនស៊ូដង់ចង់ឲ្យកងទ័ពចូលបន្ទាយវិញ ហើយចង់បានរដ្ឋាភិបាលមួយដែលដឹកនាំដោយជនស៊ីវីល មិនមែនជារដ្ឋាភិបាលទាហានកាមមន់កាំភ្លើងពេញដៃនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ