ការកើនឡើងកំដៅផែនដី គឺជាមូលហេតុចំបងនៃគ្រោះរាំងស្ងួតដ៏ធ្ងន់ធ្ងរ នៅតំបន់ស្នែងអាហ្វ្រិក
តំបន់ស្នែងអាហ្វ្រិក ដែលស្ថិតនៅខាងជើងឆៀងខាងកើតទ្វីបអាហ្វិ្រក កំពុងតែជួបនូវគ្រោះរាំងស្ងួត ដ៏ធ្ងន់ធ្ងរបំផុតមិនធ្លាប់មានទេ ក្នុងរវាង៤០ឆ្នាំចុងក្រោយ។ គ្រោះរាំងស្ងួត ដែលកំពុងតែធ្វើឲ្យមនុស្សជាង២០លាននាក់នៅតំបន់នេះ ប្រឈមនឹងគ្រោះទុរ្ភិក្ស។ យោងតាម របាយការណ៍ថ្មីមួយរបស់អង្គការ World Weather Attribution គឺការកើនឡើងកំដៅផែនដី គឺជាមូលហេតុចំបង ដែលបណ្តាលឲ្យមានគ្រោះរាំងស្ងួតដ៏ចម្លែកមិនធ្លាប់មាននេះ។
ចុះផ្សាយនៅថ្ងៃ៖
ស្តាប់ - ០២:៤៦
គិតចាប់ពីចុងឆ្នាំ២០២០មក ពោលគឺរដូវភ្លៀងចំនួន៥ជាប់គ្នាហើយ ដែលមានភ្លៀងធ្លាក់យ៉ាងតិចបំផុត នៅតាមប្រទេសតំបន់ស្នែងអាហ្វ្រិក ៖ អេត្យូពី អេរីត្រេ សូម៉ាលី កេនយ៉ា ស៊ូដង់ និងជីប៊ូទី។ ផ្អែកតាមរបាយការណ៍ របស់អង្គការ World Weather Attribution (WWA) គ្រោះរាំងស្ងួតនេះ មានលក្ខណៈធ្ងន់ធ្ងរ មិនធម្មតាទេ ក្នុងរវាង៤០ឆ្នាំចុងក្រោយនេះ។ សត្វពាហនៈរាប់លានក្បាលបានស្លាប់ ដោយសារតែគ្មានទឹក និងគ្មានរុក្ខជាតិជាចំណី ក្រោមកំដៅថ្ងៃក្តៅហួតហែង។ ដំណាំដាំដុះឆេះរួញខ្លោច រុញច្រានមនុស្សប្រមាណ២២លាននាក់ នៅកេនយ៉ា នៅសូម៉ាលី និងអេត្យូពី ឲ្យរស់ក្នុងស្ថានភាពប្រឈមនឹងគ្រោះទុរ្ភិក្ស។ នេះបើផ្អែកតាមតួលេខរបស់អង្គការសហប្រជាជាតិ។
របាយការណ៍ ដែលមានអ្នកជំនាញវិទ្យាសាស្ត្រ១៩នាក់ចូលរួមសរសេរនេះ បានសន្និដ្ឋានថា បម្រែបម្រួលអាកាសធាតុសកលលោក អាចប្រហែលជាជះឥទ្ធិពលតិចតួចមែន ទៅលើកម្រិតទឹកភ្លៀងធ្លាក់ប្រចាំឆ្នាំ នៅតំបន់ស្នែងអាហ្វ្រិក។ ក៏ប៉ុន្តែ បម្រែបម្រួលអាកាសធាតុ បានញ៉ាំងឲ្យសីតុណ្ហភាពឡើងក្តៅខ្លាំង ដែលជាមូលហេតុ ធ្វើឲ្យហួតចំហាយទឹក ហើយដីនិងរុក្ខជាតិស្ងួតកាន់តែខ្លាំង។ លោកស្រី Joyce Kimoutai អ្នកជំនាញកេនយ៉ា ដែលបានចូលរួមក្នុងរបាយការណ៍នេះ បានអះអាងថា គឺបម្រែបម្រួលអាកាធាតុ ដែលជាអ្នកធ្វើឲ្យភាពស្ងួតហួតហែងនេះ មានកម្រិតធ្ងន់ធ្ងរខ្លាំង។ អំណេះតទៅ គ្រោះរាំងស្ងួតធ្ងន់ធ្ងរនៅតំបន់ស្នែងអាហ្វ្រិក អាចមានលទ្ធភាពកើតឡើងបាន ស្មើនឹង១០០ដង នៃលទ្ធភាពកាលពីអតីតកាល ដោយសារកត្តាបម្រែបម្រួលអាកាសធាតុ។
សូមបញ្ជាក់ថា អ្នកជំនាញរបស់ WWA បានសិក្សាលំអិតទៅលើប្រទេស៣ ដែលជួបបញ្ហារាំងស្ងួតខ្លាំងបំផុត នៅប៉ុន្មានជិត៣ឆ្នាំមកនេះ គឺអេត្យូពី កេនយ៉ា និងសូម៉ាលី។ យោងតាមការសង្កេត រដូវភ្លៀងទាំង២ប្រចាំឆ្នាំ បានចុះថយកម្រិតទឹកភ្លៀងយ៉ាងចម្លែក ប្រៀបទៅនឹងឆ្នាំមុនៗ។ ពុំមានភស្តុតាងអ្វីបញ្ជាក់ថា បម្រែបម្រួលអាកាសធាតុ ធ្វើឲ្យលែងមានភ្លៀងមែន ការកើនឡើងកំដៅផែនដី គឺជាមូលហេតុប្រាកដណាស់ នៃកំដៅសីតុណ្ហភាពក្តៅហួតហែងនៅតំបន់ស្នែងអាហ្វ្រិក ហើយដែលវាបានចូលរួមធ្វើឲ្យគ្រោះរាំងស្ងួតនេះធ្ងន់ធ្ងរ។
អ្នកជំនាញ របស់ WWA បានចាត់ចំណាត់ថ្នាក់ គ្រោះរាំងស្ងួតបច្ចុប្បន្ននៅតំបន់ស្នែងអាហ្វ្រិក ក្នុងកម្រិតទី៤ ដែលជាកម្រិតខ្ពស់បំផុត នៃស្តង់ដាររាំងស្ងួងអាមេរិក។ កម្រិតដ៏ធ្ងន់ធ្ងរនេះ កម្រកើតមានណាស់ តែអំណេះតទៅ យោងតាមការគុណគូរ របស់អ្នកជំនាញ គឺអាចមានលទ្ធភាពកើតឡើងចំនួន ៥% ជារៀងរាល់ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ