នាយករដ្ឋមន្ត្រីជប៉ុនផ្តើមទស្សនកិច្ចនៅអាហ្វ្រិក ដើម្បីប្រជែងឥទ្ធិពលវិនិយោគរបស់ចិន
លោកនាយករដ្ឋមន្ត្រីជប៉ុន ហ្វូមីអូ គីស៊ីដា កំពុងស្ថិតនៅទីក្រុងគែរប្រទេសអេហ្ស៊ីប នៅថ្ងៃចន្ទទី១ឧសភានេះ។ ជាដំណើរទស្សនកិច្ច ផ្លូវរដ្ឋនៅតាមបណ្តាប្រទេសអាហ្វ្រិកមួយចំនួន ដែលលោកនាយករដ្ឋមន្ត្រីជប៉ុន មានបំណងចង់អះអាងពីវត្តមានរបស់ជប៉ុន នៅក្នុងតំបន់នេះ ខណៈចិននិងរុស្ស៊ីកំពុងតែប្រើប្រាស់ឥទ្ធិពលកាន់តែខ្លាំង នៅលើទ្វីបអាហ្រ្វិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ថ្ងៃទី៣០មេសា នៅទីក្រុងគែរ លោកនាយករដ្ឋមន្ត្រីជប៉ុន បានជួបប្រជុំជាមួយលោកប្រធានាធិបតីអេហ្ស៊ីប ព្រមជាមួយអគ្គលេខាធិការអង្គការសម្ព័ន្ធអារ៉ាប់ និងតំណាងប្រទេសសមាជិកទាំង២២នៃអង្គការនេះ។ យោងតាមអ្នករាយការណ៍ព័ត៌មានវិទ្យុបារាំងអន្តរជាតិ RFI ប្រចាំនៅទីក្រុងគែរ គឺលោកនាយករដ្ឋមន្ត្រីជប៉ុន បានព្យាយាមអូសទាញអេហ្ស៊ីប ព្រមទាំងប្រទេសអារ៉ាប់ក្នុងតំបន់ ឲ្យយល់ព្រមចាកចេញពីគោលការណ៍អព្យាក្រិត្យ ក្នុងសំណុំរឿងសង្រ្គាមនៅអ៊ុយក្រែន ហើយងាកមករួមកម្លាំងគ្នាជាមួយសម្ព័ន្ធមិត្តលោកខាងលិច ដើម្បីប្រឆាំងថ្កោលទោសរុស្ស៊ី។
ក្រុមប្រទេសអារ៉ាប់ បានស្តាប់យ៉ាងយកចិត្តទុកដាក់ នូវសុន្ទរកថារបស់លោកនាយករដ្ឋមន្ត្រីជប៉ុន មុននឹងបានឆ្លើយតបទៅវិញ។ ក្រុមប្រទេសអារ៉ាប់ បានអំពាវនាវ ថាក្រុមប្រទេសអ្នកមាន ត្រូវតែរួមគ្នាជួយផ្នែកសេដ្ឋកិច្ច ដល់ប្រទេសកំពុងលូតលាស់ ដើម្បីធ្វើយ៉ាងណាបន្ធូរបន្ថយការលំបាក ដែលបណ្តាលមកពីសង្គ្រាមនៅអ៊ុយក្រែន។
គួរបញ្ជាក់ថា ក្រុមប្រទេសអារ៉ាប់ បានប្រកាន់ជំហរអព្យាក្រិត្យដោយសារតែចង់រក្សាទំនាក់ទំនងល្អជាមួយរុស្ស៊ី។ សម្រាប់អេហ្ស៊ីប រុស្ស៊ីគឺជាអ្នកផ្គត់ផ្គង់ស្រូវសាឡីដ៏ធំបំផុត ហើយរុស្ស៊ីក៏ជាសមាជិកម្នាក់ដ៏មានឥទ្ធិពលដែរ នៅក្នុងអង្គការក្រុមប្រទេសផលិតប្រេង OPEP+។ យ៉ាងណាមិញ ឆ្លៀតក្នុងឱកាសនេះ អេហ្ស៊ីបបានស្នើទៅលោកនាយករដ្ឋមន្ត្រីជប៉ុនថាត្រូវតែជំរុញឲ្យសហគ្រាសជប៉ុនមកបោះទុនវិនិយោគឲ្យបានច្រើននៅអេហ្ស៊ីប។
ផ្អែកតាមការបញ្ជាក់ពីលោក ប្រធានាធិបតីអេហ្ស៊ីប ហ្វាតាហ អាល់ស៊ីស៊ី គឺលោកនាយករដ្ឋមន្ត្រីជប៉ុន បាននិយាយពិភាក្សា អំពីបញ្ហាអស្ថិរភាព ជម្លោះប្រដាប់អាវុធក្នុងតំបន់ ដូចជានៅលីប៊ី និងនៅស៊ូដង់ ជាពិសេស។ ក្នុងឱកាសនេះ ទំនាក់ទំនងរវាងអេហ្ស៊ីបនិងជប៉ុន ត្រូវបានថ្នាក់ដឹកនាំទាំងពីរ ចាត់ទុកក្នុងចំណាត់ថ្នាក់ “សហប្រតិបត្តិការយុទ្ធសាស្ត្រ”។
សូមបញ្ជាក់ថា លោកហ្វូមីអូ គីស៊ីដា បានចាប់ផ្តើមធ្វើទស្សនកិច្ចពេញមួយសប្តាហ៍នៅតាមប្រទេសអាហ្វ្រិកចំនួន៤ គឺអេហ្ស៊ីប ហ្កាណា កេនយ៉ា និងមួរហ្សំប៊ិក មុននឹងបញ្ចប់ដំណើរនៅសិង្ហបុរី។ ជាទស្សនកិច្ចដ៏សំខាន់ នៅ៣សប្តាហ៍មុននឹងជប៉ុនចាប់ផ្តើមបើកកិច្ចប្រជុំជំនួបកំពូល G7 នៅទីក្រុងហ៊ីរូស៊ីម៉ា។ ជប៉ុនកំពុងតែព្យាយាមឈានជើងមានវត្តមាននៅអាហ្វ្រិក ខណៈតំបន់នេះត្រូវស្ថិតក្នុងកណ្តាប់ដៃវិនិយោគ កាន់តែធំទៅៗរបស់ចិន។ កាលពីឆ្នាំ២០២២ រដ្ឋាភិបាលជប៉ុនបានសន្យាវិនិយោគនៅអាហ្វ្រិកក្នុងទំហំទឹកប្រាក់ ប្រមាណ ៣០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ