អង្គការសហប្រជាជាតិ បារម្ភពីគ្រោះមហន្តរាយមនុស្សធម៌នៅស៊ូដង់
នៅស៊ូដង់ ការប្រយុទ្ធគ្នា ការវាយប្រយុទ្ធដណ្តើមអំណាចគ្នា រវាងក្រុមយោធាគូបដិបក្ស កំពុងតែបន្តយ៉ាងសកម្ម បើទោះបីជាមានការប្រកាសថាឈប់បាញបណ្តោះអាសន្នក្តី។ អង្គការសហប្រជាជាតិ បានទាញសញ្ញាអាសន្ន ថាប្រទេសស៊ូដង់កំពុងស្ថិតនៅមាត់ជ្រោះ គ្រោះមហន្តរាយមនុស្សធម៌ ខណៈប្រជាជនគ្មានស្បៀងអាហារ មន្ទីរពេទ្រគ្មានថ្នាំ និងសម្ភារៈព្យាបាលអ្នកជំងឺ។
ចុះផ្សាយនៅថ្ងៃ៖
ស្តាប់ - ០២:១៤
កាលពីយប់ថ្ងៃអាទិត្យ លោកអគ្គមេបញ្ជាការ Abdel Fattah al-Burhane និងលោកមេបញ្ជាការកងអាវុធហត្ថ Mohamed Hamdane Daglo ដែលជាគូបដិបក្សប្រជែងអំណាចគ្នានោះ បានសុខចិត្តថាបន្តផ្អាកការប្រយុទ្ធគ្នារយៈពេល៣ថ្ងៃទៀត បន្ទាប់ពីអាមេរិក និងអារ៉ាប៊ីសាអូឌីត បាននិយាយសម្របសម្រួល។ ក៏ប៉ុន្តែ នៅរសៀលថ្ងៃចន្ទ នៅទីក្រុងខាទុំ គេសង្កេតឃើញថានៅតែមានសំឡេងគ្រាប់កាំភ្លើងផ្ទុះ អមដោយការបាញ់ប្លោងទំលាក់គ្រាប់ពីលើអាកាសផង។
លោក Ahmed Al-Mandhari តំណាងអង្គការសុខភាពពិភពលោកប្រចាំតំបន់ម៉េឌីទែរ៉ាណេខាងកើត បានថ្លែងការបារម្ភថា ស្ថានភាពមនុស្សធម៌នៅស៊ូដង់ កំពុងតែស្ថិតនៅមាត់ជ្រោះមហន្តរាយ ដ៏គ្រោះថ្នាក់។ ប្រជាជនស៊ូដង់ជាច្រើនលាននាក់ កំពុងក្លាយជាចំណាប់ខ្មាំង ដោយសារតែការប្រយុទ្ធគ្នា រវាងក្រុមយោធា។ មន្ទីរពេទ្យទូទាំងប្រទេស អស់ថ្នាំព្យាបាលអ្នកជំងឺ គ្មានសម្ភារៈចាំបាច់ និងជាពិសេសនោះគឺខ្វះគ្រូពេទ្យជំនាញ។
ដោយសង្កេតឃើញស្ថានការណ៍អាសន្ននេះអង្គការសហប្រជាជាតិ បានប្រញាប់ប្រញាល់បញ្ជូនលោក Martin Griffiths ប្រេសិតពិសេសទទួលបន្ទុកកិច្ចការមនុស្សធម៌ ទៅកាន់ស៊ូដង់។ យោងតាមលោក Martin Griffiths ស្ថានការណ៍ពេលនេះកំពុងតែអាសន្នខ្លាំងណាស់ ដោយសារតែប្រជាជនចលាចលដណ្តើមប្រញ៉ាយគ្នា ប្រមូលយកស្បៀងចំណីអាហារ របស់អង្គការមនុស្សធម៌។
សូមរំលឹកថា មុននឹងមានការផ្ទុះអាវុធនៅថ្ងៃទី១៥មេសា ស៊ូដង់គឺជាប្រទេសក្រីក្របំផុតមួយ ដែលខ្វះមុខខ្វះក្រោយខ្លាំងរួចទៅហើយ។ ១ភាគ៣នៃប្រជាជនស៊ូដង់ រស់នៅជាមួយគ្រោះអត់ឃ្លាន គ្មានស្បៀងអាហារ ហើយរំពឹងទាំងស្រុងទៅលើជំនួយស្បៀង ពីអង្គការកម្មវិធីស្បៀងអាហារពិភពលោក PAM។ អង្គការគ្រូពេទ្យគ្មានព្រំដែន ដែលធ្វើប្រតិបត្តិការនៅតំបន់ដាកហ្វួរ បានបង្ខំចិត្តផ្អាកបេសកកម្មទាំងស្រុង ដោយសារតែការវាយប្រយុទ្ធគ្នា។
កាលពីថ្ងៃអាទិត្យ អង្គការកាកបាតក្រហមអន្តរជាតិ បានបញ្ជាក់ថា គេបានបញ្ជូនស្បៀងនិងសម្ភារៈមនុស្សធម៌ចំនួន៨តោន ជាលើកដំបូងបង្អស់ បន្ទាប់ពីការប្រយុទ្ធគ្នាបានចាប់ផ្តើម។ យោងតាមតួលេខអង្គការសហប្រជាជាតិ គិតចាប់ពីថ្ងៃទី១៥មេសាមក ការវាយប្រយុទ្ធដណ្តើមអំណាចគ្នា រវាងក្រុមយោធាស៊ូដង់ទាំង២ក្រុមនេះ បានបណ្តាលឲ្យស្លាប់ជីវិតជនស៊ីវីលចំនួន ៥២៨នាក់ និងរបួសជិត៥០០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ