ស៊ូដង់៖ កាកបាទក្រហមបង្ខំចិត្ត បញ្ចុះសាកសពមនុស្ស១៨០នាក់ ទោះជាមិនអាចស្គាល់អត្តសញ្ញាណ
ការប្រយុទ្ធដណ្តើមអំណាចនៅស៊ូដង់ រវាងក្រុមយោធាទាំង២ក្រុម នៅតែបន្តឆេះយ៉ាងក្តៅងំ បើទោះបីជាមានការប្រកាស ឈប់បាញ់បណ្តោះអាសន្ន យ៉ាងណាក្តី។ ប្រជាជនស៊ីវីលស៊ូដង់កំពុងតែរងទុក្ខលំបាកជាខ្លាំង។ យោងតាមអង្គការកាកបាទក្រហមស៊ូដង់ គឺគេទើបតែបានសម្រេចចិត្ត បញ្ចុះសាកសពមនុស្ស ចំនួន១៨០នាក់ ដែលស្លាប់ដោយការវាយប្រយុទ្ធគ្នានេះ បើទោះបីជាគេ មិនអាចដឹងអត្តសញ្ញាណនៃសាកសពទាំងនេះក្តី។
ចុះផ្សាយនៅថ្ងៃ៖
ស្តាប់ - ០២:២០
កាកបាទប្រហមស៊ូដង់ បានបញ្ជាក់នៅថ្ងៃទី៣មិថុនាថា គេបានប្រមូលសាកសពមនុស្ស ចំនួន១៨០នាក់ ហើយបានប្រាប់ទៅក្រុមស្ម័គ្រចិត្ត ឲ្យបញ្ចុះសាកសពទាំងនោះ ដោយគ្មានជម្រើសអ្វីផ្សេង បើទោះបីជាមិនដឹងអំពីអត្តសញ្ញាណ។ សាកសពទាំងនោះ គឺមាន១០២នាក់ ត្រូវគេប្រមូលបាននៅតំបន់ទីក្រុងកាទូម និងមាន៧៨នាក់ នៅតំបន់ដាកហ្វួរ។ តំបន់ទាំង២នេះ ជាទីដែលក្រុមយោធាគូបដិបក្សទាំង២ក្រុម បាញ់ប្រយុទ្ធគ្នា យ៉ាងក្តៅគគុក ប្រមាណជាង១ខែមកនេះ។
សូមរំលឹកថា ចាប់តាំងពីថ្ងៃទី១៥មេសាមក ក្រុមយោធាស៊ូដង់២ក្រុមបានប្រយុទ្ធគ្នា ដើម្បីដណ្តើមអំណាចគ្រប់គ្រងប្រទេសដ៏ក្រីក្រមួយនេះ។ គិតមកត្រឹមពេលនេះ យ៉ាងហាចណាស់ មានប្រជាជនស៊ីវីលស៊ូដង់ ស្លាប់ចំនួន យ៉ាងហោច ១៨០០នាក់ និងប្រមាណ៥សែននាក់ បានបង្ខំចិត្តភៀសខ្លួន គេចចេញពីសមរភូមិប្រយុទ្ធ។
គួរបញ្ជាក់ដែរថា មេបញ្ជាការកងកម្លាំងទាំង២ក្រុម បានប្រកាសពីបទឈប់បាញ់ជាបណ្តោះអាសន្ន ជាច្រើនដងមកហើយ តែការពិត គ្មានភាគីណាមួយគោរពនោះទេ។ ស្ថានភាពអាសន្នផ្នែកមនុស្សធម៌ កំពុងតែចោទឡើងយ៉ាងខ្លាំង សម្រាប់ប្រជាជនស៊ីវីលស៊ូដង់ បើទោះបីជាមានការចរចាគ្នានៅទីក្រុងចេដដា ប្រទេសអារ៉ាប៊ីសាអូឌីត ដែលភាគីជម្លោះទាំង២ បានសន្យាថានឹងការពារអាយុជីវិតជនស៊ីវីល បើកផ្លូវឲ្យមានការចូលទៅប្រមូលសាកសព និងសង្គ្រោះអ្នករបួសជាដើម។
ក៏ប៉ុន្តែ អង្គការមនុស្សធម៌ បានថ្អូញថ្អែរថា សាកសពមនុស្សដែលស្លាប់ដោយការប្រយុទ្ធនេះ ពិតជាមាននៅរាយប៉ាយច្រើនកន្លែងទៀត តែគេមិនអាចមានលទ្ធភាពទៅប្រមូល និងស្រង់ស្ថិតិបានអស់ទេ ដោយសារតែការវាយប្រយុទ្ធគ្នានៅតែបន្ត ហើយក្រុមយោធាមិនបើកផ្លូវ។ ចំណែកច្រកផ្លូវមនុស្សធម៌ ឲ្យប្រជាជនស៊ីវីលធ្វើដំណើរចាកចេញពីតំបន់ប្រយុទ្ធគ្នា ដែលអាមេរិកនិងអារ៉ាប៊ីសាអូឌីតបានជួយសម្រុះសម្រួលនោះ គឺមាននៅតែលើក្រដាសតែប៉ុណ្ណោះ។
យោងតាមប្រភពព័ត៌មាន នៅរដ្ឋធានីកាទូម ប្រជាជនស៊ីវីលត្រូវជាប់គាំងមិនអាចចេញទៅណាបាន ដោយគ្មានចំណីអាហារ និងដោយគ្មានទឹកបរិភោគ។ មន្ទីរពេទ្យវិញ មានតែមនុស្សរបួស តែគ្មានឧបករណ៍ សម្ភាៈ និងថ្នាំសង្កូវ ព្រមទាំងចរន្តអគ្គិសនី។ ស្ថានការណ៍កាន់តែដុនដាបខ្លាំងជាងនេះទៀត នៅតំបន់ដាកហ្វួរ ដែលជាតំបន់ដ៏ក្រីក្របំផុត។ ប្រជាជនក្នុងតំបន់នេះ ប្រឈមនឹងគ្រោះទុរ្ភឹក្ស ព្រមទាំងជំងឺគ្រុនចាញ់ ខណៈកុមារវិញខ្វះអាហារូបត្ថម្ភ ដ៏ធ្ងន់ធ្ងរបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ