បន្ទាប់ពីអាមេរិក នាយករដ្ឋមន្រ្តីឥណ្ឌាលោកណារិនដ្រា ម៉ូឌីបំពេញទស្សនកិច្ចនៅអេហ្ស៊ីប
បន្ទាប់ពីសហរដ្ឋអាមេរិក នាយករដ្ឋមន្រ្តីឥណ្ឌាលោកណារិនដ្រា ម៉ូឌីបានបំពេញទស្សនកិច្ចនៅក្នុងប្រទេសអេហ្ស៊ីប។ នៅក្នុងទីក្រុងគែរ លោកម៉ូឌីបានជួបថ្នាក់ដឹកនាំអេហ្ស៊ីប ពិសេសប្រធានាធិបតីលោកអាល់ស៊ីស៊ីក្នុងថ្ងៃអាទិត្យ ទី២៥ មិថុនា។ ទស្សនកិច្ចរបស់លោកម៉ូឌីមានសារៈសំខាន់ចំពោះប្រទេសទាំងពីរ។ នៅម្ខាង ឥណ្ឌាចង់ពង្រឹងការនាំចេញរបស់ខ្លួនទៅកាន់អាហ្រ្វិកខាងជើង។ នៅម្ខាងទៀត អេហ្ស៊ីបចង់បញ្ចូលខ្លួនទៅក្នុងក្លិប BRICS ដែលមានឥណ្ឌាជាសមាជិកម្នាក់។
ចុះផ្សាយនៅថ្ងៃ៖
ស្តាប់ - ០១:៤០
បន្ទាប់ពីបានបំពេញទស្សនកិច្ចនៅអាមេរិក នាយករដ្ឋមន្រ្តីឥណ្ឌាលោកណារិនដ្រា ម៉ូឌីបានបន្តទស្សនកិច្ចនៅអេហ្ស៊ីបដែលលោកបានទៅដល់ក្នុងថ្ងៃសៅរ៍ ទី២៤ មិថុនា។ នេះជាលើកទី១ ក្នុងរយៈពេល ២៥ឆ្នាំដែលមានប្រមុខរដ្ឋាភិបាលឥណ្ឌាម្នាក់ដាក់ជើងជាន់ទឹកដីអេហ្ស៊ីប។ កម្មវិធីនៃទស្សនកិច្ចនៅក្នុងទីក្រុងគែរ លោកម៉ូឌីជួបជាមួយសហគមន៍ឥណ្ឌានៅអេហ្ស៊ីប ជួបជាមួយមេដឹកនាំសាសនាអ៊ីស្លាមអេហ្ស៊ីបនៅវិហារប្រវត្តិសាស្រ្ត Al-Hakim ជួបជាមួយនាយករដ្ឋមន្រ្តី និងជួបជាមួយប្រធានាធិបតីលោកអាល់ស៊ីស៊ី។
ទស្សនកិច្ចរបស់ប្រមុខរដ្ឋាភិបាលឥណ្ឌានៅអេហ្ស៊ីបពេលនេះបានធ្វើឡើង ៥ខែក្រោយទស្សនកិច្ចរបស់ប្រធានាធិបតីអេហ្ស៊ីបលោកអាល់ស៊ីស៊ីនៅឥណ្ឌាកាលពីខែមករា។ តាមរយៈទស្សនកិច្ចទៅវិញ ទៅមកនេះ ក្រុងញូដែលី និងក្រុងគែរចង់ផ្តល់សន្ទុះឡើងវិញនូវទំនាក់ទំនងពាណិជ្ជកម្ម និងការទូតរវាងគ្នា។ មួយវិញទៀត ប្រទេសទាំងពីរក៏បានសំឡឹងឃើញប្រយោជន៍រៀងៗខ្លួនដែរ។ នៅម្ខាង អេហ្ស៊ីបសង្ឃឹមទទួលបានការគាំទ្រពីឥណ្ឌាដើម្បីចូលរួមជាមួយក្លិប BRICS ដែលមានប្រទេសប្រេស៊ីល រុស្ស៊ី ចិន អាហ្រ្វិកខាងត្បូង និងឥណ្ឌាជាសមាជិក។
ចំណែកនៅម្ខាងទៀត ឥណ្ឌាចង់ពង្រឹងវត្តមានរបស់ខ្លួននៅអេហ្ស៊ីបដែលជាប្រទេសសេដ្ឋកិច្ចទី១ នៅអាហ្រ្វិកខាងជើង ពិសេសនៅក្នុងផ្នែកហេដ្ឋារចនាសម្ព័ន្ធ ថាមពល ឬមួយក៏កសិចំណីអាហារ។ ចូរកុំភ្លេចថា តាំងពីសង្រ្គាមរុស្ស៊ីឈ្លានពានអ៊ុយក្រែនមក ឥណ្ឌាបានក្លាយជាអ្នកផ្គត់ផ្គង់ស្រូវសាលីឲ្យអេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ