ប្រធានាធិបតីអ៊ីរ៉ង់ បំពេញទស្សនកិច្ចជាប្រវត្តិសាស្ត្រនៅអាហ្វ្រិក
តាំងពីជាងមួយទសវត្សរ៍មក ទើបតែនៅថ្ងៃនេះប៉ុណ្ណោះ ដែលប្រធានាធិបតីអ៊ីរ៉ង់ ចេញទៅធ្វើទស្សនកិច្ចមួយជុំនៅក្នុងប្រទេសបី នៃទ្វីបអាហ្វ្រិក។ នៅថ្ងៃពុធទី ១២ កក្កដានេះ លោក អេប្រាហ៊ីម រ៉ៃស៊ី បានអញ្ជើញទៅដល់ប្រទេសកេនយ៉ា បន្ទាប់មកលោកនឹងបន្តដំណើរទៅប្រទេស អ៊ូហ្កង់ដា និងចុងក្រោយគឺស៊ីមបាវ៉េ។ អមដំណើរដោយប្រតិភូជាសហគ្រិន ប្រមុខរដ្ឋអ៊ីរ៉ង់ ត្រូវជួបពិភាក្សាជាមួយសមភាគីនៃប្រទេសនីមួយៗ ប៉ុន្តែពុំមានការលម្អិតកម្មវិធីទស្សនកិច្ចនេះទេ។
ចុះផ្សាយនៅថ្ងៃ៖
ស្តាប់ - ០១:៤៧
ដល់វេលាដែលអ៊ីរ៉ង់ចាប់ផ្តើមយុទ្ធនាការការទូតហើយឬ ? បើតាមទីភ្នាក់ងារសារព័ត៌មានផ្លូវការអ៊ីរ៉ង់ លោកប្រធានាធិបតីធ្វើដំណើរទៅអាហ្វ្រិកជាមួយរដ្ឋមន្ត្រីការបរទេស និងក្រុមសហគ្រិនមួយចំនួនធំ ដែលសបញ្ជាក់ឱ្យឃើញថា អ៊ីរ៉ង់មានឆន្ទៈពង្រឹងពង្រីកភាពជាដៃគូនយោបាយ សេដ្ឋកិច្ចនិងពាណិជ្ជកម្មជាមួយបណ្តាប្រទេសអាហ្វ្រិក ដើម្បីសាកល្បងពង្វាងទណ្ឌកម្មរបស់បស្ចិមលោក ក្នុងសំណុំរឿងនុយក្លេអ៊ែរ។
ប្រទេសទាំងបីដែលលោកប្រធានាធិបតី អេប្រាហ៊ីម រ៉ៃស៊ី បានជ្រើសរើសធ្វើដំណើរទៅជាលើកទីមួយនេះ មានទស្សនៈវិស័យនយោបាយរួម និងស្រែកឃ្លានចង់អភិវឌ្ឍប្រទេសជាមួយអ៊ីរ៉ង់។ នេះបើតាមការអះអាងរបស់លោកប្រមុខការទូតអ៊ីរ៉ង់។
តាំងពីប៉ុន្មានខែចុងក្រោយមកនេះ អាហ្វ្រិកបានក្លាយជាសមរភូមិការទូតរវាងក្រុមបស្ចិមលោកនិងរុស្ស៊ី ដើម្បីអូសទាញអាហ្វ្រិកឱ្យមកគាំទ្រឬ ប្រឆាំងនឹងសង្គ្រាមអ៊ុយក្រែន។ ចំណែកអ៊ីរ៉ង់ ដែលបានឆ្លងកាត់វិបត្តិសេដ្ឋកិច្ចជាពិសេសវិបត្តិអតិផរណាយ៉ាងធ្ងន់ធ្ងរ ដូចបណ្តាក្រុមប្រទេសនៅអាហ្វ្រិកដែរនោះ សង្ឃឹមលើយុទ្ធនាការការទូតក្រែងអាចទម្លាយភាពប្រឈមបានខ្លះ។ បើតាមអ្នកវិភាគ និងអ្នកជំនាញ ជាងពីរទសវត្សរ៍មកហើយ ដែលអ៊ីរ៉ង់សាកល្បងអភិវឌ្ឍទំនាក់ទំនងការទូតនិងសេដ្ឋកិច្ចជាមួយអាហ្វ្រិក។
ទន្ទឹមគ្នានេះ អ៊ីរ៉ង់ក៏បានពង្រឹងទំនាក់ទំនងជាមួយចិន-រុស្ស៊ីទៀត ក្នុងក្របខ័ណ្ឌយុទ្ធសាស្ត្របើកចំហទៅ ទិសខាងកើត ព្រោះតែគ្មានភាពធូរស្រាលជាមួយក្រុមលោកខាងលិចនិងសហរដ្ឋអាមេរិក។ កាលពីសប្តាហ៍មុន អ៊ីរ៉ង់បានក្លាយជាសមាជិកអង្គការសហប្រតិបត្តិការក្រុងសៀងហៃ ដែលមានចិនរុស្ស៊ី ជាស្ថាបនិក។ បន្ទាប់ពីធ្វើដំណើរទៅប្រទេសឥណ្ឌូណេស៊ីកាលពីខែឧសភា លោកប្រធានាធិបតីរ៉ៃស៊ី បានទៅលេងក្រុមប្រទេសជាមិត្តនៅអាមេរិកឡាទីន កាលពីខែមិថុនា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ