នីហ្សេ៖ ក្រោយរដ្ឋប្រហារយោធា សហគមន៍អន្តរជាតិ ទាមទារឲ្យដោះលែងប្រធានាធិបតី
កាលពីថ្ងៃទី២៧កក្កដា ព្រឹត្តិការណ៍ចលាចលបានកើតឡើង នៅប្រទេសនីហ្សេ បន្ទាប់ពីក្រុមយោធា បានអះអាងថា បានធ្វើរដ្ឋប្រហារផ្តួលរំលំរដ្ឋាភិបាល បានសម្រេច និងបានឈានទៅកាន់កាប់អំណាចទាំងស្រុង។ ផ្អែកតាមប្រភពច្បាស់ការ គឺលោក ម៉ូហាម៉េដ បាហ្ស៊ូម ប្រធានាធិបតីនីហ្សេ ព្រមទាំងមន្ត្រីខ្លះនៃរដ្ឋភិបាល ត្រូវបានក្រុមយោធាចាប់ឃាត់ខ្លួន។ អង្គការសហប្រជាជាតិ បានអំពាវនាវ ឲ្យក្រុមយោធាត្រូវតែដោះលែង លោកប្រធានាធិបតី នីហ្សេ ជាបន្ទាន់។
ចុះផ្សាយនៅថ្ងៃ៖
ស្តាប់ - ០២:៥៣
ស្ថានការណ៍ចលាចលបានផ្ទុះឡើងនៅទីក្រុងនីអាម៉េ រដ្ឋធានីនីហ្សេ កាលពីយប់ថ្ងៃពុធទី២៦កក្កដា។ ក្រុមយោធាមួយក្រុមបានលេចមុខតាមទូរទស្សន៍ជាតិ ហើយបានប្រកាសថា ក្រុមខ្លួនបានផ្តួលរំលំរដ្ឋាភិបាលរបស់លោក ប្រធានាធិបតី ម៉ូហាម៉េដ បាហ្ស៊ូម (Mohamed Bazhoum) ដោយសារតែរដ្ឋាភិបាលនេះ គ្មានសមត្ថភាពការពារសន្តិសុខរបស់ប្រទេស។ នៅក្នុងការថ្លែងនេះ មេបញ្ជាការម្នាក់ឈ្មោះ Amadou Adramane បានបញ្ជាឲ្យបិទផ្អាកទាំងអស់ នូវស្ថាប័នរដ្ឋ បិទព្រំដែនចេញចូលទាំងស្រុង។ មេក្រុមយោធានេះ បានអះអាងថា ខ្លួនបានទទួលការគាំទ្រទាំងស្រុង ពីកងប្រដាប់អាវុធទាំងអស់ ដោយរាប់ទាំងកងទ័ពជាតិ កងអាវុធហត្ថ និងនគរបាលនីហ្សេង។
ប៉ុន្មានម៉ោងក្រោយការផ្សាយនេះ លោករដ្ឋមន្ត្រីក្រសួងការបរទេសនីហ្សេ បានអះអាងតាមកញ្ចក់ទូរទស្សន៍បារាំង France 24 ថា លោកប្រធានាធិបតី ម៉ូហាម៉េដ បាហ្ស៊ូម ត្រូវបានក្រុមយោធាចាប់ឃាត់ខ្លួន តែស្ថិតនៅកន្លែងមានសុវត្ថិភាពល្អទេ។ តែយ៉ាងណា លោកម្នាក់នេះបានអះអាងថា អំណាចគ្រប់គ្រងទាំងស្រុងនៅតែស្ថិតក្នុងដៃរដ្ឋាភិបាលដដែលទេ និងបានអំពាវនាវឲ្យពួកយោធាចូលបន្ទាយវិញ។ ស្រាប់តែនៅព្រឹកថ្ងៃព្រហស្បតិ៍ អគ្គបញ្ជាការដ្ឋានកងទ័ពជាតិនីហ្សេ បានប្រកាសថា កងទ័ពសូមចូលរួមគាំទ្រ ជាមួយក្រុមយោធាដែលធ្វើរដ្ឋប្រហារ ដើម្បីបញ្ចៀសការបង្ហូរឈាម រវាងក្រុមប្រដាប់អាវុធទាំងអស់។
ក្រោយទទួលបានដំណឹងស្តីពីរដ្ឋប្រហារនៅនីហ្សេ រសៀលថ្ងៃព្រហស្បតិ៍ លោក Volker Türk ឧត្តមស្នងការទទួលបន្ទុកសិទ្ធិមនុស្សនៃអង្គការសហប្រជាជាតិ បានទាមទារឲ្យ ក្រុមយោធានីហ្សេ ត្រូវតែដោះលែង លោកប្រធានាធិបតី ម៉ូហាម៉េដ បាហ្ស៊ូម ព្រមទាំងមន្ត្រីផ្សេងទៀត ជាបន្ទាន់ និងដោយឥតលក្ខខណ្ឌ។ ដូចគ្នាដែរ លោករដ្ឋមន្ត្រីក្រសួងការបរទេសអាមេរិក ព្រមទាំងតំណាងកិច្ចការបរទេសនៃសហភាពអឺរ៉ុប បានថ្លែងសារព្រមៗគ្នា ថ្កោលទោសការធ្វើរដ្ឋប្រហារយោធានៅនីហ្សេ និងទាមទារឲ្យដោះលែងលោកប្រធានាធិបតីនីហ្សេជាបន្ទាន់។
សូមបញ្ជាក់ថា នីហ្សេ គឺជាប្រទេសចុងក្រោយគេ ដែលជាសម្ព័ន្ធមិត្តរបស់ក្រុមប្រទេសលោកខាងលិច នៅក្នុងយុទ្ធនាការប្រយុទ្ធប្រឆាំងនឹងក្រុមចលនាភេរវកម្មអ៊ីស្លាម តំបន់សាហ៊ែល បន្ទាប់ពីរដ្ឋាភិបាលប្រទេសម៉ាលី និងបួគីណាហ្វាសូ ត្រូវបានរដ្ឋប្រហារយោធាផ្តួលរំលំជាបន្តបន្ទាប់។ បច្ចុប្បន្ន បារាំងមានកងទ័ពខ្លួននៅនីហ្សេ ចំនួន ១៥០០នាក់ ដើម្បីបោសសំអាតក្រុមជីហាតអាល់កៃដា។
ដោយឡែក ព្រឹកថ្ងៃព្រហស្បតិ៍ ក្រុមបាតុករជាច្រើនរយនាក់ បានជួបជុំគ្នានៅទីក្រុងជាច្រើននៃប្រទេសនីហ្សេ ដោយពួកគេបានប្រកាសគាំទ្រការធ្វើរដ្ឋប្រហាររបស់ក្រុមយោធា និងបានស្រែកជេរបារាំង បណ្តេញកងទ័ពបារាំងថែមទៀត។ យោងតាមអ្នករាយការណ៍ព័ត៌មានបារាំង AFP នៅក្នុងក្បួនបាតុកម្ម គេឃើញក្រុមបាតុករនីហ្សេ លើកគ្រវីទង់ជាតិរុស្ស៊ី ស្វាគមន៍អរគុណរុស្ស៊ី។ យោងតាមការវិភាគខ្លះ គេសង្ស័យថា ចលចលរដ្ឋប្រហារនៅនីហ្សេនេះ វាអាចជាស្នាដៃកកូរកកាយ របស់រុស្ស៊ី ព្រោះថានៅម៉ាលី និងបួគីណាហ្វាសូ វត្តមានរបស់ក្រុមទាហានស៊ីឈ្នួលWagner របស់រុស្ស៊ីកំពុងតែមានវត្តមានយ៉ាងសកម្មរួចទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ