បារាំងចាប់ផ្តើមជម្លៀសប្រជាជនខ្លួនចេញពីនីហ្សេ បន្ទាប់ពីក្រុមបាតុករនីហ្សេវាយកម្ទេចស្ថានទូត
រដ្ឋាភិបាលបារាំង បានសម្រេចចាប់ផ្តើមប្រតិបត្តិការ ជម្លៀសប្រជាជនបារាំង ចេញពីប្រទេសនីហ្សេ។ ផ្អែកតាមប្រភពពីក្រសួងការបរទេសបារាំង យន្តហោះជើងទី១ បានហោះចេញពីទីក្រុងប៉ារីស នៅព្រឹកថ្ងៃអង្គារទី១សីហា សំដៅទៅរដ្ឋធានីនីអាម៉េ។ ស្ថានទូតបារាំងប្រចាំនៅនីហ្សេ បានសរសេរនៅលើគេហទំព័ររបស់ខ្លួន ដោយបានអំពាវនាវ ឲ្យប្រជាជនបារាំងមកជួបជុំគ្នាដើម្បីធ្វើដំណើរចាកចេញ ខណៈស្ថានការណ៍កាន់តែចលាចលក្រោយការធ្វើរដ្ឋប្រហារ និងបន្ទាប់ពីក្រុមបាតុករគាំទ្ររដ្ឋប្រហារ បានវាយបំផ្លាញស្ថានទូតបារាំងនៅក្រុងនីអាម៉េ យ៉ាងហិង្សាបំផុត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
ក្រសួងការបរទេសបារាំង បានអះអាងដែរ ថាប្រតិបត្តិការជម្លៀសមនុស្សចេញពីនីហ្សេនេះ គឺបារាំងនឹងដឹកផងដែរ នូវប្រជាជនអឺរ៉ុបផ្សេងទៀត ដែលចង់ចាកចេញ។ យ៉ាងណាមិញ ក្រោយការប្រកាសនេះ រដ្ឋភិបាលអាល្លឺម៉ង់ និងអ៊ីតាលី បានចេញលិខិតប្រកាសប្រាប់ប្រជាជនខ្លួន ឲ្យចាកចេញពីនីហ្សេ តាមរយៈយន្តហោះរបស់បារាំង។
គិតមកទល់ពេលនេះ មិនទាន់មានការបញ្ជាក់ណាមួយ ថាប្រតិបត្តិការនេះ នឹងដំណើរការទៅរយៈពេលប៉ុន្មានថ្ងៃនោះទេ។ ក្រសួងការបរទេសបារាំងគ្រាន់ តែបានឲ្យដំណឹងថា ប្រតិតបត្តិការនេះ ត្រូវបានធ្វើឡើងដោយមានការសហការ អនុញ្ញាត ពីអាជ្ញាធរនីហ្សេព្រោះថាដែនអាកាសនីហ្សេត្រូវបិទជិតឈឹង ក្រោយថ្ងៃរដ្ឋប្រហារ។
សូមបញ្ជាក់ថា បច្ចុប្បន្នមានប្រជាជនបារាំងចំនួនប្រមាណ៦០០នាក់ ដែលកំពុងស្ថិតនៅប្រទេសនីហ្សេ។ ប្រតិបត្តិការជម្លៀសនេះ គឺឈរលើការស្ម័គ្រចិត្តរបស់ប្រជាជនម្នាក់ៗ ដោយគ្មានការបង្ខិតបង្ខំទេ។ ជនជាតិបារាំងខ្លះ បានអះអាងប្រាប់អ្នកយកព័ត៌មានបារាំង AFP ប្រចាំនៅក្រុងនីអាម៉េ ថាពួកគេនឹងមិនចាកចេញទេ។
សូមរំលឹកថា ២ថ្ងៃមកនេះ ក្រុមបាតរនីហ្សេ ដែលគាំទ្ររដ្ឋប្រហារយោធា បាននាំគ្នាជួបជុំនឹងវាយបំផ្លាញយ៉ាងហិង្សាបំផុត ទៅលើស្ថានទូតបារាំង ប្រចាំក្រុងនីអាម៉េ។ ក្រុមក្រុមបាតុរ ខ្លះបានលើកគ្រវីទង់ជាតិរុស្ស៊ី ខ្លះទៀតស្រែកជេរបារាំងនិងដុតទង់ជាតិបារាំង និងចោទថាបារាំង មានគម្រោងបើកអន្តរាគមន៍យោធានៅនីហ្សេ ដើម្បីផ្តួលរំលំរបបសិក។ ជាការចោទដែលលោកស្រី Catherine Colonna រដ្ឋមន្ត្រីក្រសួងការបរទេសបារាំង បានច្រានចោលទាំងស្រុង។ លោស្រីក៏បានបរិហារផងដែរ អំពីការចែកចាយព័ត៌មានប្រឌិតក្លែងក្លាយតាមបណ្តាញសង្គមនៅនីហ្សេ ដែលសុទ្ធសឹងជាព័ត៌មានមួរបង្កាច់ ញុះញង់ឲ្យស្អប់បារាំង
ក្រោយពាក្យចចាមអារ៉ាមថាបារាំងគ្រោងបញ្ជាទ័ពទៅផ្តួលរំលំរបបសិកនៅនីហ្សេនេះ បួគីណាហ្វាសូ និងម៉ាលី ដែលសុទ្ធតែគ្រប់គ្រងដោយរបបសិកដែរនោះ បានចេញសេចក្តីថ្លែងការណ៍ព្រមៗគ្នា កាលពីយប់ថ្ងៃ៣១កក្កដា ថាបើបារាំងធ្វើមែន គឺគេនឹងចាត់ទុកថាបារាំង ប្រកាសសង្គ្រាមជាមួយប្រទេសគេដែរ។ របបសិកបួគីណាហ្វាសូ និងម៉ាលី ក៏បានគំរាមទៀតដែរ ថានឹងចាកចេញពីសហគមន៍សេដ្ឋកិច្ចប្រទេសអាហ្វ្រិកខាងលិច ហៅកាត់ថា CEDEAO៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ