នីហ្សេ៖ អាមេរិកសម្រេចជម្លៀសបុគ្គលិកស្ថានទូត ដែលមិនចាំបាច់ ចេញពីក្រុងនីអាម៉េ
បន្ទាប់ពីបារាំងបានជម្លៀសប្រជាជនខ្លួនដែលស្ម័គ្រចិត្ត ឲ្យចាកចេញពីប្រទេសនីហ្សេ កាលពីថ្ងៃពុធទី២សីហា ក្រសួងការបរទេសអាមេរិក បានប្រកាសថាគេបានសម្រេច ជម្លៀសបុគ្គលិកមួយចំនួនធំរបស់ស្ថានទូតអាមេរិក ប្រចាំនៅក្រុងនៅអាម៉េ ឲ្យចាកចេញពីនីហ្សេ ដោយទុកតែបុគ្គលិកចាំបាច់មួយចំនួនតូចតែប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:០៩
អ្នកនាំពាក្យក្រសួងការបរទេសអាមេរិក បានបញ្ជាក់ថា ការសម្រេចនេះ គឺដោយសារតែស្ថានការណ៍កាន់តែចលាចល នាប៉ុន្មានថ្ងៃចុងក្រោយនេះ។ ជាមួយគ្នានេះ ក្រសួងការបរទេសអាមេរិក បានដំឡើងចំណាត់ថ្នាក់កម្រិតគ្រោះថ្នាក់សន្តិសុខ នៃប្រទេសនីហ្សេ ពីកម្រិតទី៣ឡើងទៅទី៤ ហើយបានប្រាប់ប្រជាជនអាមេរិកទាំងអស់ មិនត្រូវធ្វើដំណើរទៅកាន់ប្រទេសនេះ។
សូមបញ្ជាក់ថា បន្ទាប់ពីក្រុមបាតុករនីហ្សេ ដែលគាំទ្ររដ្ឋប្រហារ បានសម្រុកវាយប្រហារស្ថានទូតបារាំង កាលពីចុងសប្តាហ៍កន្លងទៅ រដ្ឋាភិបាលសម្រេចចិត្តជម្លៀសប្រជាជនបារាំងចេញ ដោយឈរលើគោលការណ៍ស្ម័គ្រចិត្ត។ ប្រតិបត្តិការនេះបានចប់សព្វគ្រប់ហើយ នៅព្រឹកថ្ងៃព្រហស្បតិ៍ទី៣សីហា ដោយបារាំងបានដឹកតាមយន្តហោះចំនួន៤គ្រឿង។ ក្រៅពីជនជាតិបារាំង មានជនជាតិអាមេរិកនិងអឺរ៉ុបផ្សេងទៀត ដែលបានឡើងយន្តហោះបារាំងដែរ។
សូមរំលឹកថា ក្រោយការធ្វើរដ្ឋប្រហាររបស់ក្រុមយោធានីហ្សេ កាលពីថ្ងៃទី២៦កក្កដា សហគមអន្តរជាតិបានអំពាវនាវ ឲ្យក្រុមយោធាដោះលែងលោកប្រធានាធិបតីស្របច្បាប់ ឈ្មោះ Mohamad Bazoum ដែលក្រុមយោធាបានចាប់បង្ឃាំងទុក។ កាលពីថ្ងៃពុធទី២សីហា លោកប្រមុខការទូតអាមេរិក បាននិយាយទូរស័ព្ទជាមួយលោកប្រធានាធិបតី Bazoum និងបានអះអាងថា អាមេរិកក៏ដូចជាក្រុមប្រទេសលោកខាងលិចទាំងអស់ នៅតែបន្តគាំទ្ររដ្ឋាភិបាលស៊ីវីលស្របច្បាប់របស់លោកជានិច្ច។
គួរបញ្ជាក់ថា មានការព្រួយបារម្ភជាខ្លាំង ថាថ្ងៃទី៣សីហា ដែលជាថ្ងៃបុណ្យជាតិនីហ្សេ គឺក្រុមបាតុករគាំទ្ររដ្ឋប្រហារ នឹងធ្វើសកម្មភាពវាយប្រហារ ប្រឆាំងស្ថានទូតប្រទេសមហាអំណាចលោកខាងលិច នៅទីក្រុងនីអាម៉េ។ ក្នុងក្បួនជួបជុំដែលគេឃើញ ក្រុមបាតុករលើកគ្រវីទង់ជាតិរុស្ស៊ី។ ប្រឈមនឹងការព្រួយបារម្ភេនេះដែរ ក្រសួងការបរទេសអង់គ្លេសក៏បានប្រកាស កាត់បន្ថយចំនួនបុគ្គលិកប្រចាំស្ថានទូត នៅឯទីក្រុងនីអាម៉េដែរ។ ដោយឡែក សមាគមប្រទេសសហប្រតិបត្តិការសេដ្ឋកិច្ចអាហ្វ្រិកខាងលិច បានអះអាងថា គេនឹងប្រើអន្តរាគមន៍យោធានៅនីហ្សេ បើទោះបីជាទទួលស្គាល់ថា វាជាជម្រើសចុងក្រោយ ដើម្បីស្តារសណ្តាប់ធ្នាប់ឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ