សហគមន៍អាហ្វ្រិកខាងលិច Cedeaoចេញបញ្ជាឲ្យពង្រាយកម្លាំងទ័ពត្រៀមសម្រាប់វិបត្តិនីហ្សេ
មេដឹកនាំរបស់ប្រទេសសមាជិកសហគមន៍អាហ្វ្រិកខាងលិច Cedeaoបានយល់ព្រមព្រៀងគ្នាកាលពីថ្ងៃព្រហស្បតិ៍ឲ្យមានការពង្រាយកម្លាំងទ័ពអាហ្វ្រិកខាងលិចដើម្បីស្តារសណ្តាប់ធ្នាប់រដ្ឋធម្មនុញ្ញនៅប្រទេសនីហ្សេ។ បារាំង និងអាមេរិក ដែលមានទ័ពប្រចាំការនៅនីហ្សេ បង្ហាញជំហរគាំទ្រគ្រប់ចំណាត់ការរបស់សហគមន៍អាហ្វ្រិកដើម្បីដោះស្រាយវិបត្តិនយោបាយនៅនីហ្សេ ដោយផ្តោតសំខាន់លើសេចក្តីសម្រេចសន្តិភាព។
ចុះផ្សាយនៅថ្ងៃ៖
ស្តាប់ - ០២:៣៧
នៅក្នុងជំនួបកំពូលបន្ទាន់នៅប្រទេសនីហ្សេរីយ៉ា កាលពីថ្ងៃព្រហស្បតិ៍ មេដឹកនាំរបស់ប្រទេសសមាជិកសហគមន៍សេដ្ឋកិច្ចអាហ្រ្វិកខាងលិច Cedeao បានយល់ព្រមព្រៀងគ្នាឲ្យមានការពង្រាយកងទ័ពត្រៀមដើម្បីស្តារសណ្តាប់ធ្នាប់រដ្ឋធម្មនុញ្ញនៅនីហ្សេ។
មេដឹកនាំរបស់ក្រុមប្រទេសCedeaoមិនបានបញ្ជាក់ពីពេលវេលានិងចំនួនទ័ពដែលគេត្រូវពង្រាយសម្រាប់ទប់ទល់នឹងក្រុមយោធានីហ្សេដែលធ្វើរដ្ឋប្រហារទម្លាក់រដ្ឋាភិបាលស៊ីវិល កាលពីចុងខែកក្កដា។ ប៉ុន្តែ តាមប្រធានាធិបតីរបស់ប្រទេសកូតឌីវ័រ លោកអាឡាសាន វ៉ាត់តារ៉ា មេដឹកនាំរបស់ប្រទេសសមាជិកCedeaoបានបើកភ្លើងខៀវឲ្យមានប្រតិបត្តិការយោធាដែលនឹងអាចចាប់ផ្តើមក្នុងពេលដ៏ខ្លីខាងមុខ។
ប្រធានាធិបតីកូតឌីវ័របន្ថែមដែរថា កូតឌីវ័រនឹងបញ្ជូនទាហានមួយកងពលដែលមានចំនួនពី ៨៥០នាក់ទៅ ១១០០នាក់ ទៅចូលរួមជាមួយកងទ័ពនីហ្សេរីយ៉ា និងបេណាំង។ ចំណែកប្រទេសដទៃទៀតនឹងចូលរួមជាបន្តបន្ទាប់។
នៅថ្ងៃព្រហស្បតិ៍ បារាំងដែលមានទាហាន១៥០០នាក់ឈរជើងប្រចាំការនៅមូលដ្ឋានទ័ពក្នុងរដ្ឋធានី នីអាម៉េ បាននិយាយគាំទ្រពេញទំហឹងគ្រប់ចំណាត់ការរបស់Cedeao។ ចំណែកប្រមុខការបរទេសអាមេរិកលោកអង់តូនីប្លីងកិន អំពាវនាវឲ្យមានដំណោះស្រាយដោយ គ្មានប្រើអំពើហិង្សា ដើម្បីផ្តួលរបបសឹកនីហ្សេ។
ភ្លើងខៀវឲ្យមានការពង្រាយកម្លាំងទ័ពត្រៀមរបស់សហគមន៍អាហ្វ្រិកខាងលិច Cedeao ធ្វើឡើងនៅ៥ថ្ងៃក្រោយ របបសឹកនីហ្សេបដិសេធមិនព្រមធ្វើតាមការដាក់ឱសានវាទរបស់Cedeao ដែលបានគំរាមប្រើកម្លាំងយោធា ក្នុងករណីរបបសឹកមិនព្រមដោះលែង និងប្រគល់អំណាចទៅឲ្យប្រធានាធិបតី លោកបាហ្ស៊ូម។
ទោះឱសានវាទចប់ទៅ កាលពីថ្ងៃអាទិត្យ ទី ៦សីហា ដោយគ្មានលទ្ធផលអ្វី ប៉ុន្តែថ្នាក់ដឹកនាំអាហ្វ្រិកខាងលិចនៅតែផ្តល់អាទិភាពដោះស្រាយវិបត្តិនីហ្សេតាមផ្លូវចរចាការទូត ប៉ុន្តែ មិនទាត់ចោលអន្តរាគមន៍យោធាដែលជាជម្រើសចុងក្រោយបំផុត។
នៅរដ្ឋធានីនីអាម៉េ ក្រុមយោធានីហ្សេមិនត្រឹមតែបិទផ្លូវ មិនព្រមចរចាទទួលជួបគណៈប្រតិភូCedeao សហភាពអាហ្វ្រិក និងអង្គការសហប្រជាជាតិកាលពីថ្ងៃអង្គារ ប៉ុន្តែ នៅបានប្រកាសបង្កើតរដ្ឋាភិបាលនីហ្សេថ្មី នៅយប់ថ្ងៃពុធ ប៉ុន្មានម៉ោងមុនជំនួបកំពូលរបស់Cedeao។ ការបង្កើតរដ្ឋាភិបាលស៊ីវិលថ្មីដែលមានសមាជិក២០រូប ដឹកនាំដោយសេដ្ឋកិច្ចវិទូ បញ្ជាក់យ៉ាងច្បាស់ការប្តេជ្ញាចិត្តរបស់របបសឹកនីហ្សេ ដែលមិនព្រមចុះចាញ់ ប្រគល់អំណាចទៅឲ្យប្រធានាធិបតីទៅតាមការគំរាម និងការដាក់សម្ពាធរបស់សហគមន៍អាហ្វ្រិកខាងលិចCedeao៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ