សហគមន៍Cedeao លើកពេលប្រជុំយោធា ក្រោយមានបាតុកម្មប្រឆាំងបារាំងនៅនីហ្សេ
ក្រុមប្រទេសជាសហគមន៍អាហ្វ្រិកខាងលិច Cédeao ត្រូវជួបប្រជុំគ្នាជាថ្មីនៅថ្ងៃសៅរ៍ទី១២សីហានេះ ប៉ុន្តែបែរជាត្រូវអាក់ខាន និងលើកពេលទៅថ្ងៃក្រោយវិញ ដោយគ្មានកាលកំណត់។ ជាជំនួបប្រជុំដ៏សំខាន់ ស្តីពីការរៀបចំពង្រាយកងកម្លាំងទ័ពដើម្បីស្តារសណ្តាប់ធ្នាប់ធម្មនុញ្ញឱ្យប្រទេសនីហ្សេ ដែលនៅថ្ងៃសុក្រម្សិលមិញ ក្រុមសកម្មជនគាំទ្ររបបសឹក ព្រមទាំងក្រុមយោធាផង បាននាំគ្នាធ្វើបាតុកម្មយ៉ាងធំនៅក្បែរមូលដ្ឋានទ័ពបារាំង។
ចុះផ្សាយនៅថ្ងៃ៖
ស្តាប់ - ០២:១៣
ក្រោយសេចក្តីសម្រេចរបស់សហគមន៍អាហ្វ្រិកខាងលិចCedeao អនុញ្ញាតឱ្យប្រើកម្លាំងទ័ពទៅស្តារស្ថានភាពនៅនីហ្សេ របបសឹកដែលដឹកនាំធ្វើរដ្ឋប្រហារទម្លាក់រដ្ឋាភិបាលស៊ីវិល មិនបានបញ្ចេញប្រតិកម្មអ្វីទាំងអស់ ប៉ុន្តែក្រុមទាហានអមដោយសកម្មជនជាច្រើនពាន់នាក់បាននាំគ្នាធ្វើបាតុកម្មនៅក្បែរមូលដ្ឋានទ័ពបារាំងជាថ្មីនៅថ្ងៃសុក្រទី១១សីហា។ បារាំងអតីតប្រទេសអាណានិគមន៍លើនីហ្សេ បានក្លាយជាផ្ទាំងស៊ីបបាតុកម្ម ដោយក្រុមយោធានីហ្សេ ចោទបារាំងថាជាដើមហេតុនាំឱ្យសហគមន៍អាហ្វ្រិកខាងលិចសម្រេចប្រើកម្លាំងទ័ព។
ម្យ៉ាងវិញទៀត ក្តីព្រួយបារម្ភជុំវិញសុវត្ថិភាពលោកប្រធានាធិបតី បាហ្ស៊ូម ដែលក្រុមយោធានីហ្សេបានចាប់ឃុំឃាំងតាំងពីពីរសប្តាហ៍មកហើយ កំពុងរីកធំធាត់ជាលំដាប់។ បើតាមអង្គការសហប្រជាជាតិ លោកបាហ្ស៊ូមនិងភរិយាព្រមទាំងកូន រងការធ្វើបាបយ៉ាងអមនុស្សធម៌ អត់អាហារ គ្មានភ្លើងប្រើប្រាស់ជាច្រើនថ្ងៃមកហើយ។ ជំនិតរបស់ប្រធានាធិបតីរូបនេះបានអះអាងថា របបសឹកនីហ្សេថ្មី បានគំរាមជីវិតលោកបាហ្ស៊ូមតែម្តងប្រសិនបើសហគមន៍អាហ្វ្រិកខាងលិចពិតជាធ្វើអន្តរាគមន៍យោធានៅនីហ្សេមែន។
ប្រឈមនឹងស្ថានភាពបែបនេះ ជំនួបប្រជុំជាថ្មីរបស់សហគមន៍អាហ្វ្រិកខាងលិច មិនអាចប្រព្រឹត្តទៅបាននៅថ្ងៃសៅរ៍ទី ១២សីហានេះទេ។ បើតាមប្រភពយោធាតំបន់ កិច្ចប្រជុំដ៏សំខាន់ថ្នាក់នាយអគ្គសេនាធិការសមាគមន៍អាហ្វ្រិកខាងលិចដើម្បីរិះរកវិធីដាក់ឱ្យដំណើរការគម្រោងពង្រាយកម្លាំងទ័ពនោះ ត្រូវលើកពេលទៅថ្ងៃក្រោយដោយគ្មានកាលកំណត់ ដោយហេតុតែបញ្ហាបច្ចេកទេស។ ក្រុមប្រតិភូជានាយអគ្គសេនាធិការនៃប្រទេសក្នុងសហគមន៍អាហ្វ្រិកខាងលិច គ្មានពេលនិងមធ្យោបាយគ្រប់គ្រាន់នឹងធ្វើដំណើរទៅកាន់រដ្ឋធានីប្រទេសហ្កាណាដើម្បីជួបប្រជុំគ្នាទេ។ ប្រភពច្បាស់ការណ៍មួយបញ្ជាក់ថា ជំនួបប្រជុំនេះទំនងត្រូវធ្វើនៅដើមសប្តាហ៍ក្រោយ។
នៅក្នុងសេចក្តីសម្រេច កាលពីថ្ងៃទី១០សីហា សមាគមន៍អាហ្វ្រិកខាងលិចCedeao មិនបានបញ្ជាក់អំពីពេលវេលានិងចំនួនទ័ពសម្រាប់ចូលធ្វើប្រតិបត្តិការនៅនីហ្សេទេ ប៉ុន្តែសហគមន៍មានកងកម្លាំងទ័ពបម្រុង ដែលមានសមាសភាពជាទាហាន ជាប៉ូលិស និងជាជនស៊ីវិល អាចចេញធ្វើអន្តរាគមន៍បានភ្លាមចំនួនប្រមាណ២៥០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ