នីហ្សេ៖ ក្រុមយោធារដ្ឋប្រហារ ដាក់ឱសានុវាទ៤៨ម៉ោង ឲ្យឯកអគ្គរដ្ឋទូតបារាំងចាកចេញ
១ខែគត់បន្ទាប់ពីក្រុមយោធានីហ្សេ បានធ្វើរដ្ឋប្រហារផ្តួលរំលំ រដ្ឋាភិបាលស្របច្បាប់ របស់លោកប្រធានាធិបតី ម៉ូហាម៉េដ បាហ្ស៊ូម នៅថ្ងៃទី២៦សីហា របបសិកបានបណ្តេញឯកអគ្គរដ្ឋទូតបារាំងឲ្យចាកចេញជាបន្ទាន់ ពីទឹកដីនីហ្សេ។ យោងតាមលិខិតប្រកាសមួយ របស់ក្រសួងការបរទេសនៃរបបសិកនីហ្សេ ចេញផ្សាយកាលពីល្ងាចថ្ងៃសុក្រ ទី២៥សីហា ក្រុមយោធាធ្វើរដ្ឋប្រហារបានដាក់ឱសានុវាទ៤៨ម៉ោង ឲ្យលោក Sylvain Itté ឯកអគ្គរដ្ឋទូតបារាំងប្រចាំនីហ្សេ ត្រូវតែចាកចេញជាបន្ទាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០២
លិខិតរបស់ក្រុមយោធានីហ្សេ បានលើកហេតុផលថា គឺដោយសារតែលោកអគ្គរដ្ឋទូតបារាំង មិនព្រមចូលខ្លួនទៅតាមការអញ្ជើញកាលពីថ្ងៃសុក្រ ដើម្បីជួបប្រជុំនិយាយគ្នា ជាមួយនឹងថ្នាក់ដឹកនាំរបបសិកនីហ្សេ។ បន្ថែមពីនេះ ក្រុមយោធា បានលើកហេតុផលថា បារាំងបាននិងកំពុងតែធ្វើសកម្មភាពឃុបឃិតមួយចំនួន ដែលប្រឆាំងនឹងផលប្រយោជន៍របស់នីហ្សេ។ ក្រៅពីនេះ របបសិកនីហ្សេ ក៏បានដាក់ឱសានុវាទ៤៨ម៉ោង បណ្តេញអគ្គរដ្ឋទូតប្រទេសនីហ្សេរីយ៉ាងផងដែរ។ ដោយឡែកមានលិខិតមួយចំនួនទៀត ប្រកាសបណ្តេញអគ្គរដ្ឋទូតប្រទេសលោកខាងលិចផ្សេងទៀត ដែលត្រូវបានគេផ្សព្វផ្សាយតាមបណ្តាញសង្គម។ តែក្រុមយោធានីហ្សេអះអាងថាជាលិខិតក្លែងក្លាយទេ។
ភ្លាមៗបន្ទាប់ពីបានទទួលលិខិតបណ្តេញអគ្គរដ្ឋទូតរបស់ខ្លួន ក្រសួងការបរទេសបារាំងប្រតិកម្មតបទៅវិញថា ក្រុមយោធានីហ្សេ ដែលបានធ្វើរដ្ឋប្រហារ មិនមានសិទ្ធិអំណាចស្របច្បាប់ណាមួយ មកបណ្តេញអគ្គរដ្ឋទូតបារាំងនោះទេ។ បារាំងទទួលស្គាល់រដ្ឋាភិបាលនីហ្សេ ស្របច្បាប់តែមួយគត់ គឺរដ្ឋាភិបាលរបស់លោកប្រធានាធិបតី ម៉ូហាម៉េដ បាហ្ស៊ូម ដែលបច្ចុប្បន្នលោក ព្រមទាំងក្រុមគ្រួសារ ត្រូវបានក្រុមយោធាធ្វើរដ្ឋប្រហារ ដាក់បង្ឃាំងទុកក្នុងវិមានប្រធានាធិបតី។
គួរបញ្ជាក់ថា បារាំងមានទាហានចំនួនប្រមាណ១៥០០នាក់នៅនីហ្សេ ដែលធ្វើប្រតិបត្តិការប្រយុទ្ធប្រឆាំងនឹងក្រុមជីហាតភេរវកម្ម។ តែយ៉ាងណា វត្តមានរបស់ទាហានបារាំង ត្រូវបានប្រជាជននីហ្សេដែលគាំទ្រក្រុមយោធា បានសម្តែងការមិនពេញចិត្តកាន់តែខ្លាំង។ កាលពីថ្ងៃទី៣សីហា របបសិកនីហ្សេ បានប្រកាសបិទបញ្ចប់កិច្ចព្រមព្រៀងសហប្រតិបត្តិជាមួយកងទ័ពបារាំង។ នៅថ្ងៃទី៣កញ្ញាខាងមុខ ក្រុមបាតុករនីហ្សេគាំទ្ររដ្ឋប្រហារ ប្រកាសថាគេនឹងនាំគ្នាទៅធ្វើបាតុកម្មនៅខាងមុខ ទីតាំងបន្ទាយទាហានបារាំង នៅក្រុងនីអាម៉េ ដើម្បីបណ្តេញកងទ័ពបារាំង។
សូមបញ្ជាក់ដែរថា ស្ថានទូតបារាំងប្រចាំទីក្រុងនីអាម៉េ ត្រូវបានក្រុមបាតុករជួបជុំគ្នាវាយប្រហារ ប៉ុនប៉ងសំរុកចូល ជាច្រើនលើក។ ក្នុងក្បួនបាតុកម្មរបស់ក្រុមគាំទ្ររដ្ឋប្រហារយោធា បាតុករតែងតែស្រែកជេរបារាំង និងបណ្តាក្រុមប្រទេសលោកខាងលិច ព្រមទាំងសហគមន៍ដើម្បីសហប្រតិបត្តិការសេដ្ឋកិច្ចក្រុមប្រទេសអាហ្វ្រិកខាងលិច ហៅកាត់ថា CEDEAO ដែលរបបសិកនីហ្សេ ចោទថាគឺជាអាយ៉ងរបស់បារាំង។ ផ្ទុយទៅវិញ ក្រុមបាតុករនីហ្សេមួយចំនួនធំ បានគ្រវីទង់ជាតិរុស្ស៊ីនិងបានស្រែកអរគុណ លោកពូទីន ថាគឺជាក្តីសង្ឃឹមថ្មី ក្នុងការជួយស្រោចស្រង់ប្រទេសនីហ្សេ តាមរយៈអន្តរាគមន៍របស់កងកម្លាំងទាហានស៊ីឈ្នួលWagner៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ