រត់ជាន់គ្នានៅម៉ាដាហ្កាស្កា៖ ស្លាប់យ៉ាងតិច១២នាក់ របួសជាង៨០នាក់
កាលពីរសៀលថ្ងៃសុក្រម្សិលមិញ មានករណីរត់ជាន់គ្នា នៅច្រកចូលកីឡដ្ឋាន ក្នុងរដ្ឋធានីអង់តាណាណារីវ៉ូ ដែលបានបណ្ដាលឲ្យស្លាប់មនុស្ស១២នាក់ និងរបួសជាង៨០នាក់ផ្សេងទៀត។ នេះមិនមែនជាលើកទី១ឡើយសម្រាប់ប្រទេសកោះធំជាងគេទី២មួយនេះ ខណៈកន្លងមក កីឡដ្ឋានមួយនេះធ្លាប់ជួបប្រទះករណីរត់ជាន់គ្នាដល់ទៅ២ដង ជាប់ៗគ្នា ក្នុងឆ្នាំ២០១៩ និង២០១៨។
ចុះផ្សាយនៅថ្ងៃ៖
ស្តាប់ - ០២:០៧
មនុស្សយ៉ាងតិច១២នាក់បានស្លាប់ ខណៈជាង៨០នាក់ផ្សេងទៀតបានរងរបួស ក្នុងករណីរត់ជាន់គ្នា កាលពីរសៀលថ្ងៃសុក្រម្សិលមិញ មុនពិធីបើកការប្រកួតកីឡាIndian Ocean Island Games លើកទី១១ នាកីឡដ្ឋានBarea Mahamasina ក្នុងប្រទេសម៉ាដាហ្កាស្ការ។ មនុស្សជាច្រើនកុះករ ត្រូវបានគេរាយការណ៍ថា បានចូលទៅទស្សនាពិធីបើក កាលពីម្សិលមិញនេះ ដែលជារួមមានជាអ្នកមកពីប្រទេសនិងកោះ Comoros, Madagascar, Mauritius, Seychelles, the Maldives និង Réunion ។
យោងតាមនាយករដ្ឋមន្រ្តីម៉ាដាហ្កាស្ការ លោក Christian Ntsay គិតត្រឹមរសៀលថ្ងៃសុក្រម្សិលមិញ ក្នុងចំណោមអ្នករបួសទាំងប្រមាណ៨០នាក់ ក្នុងនោះមានមនុស្ស១១នាក់ ដែលត្រូវការការវះកាត់ព្យាបាលជាបន្ទាន់។ យ៉ាងណាមិញ លោក Christian Ntsay គូសបញ្ជាក់ថា រដ្ឋនឹងរ៉ាប់រងថ្លៃព្យាបាលដល់ជនរងគ្រោះទាំងអស់។ ក្រៅតែពីផ្ញើសារចូលរួមរំលែកទុក្ខដល់គ្រួសារជនរងគ្រោះ នាយករដ្ឋមន្រ្តីរូបនេះ ក៏បានរៀបចំពិធី ស្ងប់ស្ងាត់១នាទី នៅអំឡុងពិធីបើកកីឡាមួយនេះដែរ ដើម្បីជាកាន់ទុក្ខទៅដល់អ្នកបាត់បង់ជីវិត ។
សូមបញ្ជាក់ថា នេះមិនមែនជាលើកទី១ឡើយក្នុងប្រទេសម៉ាដាហ្កាស្កា។ កាលពីខែមិថុនាឆ្នាំ២០១៩ មានករណីរត់ជាន់គ្នាស្រដៀងគ្នានេះ បានកើតឡើងនៅទីតាំងតែមួយ អំឡុងការប្រារព្វទិវាឯករាជ្យជាតិ ដែលបណ្ដាលឲ្យស្លាប់យ៉ាងតិច១៥នាក់ និងរបួសជាង៧០នាក់ផ្សេងទៀត។ ចំណែកកាលពីខែកញ្ញាឆ្នាំ២០១៨ មានករណីរត់ជាន់គ្នាផ្សេងទៀត នៅច្រកចូលកីឡដ្ឋានមួយនេះដូចគ្នា ដែលបានសម្លាប់មនុស្ស១នាក់ និងរបួសជិត៥០នាក់ផ្សេងទៀត ។ ក្រៅពីនេះ នៅទីតាំងនេះ ធ្លាប់មានហេតុការណ៍បំផ្ទុះគ្រាប់បែកដៃ កាលពីឆ្នាំ២០១៦ ដែលបានសម្លាប់មនុស្ស២នាក់ និងរបួសប្រមាណ៨០នាក់ផ្សេងទៀត។
គួរជម្រាបថា កីឡដ្ឋាន Mahamasina គឺជាកីឡដ្ឋានធំជាងគេ របស់ប្រទេសម៉ាដាហ្កាស្កា ដែលភាគច្រើនត្រូវបានប្រើជាទីតាំងរៀបចំពិធីប្រកួតកីឡាធំៗ និងអាចផ្ទុកអ្នកទស្សនាប្រមាណ៤ម៉ឺន១ពាន់នាក់។
ម៉ាដាហ្កាស្កាគឺជាប្រទេសកោះធំជាងគេទី២នៅលើពិភពលោកបន្ទាប់ពីប្រទេសឥណ្ឌូណេស៊ី ដែលមានក្រឡាផ្ទៃសរុបប្រមាណ ៥៩២,៨០០ គីឡូម៉ែត្រការ៉េ។ ប្រទេសកោះធំជាងគេទីពីរនេះ មានឈ្មោះជាផ្លូវការថា សាធារណរដ្ឋម៉ាដាហ្កាស្កា ស្ថិតនៅក្នុងមហាសមុទ្រឥណ្ឌា ដែលមានចម្ងាយប្រមាណ ៤០០ គីឡូម៉ែត្រពីឆ្នេរតំបន់អាហ្វ្រិកខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ