ហ្កាបុង៖ ក្រុមយោធាប្រកាសលុបលទ្ធផលឆ្នោតនិងបញ្ចប់របបដឹកនាំក្នុងប្រទេស
ក្រុមយោធាហ្កាបុងកំពុងធ្វើរដ្ឋប្រហារដែរឬ? ភាពស្រពិចស្រពិលកំពុងកើតមាននៅក្នុងប្រទេសហ្កាបុង។ គ្រាន់តែឃើញលទ្ធផលជាផ្លូវការនៃការបោះឆ្នោតប្រធានាធិបតីដែលផ្តល់ជ័យជំនះឱ្យលោកអាលី បុងហ្កោ អុងឌីមបា ជាប់ជាប្រធានាធិបតីអាណត្តិទីបីភ្លាម ក្រុមយោធាបានចេញមុខប្រកាសលុបចោលការបោះឆ្នោតនោះ និងប្រកាសរំលាយស្ថាប័នរដ្ឋទាំងអស់ ដើម្បីបិទបញ្ចប់របបកាន់អំណាចនៅក្នុងប្រទេសហ្កាបុងបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០២:២១
ទូរទស្សន៍ជាតិហ្កាបុងបានប្រកាសលទ្ធផលបោះឆ្នោតប្រធានាធិបតី(ថ្ងៃទី២៦សីហា) នៅយប់ថ្ងៃអង្គារឆ្លងមកថ្ងៃពុធ ដោយប្រធានាធិបតីផុតអាណត្តិ អាលី បុងហ្កោ ដែលដឹកនាំប្រទេស១៤ឆ្នាំមកហើយ បានទទួលជោគជ័យក្នុងសំឡេងគាំទ្រ៦៤,២៧%។ គ្រាន់តែប្រកាសចប់ភ្លាម សំឡេងស្នូរកាំភ្លើងបានផ្ទុះឡើង។ ព័ត៌មានទាក់ទងនឹងការបោះឆ្នោតបានបង្វែរទៅផ្សាយក្នុងបណ្តាញទូរទស្សន៍Gabon២៤ ផ្សាយចេញពីវិមានប្រធានាធិបតី។
នៅវេលាម៉ោង៥ទៀបភ្លឺ ពេលទូរទស្សន៍កំពុងបង្ហាញលទ្ធផលឆ្នោត ស្រាប់តែក្រុមយោធា១២នាក់បានលេចមុខតាមកញ្ចក់ទូរទស្សន៍ ប្រកាសបិទបញ្ចប់របបដឹកនាំប្រទេសហ្កាបុងតែម្តង។ “យើង កងកម្លាំងការពារជាតិ និងសន្តិសុខ រួមគ្នាជាគណៈកម្មការដើម្បីអន្តរការនិងស្តារស្ថាប័ន ក្នុងនាមប្រជាជនហ្កាបុងនិងក្នុងនាមជាអ្នកធានាការពារស្ថាប័នរដ្ឋបានសម្រេចការពារសន្តិភាពដោយបិទបញ្ចប់របបដឹកនាំបច្ចុប្បន្ន។ លទ្ធផល និងការបោះឆ្នោតទូទៅថ្ងៃទី២៦សីហា ត្រូវលុបចោលទាំងស្រុង។ នេះបើតាមយោធាម្នាក់ជាវរសេនីយ៍ឯកនៃកងយោធាជាតិហ្កាបុង។ ក្រុមយោធាបានបរិហារការបោះឆ្នោតថាគ្មានតម្លាភាព មិនគួរជឿទុកចិត្តសម្រាប់ប្រជាពលរដ្ឋ និងចោទរដ្ឋាភិបាលថាគ្មានទំនួលខុសត្រូវ ធ្វើឱ្យស្ថានភាពសង្គមនិងប្រទេសបានធ្លាក់ចុះជាលំដាប់ទៅរកភាពវឹកវរ។ ជាមួយនឹងការ សម្រេចរំលាយរដ្ឋាភិបាល សភានិងព្រឹទ្ធសភា តុលាការធម្មនុញ្ញ ក្រុមប្រឹក្សាសេដ្ឋកិច្ចសង្គមនិងបរិស្ថាន ព្រមទាំងមជ្ឈមណ្ឌលគ្រប់គ្រងការបោះឆ្នោត ក្រុមយោធាបានប្រកាសបិទព្រំដែនរហូតដល់មានបទបញ្ជាថ្មី។
យោធាមួយក្រុមនេះ មានគ្នាចម្រុះ ជាទាហានជាតិ ជាប៉ូលិស (មួកក្រហម) ជាក្រុមទាហានជើងឆើតនៃកងអង្គរក្សប្រធានាធិបតី (មួកបៃតង)។ ចំណែកក្រុមមួកខ្មៅ ច្រើនជាទាហានក្នុងកងពាសដែក។
ហេតុការណ៍នេះប្រព្រឹត្តទៅក្នុងខណៈដែលហ្កាបុងស្ថិតក្នុងបម្រាមគោចរ និងគ្មានសេវាអ៊ីនធ័រនែត។ រដ្ឋាភិបាលផុតអាណត្តិរបស់លោក អាលី បុងហ្កោបានចាត់វិធានការពីរនេះ កាលពីថ្ងៃសៅរ៍ទី២៦ សីហា មុនបិទការិយាល័យបោះឆ្នោតបន្តិច បង្ការកុំឱ្យមានការផ្សព្វផ្សាយព័ត៌មានមិនពិត និងអំពើហិង្សាជាយថាហេតុណាមួយ។
មានអាយុ៦៤ឆ្នាំ លោក អាលី បុងហ្កោបានជាប់ឆ្នោតជាប្រធានាធិបតីហ្កាបុងជាលើកទីមួយនៅឆ្នាំ២០០៩ ក្រោយមរណភាពរបស់ឪពុកឈ្មោះ អូម៉ា បុងហ្កោ អុងឌីមបា ដែលបានដឹកនាំប្រទេសជាង៤១ឆ្នាំ។ ពោលគឺហ្កាបុងស្ថិតក្រោមការដឹកនាំរបស់ត្រកូល អុងឌីមបា ចំនួនជាង៥៥ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ