អង្គការសហប្រជាជាតិ រៀបចំជាលើកទី១ វេទិកាអន្តរជាតិស្តីពីជនភៀសខ្លួន
ចុះផ្សាយនៅថ្ងៃ៖
ស្តាប់ - ០៧:៥៤
គោលដៅចំបងរបស់វេទិកាអង្គការសហប្រជាជាតិ ដែលមានចូលរួមពីប្រមុខដឹកនាំ អង្គការក្រៅរដ្ឋាភិបាល និងក្រុមហ៊ុនឯកជនជាងរាប់រយ នៅក្នុងពិភពលោក គឺ ដាក់ឲ្យអនុវត្តជាក់ស្តែង កតិកាសញ្ញាស្តីពីជនភៀសខ្លួន ដែលអង្គការសហប្រជាជាតិបានបោះឆ្នោតអនុម័តកាលពីថ្ងៃទី១៧ ធ្នូ ឆ្នាំ ២០១៨ នៅទីក្រុងញូវយ៉ក។ វេទិកានេះរៀបចំឡើង នៅក្នុងបរិបទដែលពិភពលោក កំពុងប្រឈមនឹងការកើនឡើងនៃចំនួន ជនភៀសខ្លួនដ៏ខ្ពស់បំផុតមិនធ្លាប់មាន ប្រមាណ ២៦លាននាក់ ក្នុងចំណោម មនុស្សផ្លាស់ទីសរុប ៧១លាននាក់។
អង្គការសហប្រជាជាតិរៀបចំ វេទិកាអន្តរជាតិ ស្តីពីជនភៀសខ្លួន នៅថ្ងៃអង្គារនេះ និងថ្ងៃពុធស្អែក នៅទីក្រុងហ្សឺណែវ។ នេះជាវេទិកាអន្តរជាតិ លើកដំបូងគេ ដែលអង្គការសហប្រជាជាតិ បានរៀបចំ ឡើងដើម្បីនិយាយពី តែពីបញ្ហាជនអន្តោប្រវេសន៍ ជនភៀសខ្លួន។
វេទិកា ដែលរៀបចំដោយឧត្តមស្នងការ ដើម្បីជនភៀសខ្លួន របស់អង្គការសហប្រជាជាតិមានគោលដៅ ដាក់ឲ្យអនុវត្តជាក់ស្តែង នូវកតិកាសញ្ញា អន្តរជាតិស្តីពីជនភៀសខ្លួន ដែលអង្គការសហប្រជាជាតិបានបោះឆ្នោត អនុម័ត យ៉ាងចម្រូងចម្រាសបំផុត កាលពីមួយឆ្នាំមុន នៅទីក្រុងញូវយ៉ក។ កតិកាសញ្ញាដែលគ្មានអានុភាពចាប់បង្ខំ ត្រូវបានបង្កើតឡើង នៅក្រោយ ផ្ទុះមាន វិបត្តិជនអន្តោប្រវេសន៍ នៅឆ្នាំ ២០១៥ និងការកើនឡើងនៃចំនួនជនភៀសខ្លួន ក្នុងបរិមាណ ដ៏ខ្ពស់បំផុត គឺ ២៦លាននាក់ ក្នុងចំណោមមនុស្សផ្លាស់ទីសរុប ៧១លាននាក់ នៅក្នុងពិភពលោក។
កតិកាសញ្ញា ស្តីពីជនភៀសខ្លួន ត្រូវបានបង្កើតឡើង ដើម្បីជួយសម្រួល សម្រាលបន្ទុក របស់ប្រទេសដែលទទួលជនភៀសខ្លួន ដែលភាគច្រើនជាប្រទេសដែលមិនសូវមានធូរធាប៉ុន្មាននោះទេ ដូចជា ប្រទេសលីបង់ ឬតួកគី ជាដើម ដែលពេលនេះ កំពុងទទួលឲ្យស្នាក់នៅ ជនភៀសខ្លួន ស៊ីរី ដល់ទៅ ៣លាននាក់ ក្នុងទឹកដីរបស់ខ្លួន។ កាតិកាសញ្ញាស្តីពីជនភៀសខ្លួន មានចែងផងដែរ ពីការវិលត្រលប់ របស់ជនភៀសខ្លួន ឬជនអន្តោប្រវេសន៍ ទៅទឹកដីកំណើតវិញប្រកបដោយសុវត្ថិភាពបំផុត។
នៅពេលដែលកតិកាសញ្ញាមានតែនៅលើក្រដាស វេទិកាអន្តរជាតិស្តីពីជនភៀសខ្លួន នៅទីក្រុងហ្សឺណែវ នៅថ្ងៃអង្គារនេះ ត្រូវបានរៀបចំឡើង ជាពិសេស ក្នុងគោលដៅ ទទួលបានថវិកា ជំនួយហិរញ្ញវត្ថុ ជំនួយ សំភារៈ សម្រាប់កម្មវិធី សកម្មភាពជួយជនភៀសខ្លួន។ នៅមុនបើកវេទិកានៅទីក្រុងហ្សឺណែវ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយទែរក៍ បាននិយាយថា លោកសង្ឃឹមនឹងទទួលបានជំនួយហិរញ្ញវត្ថុពីរដ្ឋាភិបាល ក្រុមហ៊ុនឯកជន ដើម្បីយកទៅជួយ ធ្វើឲ្យប្រសើរឡើង នូវ ស្ថានភាពរស់នៅរបស់ជនភៀសខ្លួន និងជនអន្តោប្រវេសន៍ ដែលកំពុងរស់នៅ រសាត់អណ្តែត នៅប្រទេសដទៃ និងក្នុងភាពអត្តខាត់បំផុត។
ក្រុមហ៊ុនទូរស័ព្ទអាមេរិក Vodafone ជាដើម ត្រូវគេរំពឹងថា នឹងជួយ ផ្តល់សេវាអ៊ីនធ័រនែតសម្រាប់ថ្នាក់រៀន នៅតាមជំរំភៀសខ្លួន ឲ្យបាន ៣០០ នៅឆ្នាំ ២០២៥។ គោលដៅសំខាន់មួយទៀត របស់វេទិកាអន្តរជាតិ នៅថ្ងៃនេះ គឺ អង្គការសហប្រជាជាតិ ទន្ទឹងរង់ចាំ ស្តាប់ការប្រកាសរបស់រដ្ឋាភិបាលប្រទេសនានា ក្នុងរឿងទទួលយកជនភៀសខ្លួនឲ្យទៅរស់នៅក្នុងប្រទេសរបស់ពួកគេ។ កន្លងមក ឧត្តមស្នងការជាន់ខ្ពស់ ដើម្បីជនភៀសខ្លួន បានបង្កើតកម្មវិធី មួយ ដើម្បីស្វែងរកបណ្តាប្រទេសអ្នកមានណា ដែលអាចទទួលយកជនភៀសខ្លួន ជនអន្តោប្រវេសន៍ ដែលកំពុងប្រឈមនឹងបញ្ហាអសន្តិសុខ នៅក្នុងជំរំភៀសខ្លួន ដូចជា នៅជំរំទឹកដីតួកគីជាដើម។ ជារួម អង្គការសហប្រជាជាតិ មានបំណងចង់ឲ្យគ្រប់ប្រទេស ទទួល ចំណែក បន្ទុកទទួលជនភៀសខ្លួន ស្មើៗគ្នា កុំឲ្យបន្ទុកធ្លាក់តែទៅលើក្រុមប្រទេសដែលមិនសូវធូរធារ។ ចំណែក ប្រទេសអ្នកមាន ព្រងើយ កន្តើយ មិនចង់ទទួលយកជនភៀសខ្លួន នោះ គឺមិនអាចទៅរួចទេ ព្រោះបញ្ហាជនភៀសខ្លួន ជនអន្តោប្រវេសន៍ គឺជាបញ្ហារបស់មនុស្សទាំងអស់គ្នា។
គេរង់ចាំទន្ទឹងស្តាប់ សុន្ទរកថា និងជំហររបស់ប្រធានាធិបតីតួកគី
នៅក្នុងវេទិកាថ្ងៃនេះ គេឃើញភាគច្រើន មេដឹកនាំរបស់ក្រុមប្រទេសដែលកំពុង ទទួលជនភៀសខ្លួន ដែលមានវត្តមាន ច្រើន ចំណែកប្រទេសដែលត្រូវជួយសម្រាលបន្ទុក បញ្ហាជនភៀសខ្លួន ដូចជាមិនសូវមានច្រើនប៉ុន្មានទេ។ នៅក្នុងចំណោមមេដឹកនាំរបស់ប្រទេសដែលកំពុងទទួលបន្ទុកជនភៀសខ្លួន គេឃើញ លេចមុខត្រដែតជាងគេ ប្រធានាធិបតី តួកគី លោករេស៊ីប អ៊ែរដូហ្កាន ដែលតាមពិតជាអ្នកសហការរៀបចំវេទិកាអន្តរជាតិជាមួយ អង្គការសហប្រជាជាតិ ប្រទេសអាល្លឺម៉ង់ អេត្យូពី ប៉ាគីស្ថាន ស្វ៊ីស និងកូស្តារីកា។
សុន្ទរកថារបស់ប្រធានាធិបតីតួកគី គឺជាអ្វី ដែលគេទន្ទឹង រង់ចាំ ចង់ស្តាប់ជាងគេ ព្រោះថា កន្លងមក លោកប្រធានាធិបតី រេស៊ីប អ៊ែរដូហ្កាន ធ្លាប់បានគំរាមរួចហើយថា តួកគី ដែលពេលនេះ កំពុងទទួលជនភៀសខ្លួន ស៊ីរី ច្រើនជាងគេ ក្នុងពិភពលោក ដល់ទៅ ៣លាននាក់ នឹងអាច បើកច្រកព្រំដែន បញ្ចេញ ជនភៀសខ្លួន ជនអន្តោប្រវេសន៍ ទៅក្នុងទឹកដី អឺរ៉ុប បើសិនអឺរ៉ុប សហគមន៍អន្តរជាតិ មិនផ្តល់ជំនួយថវិកា ឬ ផលប្រយោជន៍ផ្សេងទៀត ដល់តួកគី ទេនោះ។
ថវិកានេះសំខាន់ណាស់សម្រាប់ប្រទេសដែលកំពុងទទួលបន្ទុក ជនភៀសខ្លួន ដូចជាតួកគី។ ការគំរាមរបស់តួកគី នឹងអាចដាក់សម្ពាធលើបណ្តាប្រទេសអឺរ៉ុប ដែលតាមពិត គ្មានប្រទេសណាមួយចង់ទទួលជនភៀសខ្លួននោះទេ។ ប្រទេសអឺរ៉ុបខាងកើត ដែលអភិរក្ស ជាតិនិយម មិនចង់បានជនប្រទេស ដូចជាហុងគ្រី បដិសេធ មិនចង់ទទួលជនបរទេស ចំណែកប្រទេស បារាំង អេស្ប៉ាញ អ៊ីតាលី ទទួលយកដែរ តែក្នុងចំណោមតិចបំផុត។ ក្នុងករណីបារាំង គិតមកដល់ខែធ្នូឆ្នាំនេះ រដ្ឋាភិបាលបារាំង បានទទួលយកជនភៀសខ្លួនប្រមាណ ១ម៉ឺននាក់ ប៉ុណ្ណោះ គឺតិចណាស់ បើប្រៀបធៀប នឹងចំនួនជនភៀសខ្លួនសរុប ប្រមាណ១លានកន្លះ ដែលគួរបានទទួលជំរកជ្រកកោន នៅប្រទេសទីបីនោះ។
ជនភៀសខ្លួនមិនមែនជាបន្ទុក ប៉ុន្តែ មានចំណេះដឹង និងសមត្ថភាព ដែលគេអាចទាញប្រយោជន៍
ត្រូវបង្ខំចិត្តចាកចេញ ពីផ្ទះសម្បែង ពីប្រទេសកំណើតដោយសារសង្រ្គាម ឬដោយសារបញ្ហាអសន្តិសុខ ជនភៀសខ្លួន ត្រូវរងគ្រោះមួយជាន់ទៀត ព្រោះត្រូវគេរើសអើងមិនចង់ទទួលយក ដោយសារតែគិតថា ជនភៀសខ្លួនជាបន្ទុក ធ្វើឲ្យខាតបង់សេដ្ឋកិច្ចជាដើម។ តាមអគ្គលេខាធិការអង្គការសហប្រជាជាតិ រដ្ឋាភិបាល និងអ្នកនយោបាយជាតិនិយម ជាច្រើន បានញុះញង់ ឲ្យគេខ្លាច មិនចង់ពាក់ព័ន្ធនឹងជនភៀសខ្លួននោះទេ នោះ បើទោះបី ជា បញ្ហាជនអន្តោប្រវេសន៍ ជនភៀសខ្លួន គឺជារឿងដែលមនុស្សលើផែនដី ត្រូវទទួលយក និងរស់នៅជាមួយយូរតទៅទៀត ដរាបណា សង្រ្គាម អស្ថិរភាព បញ្ហាសេដ្ឋកិច្ច បញ្ហាអាកាសធាតុ នៅតែកើតមាននោះ។
អ្នកតំណាងជនភៀសខ្លួន ដែលចូលរួម នៅក្នុងវេទិកា អន្តរជាតិ នៅថ្ងៃនេះ បានអំពាវនាវឲ្យគេឈប់មើលជនភៀសខ្លួន ជនអន្តោប្រវេសន៍ ថា ជាបន្ទុក តទៅទៀត។ ផ្ទុយទៅវិញ គេត្រូវទាញយកប្រយោជន៍ពីចំណេះដឹង កម្លាំងពលកម្មរបស់ជនភៀសខ្លួន ដើម្បី ជំរុញ សេដ្ឋកិច្ចប្រទេសរបស់ពួកគេ។ តាមអ្នកតំណាង ជនភៀសខ្លួនមកពីប្រទេសស៊ីរី បើសិនគេបើកចំហរទទួល ជនភៀសខ្លួន នោះ គ្មានទេ ការជួញដូរ លួចដឹកមនុស្ស តាមផ្លូវទឹក គ្មានទេ អ្នកស្លាប់ដោយសារឆ្លងទូកចូលទឹកដីអឺរ៉ុប។ បើសិនគេបើកចំហរ ទទួលយកជនភៀសខ្លួន ជនអន្តោប្រវេសន៍ នោះ ជនអន្តោប្រវេសន៍ជាដើមមិនចាំបាច់ ត្រូវ ចំណាយប្រាក់រាប់ម៉ឺនដុល្លារដើម្បីបង់ឲ្យឈ្មួញ លួចដឹកមនុស្សមកអឺរ៉ុបនោះទេ។ គេវាយតម្លៃថា ជនអន្តោប្រវេសន៍ ជនភៀសខ្លួន ភាគច្រើន បានរត់ចាកចេញពីប្រទេស កំណើត ដោយសារតែសង្រ្គាម បញ្ហាអសន្តិសុខ ប៉ុន្តែ ពួកគេ មានសមត្ថភាព មានចំណេះដឹងខ្ពស់ ដែលអាចជាប្រយោជន៍សម្រាប់ចូលរួមកសាងប្រទេស ដែលផ្តល់កន្លែងជ្រកកោន ដល់ពួកគេ បើសិន រដ្ឋាភិបាល មិនរឹតបន្តឹង នយោបាយអន្តោប្រវេសន៍ទេនោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ