បារាំងកំពុងពិចារណា ក្រុងពលរដ្ឋឱ្យនៅតែក្នុងផ្ទះមែនឬ ?
ចុះផ្សាយនៅថ្ងៃ៖
ស្តាប់ - ០៥:២៥
ក្រោយពីបានប្រកាសចាត់វិធានការបិទសាលារៀន ទូទាំងប្រទេស បិទហាងទំនិញ ភោជនីដ្ឋាន បារ រង្គសាល រោងកុន ... ព្រមទាំងទីសាធារណៈ មិនចាំបាច់មក រដ្ឋាភិបាលបារាំង ត្រូវធ្វើការសម្រេចចិត្តដ៏លំបាកៗជាច្រើនក្នុងការប្រយុទ្ធប្រឆាំងនឹងជំងឺរាតត្បាតកូវីដ១៩ នៅសប្តាហ៍នេះ។ តើបារាំងត្រូវលុបចោលការបោះឆ្នោតក្រុមប្រឹក្សាឃុំសង្កាត់ជុំទីពីរ ? បិទព្រំដែន ? ចេញបម្រាមកាន់តែតឹងតែង ដូចនៅអ៊ីតាលី ឬអេស្ប៉ាញ កំហិតប្រជាជនមិនឱ្យចេញពីផ្ទះតែម្តង ឬយ៉ាងណា ?
ជាវិធានការដ៏បារាំងពុំធ្លាប់ជួបប្រទះទេ។ តាំងពីវេលាម៉ោង ១២អាធ្រាត្រថ្ងៃសៅរ៍ទី ១៤មីនា មក ហាងទំនិញ ដែលមិនបាច់សម្រាប់ជីវិតរស់នៅប្រចាំថ្ងៃ ត្រូវបានបិទ។ ការបិទហាង បិទទីសាធារណៈមិនបាច់ គឺធ្វើឡើងក្នុងបំណង កុំឱ្យមានការជួបជុំមនុស្សច្រើន ដែលជាកត្តាហានិភ័យអាចបង្កើនចំនួនអ្នកឆ្លងមេរោគកូវីដ១៩។ ប៉ុន្តែ នៅថ្ងៃអាទិត្យ ទី ១៥ មីនាម្សិលមិញ ក្រោមផ្ទៃមេឃស្រលះល្អ គេបែរជាឃើញប្រជាជនដើរលេងព្រោងព្រាត នៅជុំៗគ្នា តាមទីកន្លែងសាធារណៈ សួនច្បារ មាត់ទន្លេ យ៉ាងរីករាយ ដូចជាគ្មានរឿងអ្វីកើតឡើងសោះ ដែលតែតាមពិតប្រទេសកំពុងប្រឈមនឹងការរាតត្បាតយ៉ាងខ្លាំង ចំនួនអ្នកឆ្លងថ្មី និងអ្នកស្លាប់កើនឡើងជាលំដាប់។
នៅចំពោះមុខអាកប្បកិរិយាមិនល្អរបស់ប្រជាពលរដ្ឋបែបនេះ មិនចូលរួមអនុវត្តសកម្មភាពដែលជារនាំងទប់ការរាតត្បាត ទើបអង្គប្រជុំពិសេសរបស់រដ្ឋាភិបាលដែលប្រព្រឹត្តទៅនៅសៀលថ្ងៃអាទិត្យផុសគំនិត ថាបើប្រជាពលរដ្ឋមិនប្រកាន់យកកាយវិការទប់ស្កាត់មេរោគទេ គឺ មានតែដាក់បម្រាម បិទឱ្យនៅក្នុងផ្ទះតែម្តង ដូចអ៊ីតាលី ឬអេស្ប៉ាញ។ ប៉ុន្តែនេះមិនមែនជាសេចក្តីសម្រេចផ្លូវការឡើយ។ អ្នកនាំពាក្យរដ្ឋាភិបាលបានអះអាងនិងបដិសេធជាផ្លូវការនៅព្រឹកថ្ងៃចន្ទទី ១៦មីនាភ្លាម ថារដ្ឋាភិបាលពុំបានត្រៀមចេញក្រិត្យឃុំប្រជាពលរដ្ឋឱ្យតែក្នុងផ្ទះទេ។ តែរដ្ឋាភិបាលនឹងពិនិត្យពិចារណាមើលគ្រប់វិធានការដើម្បីធ្វើយ៉ាងណាឱ្យប្រជាពលរដ្ឋប្តូរអាកប្បកិរិយារបស់ខ្លួន គោរពតាមសេចក្តីណែនាំរបស់អាជ្ញាធរ។
វិធានការថ្មី កាន់តែតឹងតែង
រដ្ឋាភិបាលបារាំងគ្រោងនឹងរឹតបន្តឹងវិធានការបន្ថែមទៀត ព្រោះស្ថានភាពរាតត្បាតកាន់ធ្ងន់ធ្ងរណាស់ មានស្លាប់ឡើងដល់១២៧នាក់ និងអ្នកឆ្លង ៥៤២៣ករណីនៅក្នុងប្រទេស គិតត្រឹមព្រឹកថ្ងៃចន្ទទី១៦មីនា។ ក្រោយពី បានជួបប្រជុំជាមួយអ្នកទទួលខុសត្រូវអឺរ៉ុប និងជាមួយលោកស្រី ប្រមុខរដ្ឋាភិបាលអាល្លឺម៉ង់ មែរកិល នៅពេលព្រឹក លោកប្រធានាធិបតីបារាំងត្រូវ បន្តជំនួបប្រជុំអាហារថ្ងៃត្រង់ ក្នុងទម្រង់ជាជំនួបក្រុមប្រឹក្សាការពារជាតិ ដើម្បីដោះស្រាយវិបត្តិ និងជំនួបប្រជុំក្រុមប្រទេសហ្ស៧ តាមវីដេអូខុនហ្វេរិនទៀត។ បន្ទាប់មក លោកប្រធានាធិបតី ម៉ាក្រុង នឹងថ្លែងសុន្ទរកថាទៅកាន់ប្រជាជាតិ នៅពេលយប់។ គឺនៅពេលនោះហើយ ដែលលោកប្រធានាធិបទីប្រាប់អំពីវិធានការថ្មី អាចជាវិធានការដែលទាក់ទងនឹងការសម្រេចបិទខ្ទប់ប្រជាជនឱ្យនៅតែក្នុងផ្ទះ ឬការលើកពេលបោះឆ្នោតក្រុមប្រឹក្សាឃុំសង្កាត់ជុំទីពីរ និងបញ្ហាបិទព្រំដែនជាមួយសមាជិកសហភាពអឺរ៉ុបផ្សេងទៀត។
បិទព្រំដែន
លោកប្រធានាធិបតីម៉ាក្រុង មិនដែលគាំទ្រគំនិតចង់បិទព្រំដែនរវាងសមាជិកសហភាពអឺរ៉ុបដូចគ្នាទេ។ លោកធ្លាប់ទាំងបានរិះគន់ជម្រើសនេះផង កាលពីប៉ុន្មានថ្ងៃមុន ប៉ុន្តែលោកមិនអាចបញ្ចុះបញ្ចូលសមភាគីអឺរ៉ុបផ្សេងៗទៀតបានឡើយ សូម្បីតែអាល្លឺម៉ង់ ក៏ប្រកាន់យកវិធានការបិទព្រំដែនដែរ។ អាល្លឺម៉ង់បានប្រកាសបិទព្រំដែនជាមួយបារាំង អូទ្រីស អ៊ីតាលី ស្វីស ដាណឺម៉ាក និងលុចសំបួរ។ ដូច្នេះបារាំងគ្មានជម្រើសអ្វីក្រៅអំពីព្រមសម្របខ្លួនបិទព្រំដែនជាមួយអាល្លឺម៉ង់វិញដែរ។ គេសង្កេតប៉ូលិសព្រំដែនបង្ហាញវត្តមាននៅតាមព្រំដែនជាមួយបារាំងហើយនៅថ្ងៃនេះ។ មានតែចរាចរណ៍ទំនិញទេដែលអាចចេញចូលបាន។
ប៉ុន្តែលោក ប្រធានាធិបតី នៅតែទទូចស្នើសុំឱ្យអឺរ៉ុបចាត់វិធានការត្រួតពិនិត្យព្រំដែនរួម ព្រំដែនអឺរ៉ុប ចាប់ពីថ្ងៃចន្ទតែម្តង និងសហការចាត់វិធានការដើម្បីកុំឱ្យប្រទេសណាមួយប្រឹងប្រយុទ្ធទប់ទល់នឹងកូវីដ១៩ធ្វើតែម្នាក់ឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ