កូវីដ១៩៖ នាយករដ្ឋមន្ត្រីអង់គ្លេស បូរីស ចនសុន ត្រូវដាក់ឲ្យនៅក្នុងបន្ទប់សង្រ្គោះបន្ទាន់
ចុះផ្សាយនៅថ្ងៃ៖
ស្តាប់ - ០៥:៥២
មេរោគកូវីដ១៩ បន្តឆ្លងរាលដាលខ្លាំងនៅតាមបណ្តាប្រទេសអឺរ៉ុប និងបណ្តាលឲ្យមានអ្នកស្លាប់ច្រើនបំផុត។ លោកបូរីស ចនសុន នាយករដ្ឋមន្ត្រីប្រទេសអង់គ្លេស គឺជាមេដឹកនាំប្រទេសមហាអំណាច តែម្នាក់គត់ ដែលបានឆ្លងមេរោគកូវីដ១៩។ បន្ទាប់ពីបានឃុំខ្លួន សំងំនៅដាច់ដោយឡែក អស់ប្រមាណជិត២សប្តាហ៍ លោកបូរីស ចនសុន ត្រូវបានគេបញ្ជូនទៅកាន់មន្ទីរពេទ្យ កាលពីយប់ថ្ងៃអាទិត្យ ទី៥មេសា។ រហូតមកទល់ពេលនេះ ស្ថានភាពជំងឺរបស់លោកបូរីស ចនសុន បានបង្កឲ្យមានការព្រួយបារម្ភជាខ្លាំង ដោយសារលោក កំពុងស្ថិតនៅក្នុងបន្ទប់សង្រ្គោះបន្ទាន់។
បញ្ចូលអុកស៊ីសែន តែមិនស្ថិតក្រោមជំនួយនៃម៉ាស៊ីនដកដង្ហើម
លោកបូរីស ចនសុន កំពុងស្ថិតនៅក្នុងបន្ទប់សង្រ្គោះបន្ទាន់ នៅឯមន្ទីរពេទ្យ Saint Thomas ទីក្រុងឡុងដ៍។ យោងតាមប្រសាសន៍លោកទេសរដ្ឋមន្ត្រី Michael Gove ដែលបានថ្លែងនៅក្នុងបទសម្ភាសតាមវិទ្យុ LBC នៅព្រឹកថ្ងៃទី៧មេសា បានឲ្យដឹងថា លោកបូរីស ចនសុន កំពុងស្ថិតក្នុងបន្ទប់សង្រ្គោះបន្ទាន់ ដោយក្រុមគ្រូពេទ្យ ត្រូវបញ្ចូលអុកស៊ីសែនជួយគាត់។ ក៏ប៉ុន្តែស្ថានភាពគាត់ មិនធ្ងន់ធ្ងរខ្លាំង រហូតដល់ដាក់ម៉ាស៊ីន ជំនួយការដកដង្ហើមទេ។
សូមរំលឹកថា លោកបូរីស ចនសុន បានធ្វើតេស្តស្វែងរកមេរោគកូវីដ១៩ ហើយលទ្ធផលនៅថ្ងៃទី២៦មិនា បង្ហាញថាគាត់មានផ្ទុកមេរោគនេះ។ ក្រោយមកគាត់បានសំងំនៅក្នុងផ្ទះរហូត។ ដំបូងៗ លោកបានថតសារវីដេអូ ផ្ញើទៅកាន់ប្រជាជនអង់គ្លេស ប្រាប់ពីស្ថានភាពអាការៈជំងឺ ដូចជាគ្រុនក្តៅខ្លួន តែមិនមានអ្វីគួរបារម្ភទេ។
នៅថ្ងៃទី៣មេសា លោកបូរីន ចនសុន ក្តៅខ្លួនខ្លាំងណាស់ តែលោកនៅតែបន្ត ដឹកនាំការប្រជុំគណរដ្ឋមន្ត្រីពីចំងាយ តាមរយៈប្រព័ន្ធវីស្យូខុនហ្វឺរិនស៍។ រហូតទាល់តែយប់ថ្ងៃអាទិត្យ ប្រមាណតែកន្លះម៉ោង ក្រោយព្រះមហាក្សត្រីយានី អេលីហ្សាបែតទី២ បានថ្លែងសន្ទរកថាចប់ លោកបូរីស ចនសុន ត្រូវបានគេបញ្ជូនទៅកាន់មន្ទីរពេទ្យភ្លាម តែម្តង។ នៅព្រឹកថ្ងៃចន្ទ ទី៦មេសា លោកនៅបន្តខំប្រឹងដឹកនាំការប្រជុំរដ្ឋាភិបាល ពីក្នុងបន្ទប់មន្ទីរពេទ្យ ក៏ប៉ុន្តែនៅពេលរសៀល ស្ថានភាពជំងឺកាន់តែធ្ងន់ធ្ងរ ក្រុមគ្រូពេទ្យ បានសម្រេចចិត្តបញ្ជូនគាត់ ចូលបន្ទប់សង្រ្គោះបន្ទាន់ នៅយប់ថ្ងៃចន្ទ។
ដោយឡែក លោកស្រី Carrie Symonds ដែលជាភរិយារបស់លោកបូរីស ចនសុន និងដែលមានកំពុងមានផ្ទៃពោះ៦ខែនោះ ក៏ត្រូវបានគេសង្ស័យ ថាអាចមានផ្ទុកមេរោគកូវីដ១៩ដែរ ព្រោះគាត់ឈឺ គ្រុនក្តៅខ្លួន អស់រយៈពេល១សប្តាហ៍ ទើបតែបានធូរកាលពីថ្ងៃសៅរ៍កន្លងទៅនេះទេ។
មុនឆ្លងកូវីដ១៩ លោកបូរីស ចនសុន មានសុខភាពល្អ តែនឿយហត់ខ្លាំង
បើតាមប្រភពស្និទ្ធនឹងលោកបូរីស ចនសុន គឺថាគាត់ជាមនុស្សមានសុខភាពមាំមួនល្អ មិនមានជម្ងឺប្រចាំកាយអ្វីទេ។ យោងតាមទស្សនាវត្តី Times លោកបូរីស ចនសុន ជាអ្នកចូលចិត្តកីឡា។ លោកចូលចិត្តលេងកីឡាវាយតេនីស ជាញឹកញាប់ នៅពេលណាលោកមានពេលទំនេរ។ ប្រភពដដែលអះអាងថា លោកបូរីស ចនសុន មានគ្រូបង្ហាត់ធ្វើយ៉ូហ្កា និងធ្វើលំហាត់ប្រាណ ដើម្បីសម្រកទំងន់។
ក៏ប៉ុន្តែ ចាប់តាំងពីគាត់បានចូលធ្វើជានាយករដ្ឋមន្ត្រីអង់គ្លេស នៅខែកក្កដា ឆ្នាំ២០១៩ គឺគាត់មានការងារច្រើនខ្លាំងណាស់ ដូចជាការចរចាបន្ទាន់ ដើម្បីផ្តាច់ខ្លួនអង់គ្លេសចេញពីសហភាពអឺរ៉ុបជាដើម។ ការងាររវល់ខ្លាំង ប្រជុំទាំងថ្ងៃទាំងយប់ រហូតដល់ចុងខែតុលា ហើយបន្ទាប់មកទៀត លោកត្រូវធ្វើការឃោសនាបោះឆ្នោតទៀតនៅខែវិច្ឆិកា និងខែធ្នូទៀត។ ពោលគឺអំឡុងពេល៦ ៧ខែចុងក្រោយនេះ ដែល លោកបូរីស ចនសុន នឿយហត់ខ្លាំង យកតែមែនទែន។
នរណាធ្វើជានាយករដ្ឋមន្ត្រីបណ្តោះអាសន្ន?
សម្រាប់ប្រទេសអង់គ្លេស នេះគឺជាស្ថានភាពដ៏លំបាកណាស់ ខណៈដែលប្រទេសកំពុងប្រយុទ្ធជាមួយការឆ្លងរាលដាលមេរោគកូវីដ១៩ ហើយនាយករដ្ឋមន្ត្រីកំពុងស្ថិតក្នុងការសង្រ្គោះបន្ទាន់ នៅឯមន្ទីរពេទ្យ បែបនេះទៀត។ មានសំណួរបានចោទឡើង ស្តីអំពីដំណើរការទូទៅ នៃរដ្ឋាភិបាលអង់គ្លេស ក្នុងអំឡុងពេល ដែលលោកនាយករដ្ឋមន្ត្រីស្ថិតនៅមន្ទីរពេទ្យ។
មុនពេលត្រូវគេបញ្ជូនចូលពេទ្យ លោកបូរីស ចនសុន បានតែងតាំងលោក Dominic Raab រដ្ឋមន្ត្រីក្រសួងការបរទេស ដែលមានងារជាទេសរដ្ឋមន្ត្រីទីមួយ ឲ្យចាត់ចែងកិច្ចការបន្ទាន់ចាំបាច់នានា។ ក៏ប៉ុន្តែមិនមែនមានន័យថា លោក Dominic Raab នឹងកាន់តំណែង ជានាយករដ្ឋមន្ត្រីបណ្តោះអាសន្ននោះទេ។
មានពាក្យចចាមអារ៉ាមខ្លះ លើកឡើង ថា គណៈរដ្ឋមន្ត្រីអង់គ្លេស កំពុងស្ថិតក្នុងវិបត្តិផង ដោយសារតែគ្មានមេកើយ មិនដឹងថានរណាជាអ្នកសម្រេចអ្វីឲ្យពិតប្រាកដ នេះបើផ្អែកតាមការចុះផ្សាយរបស់ ទស្សនាវត្តី Times។ ក្រៅ ពីលោក Dominic Raab រដ្ឋមន្ត្រីក្រសួងការបរទេស ប្រមាណ២សប្តាហ៍ចុងក្រោយនេះ គេឃើញមានមនុស្ស៣នាក់ ផ្សេងទៀត បានលេចមុខខ្លាំង គឺលោក Matt Hancock រដ្ឋមន្ត្រីក្រសួងសុខាភិបាល លោក Rishi Sunack រដ្ឋមន្ត្រីហិរញ្ញវត្ថុ និងលោក Mark Sedwill ប្រធានខុទ្ទកាល័យនាយករដ្ឋមន្ត្រី។
គ្មានច្បាប់ណាមួយ កំណត់ថាក្នុងកាលៈទេសៈបែបនេះ តើនរណានឹងមកឡើងធ្វើជានាយករដ្ឋមន្ត្រីបណ្តោះអាសន្ន ជំនួសលោកបូរីស ចនសុននោះទេ។ យោងតាមការវិភាគ ប្រសិនបើស្ថានភាពជំងឺ របស់លោកបូរីស ចនសុន មិនធូរស្រាល បន្តយូរទៅមុខទៀត រដ្ឋមន្ត្រីទាំងអស់ អាចប្រជុំគ្នាសម្រេចរើសនរណាម្នាក់ ធ្វើជានាយករដ្ឋមន្ត្រីបណ្តោះអាសន្ន ឬមួយក៏អាចប្រហែលជារដ្ឋសភា ដែលនឹងស្នើទៅព្រះមហាក្សត្រ ដើម្បីបើកផ្លូវសុំការរៀបចំរដ្ឋាភិបាលថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ